Vadodara Accident News: વડોદરા શહેરમાં માર્ગ અકસ્માતોની ઘટનાઓ દિવસેને દિવસે વધતી જઈ રહી છે, જે ગંભીર ચિંતા ઉભી કરી રહી છે. શહેરમાં છેલ્લા માત્ર પાંચ કલાકમાં અલગ-અલગ વિસ્તારોમાં થયેલા ત્રણ ગંભીર અકસ્માતોમાં ત્રણ લોકોના કરુણ મોત થતા સમગ્ર શહેરમાં હચમચી ઉઠ્યું છે. વડસર, હરણી રોડ બાદ છાણી ફતેગંજ વિસ્તારમાં થયેલા અકસ્માતે ફરી એકવાર ટ્રાફિક વ્યવસ્થાની ખામીઓને ઉજાગર કરી છે.
વડોદરામાં અકસ્માતનો સિલસિલો!
પ્રથમ અકસ્માત વડસર બ્રિજ પાસે થયો હતો, જ્યાં વડોદરા મહાનગરપાલિકાના ડમ્પરે સાઇકલ પર જઈ રહેલા એક વૃદ્ધને કચડી નાખ્યા હતા. આ ઘટનાના સીસીટીવી ફૂટેજ પણ સામે આવ્યા છે. અકસ્માત બાદ ડમ્પરચાલક વાહન સાથે ફરાર થઈ ગયો હતો, જેને લઈને સ્થાનિકોમાં ભારે રોષ જોવા મળ્યો હતો. બીજો બનાવ એરપોર્ટ સર્કલ પાસે સર્જાયો હતો, જ્યાં એક આઈસર ચાલકે નિયંત્રણ ગુમાવી ઝાડ સાથે અથડાયા બાદ એક રાહદારીને અડફેટે લીધો હતો. ત્યારબાદ આઈસર બે બાઈક અને એક કારને ટક્કર મારતા હાહાકાર મચી ગયો હતો. આ અકસ્માતમાં 69 વર્ષીય વૃદ્ધનું ઘટનાસ્થળે જ મોત થયું હતું.
ટ્રક ચાલકની ટક્કરથી મોત
ત્રીજો અને અત્યંત ગોઝારો અકસ્માત છાણી ફતેગંજ વિસ્તારમાં થયો હતો. અહીં એક્ટિવા (મોપેડ) ચાલક અને ટ્રક વચ્ચે થયેલી ટક્કરમાં 60 વર્ષીય રાજુભાઈ પરમારનું ઘટનાસ્થળે જ કમકમાટીભર્યું મોત થયું હતું. રાજુભાઈ ફતેગંજના અમરનગર વિસ્તારમાં રહેતા હતા અને રેલવે વિભાગમાંથી નિવૃત્ત કર્મચારી હતા. તેઓ બેંકના કામ માટે જઈ રહ્યા હતા ત્યારે અચાનક ટ્રક ચાલકે તેમને અડફેટે લીધા હતા. અથડામણ બાદ તેઓ રોડ પર પટકાયા અને ટ્રકનું ટાયર માથા પરથી ફરી વળતાં ગંભીર ઇજાઓ થતાં તેમનું ઘટના સ્થળે કરુણ મોત થયું હતું.
અકસ્માત બાદ વિસ્તારમાં લોહિયાળ દ્રશ્યો સર્જાયા હતા અને લોકોમાં ભય સાથે આક્રોશ ફેલાયો હતો. ઘટનાની જાણ થતાં ફતેગંજ પોલીસ સ્થળ પર પહોંચી, ટ્રાફિક વ્યવસ્થા સંભાળી અને તપાસ શરૂ કરી હતી. પોલીસના જણાવ્યા અનુસાર આ હિટ એન્ડ રનનો બનાવ છે અને ફરાર ટ્રક ચાલકને પકડવા સીસીટીવી ફૂટેજના આધારે કાર્યવાહી ચાલી રહી છે. મૃતદેહને પોસ્ટમોર્ટમ માટે સયાજી હોસ્પિટલ ખસેડવામાં આવ્યો છે.
