રાધનપુરના જેઠાસરમાં બે જૂથ વચ્ચે અથડામણ : એક મહિલા ઈજાગ્રસ્ત, 9 સામે ફરિયાદ, ગોઠવાયો પોલીસ બંદોબસ્ત

પાટણ જિલ્લાના રાધનપુર તાલુકાના જેઠાસર ગામમાં બે જૂથો વચ્ચે અથડામણ થઈ છે. જુની અદાવતના કારણે હિંસક અથડામણ થઈ હોવાનો બનાવ સામે આવ્યો છે. મળતી માહિતી મુજબ એક જ પરિવારના બે જૂથો વચ્ચે અંગત અદાવતના કારણે વિવાદ થયો હતો, જે બાદ બંને પક્ષોએ સામે સામે પથ્થરમારો શરૂ કરી દીધો હતો.

પથ્થરમારાની ઘટનામાં મહિલા ઈજાગ્રસ્ત

આ ઘટનાનો વીડિયો સ્થાનિક લોકોએ મોબાઈલમાં કેદ પણ કર્યો છે, જેમાં સ્પષ્ટ રીતે પથ્થરમારાની ઘટના જોઈ શકાય છે. આ પથ્થરમારમાં એક મહિલા ગંભીર રીતે ઈજાગ્રસ્ત થઈ છે, જેને તાત્કાલિક ધારપુર હોસ્પિટલમાં સારવાર હેઠળ ખસેડવામાં આવી છે.

5 મહિલા અને 4 પુરૂષો સામે ગુનો નોંધાયો

આ અથડામણ બાદ રાધનપુર પોલીસે કાર્યવાહી હાથ ધરી છે અને પાંચ મહિલા સહિત ચાર પુરુષો સામે પોલીસે ફરિયાદ નોંધાઈ છે. કુલ મળીને નવ (9) લોકો સામે ફરિયાદ નોંધવામાં આવી છે. આ અથડામણ જૂની અદાવતના કારણે થઈ હોવાનું અનુમાન છે. હાલ પોલીસ દ્વારા સમગ્ર મામલે વધુ તપાસ હાથ ધરી છે