ફિલ્મ 'ધ કેરલા સ્ટોરી' જેવી જ ઘટના અમદાવાદમાં! : હિન્દુ સગીરાનું નકલી આઈડી બનાવી ફસાવવાનું કાવતરું નિષ્ફળ

Ahmedabad News: થોડા સમય પહેલા આવેલી બોલિવૂડ ફિલ્મ ‘ધ કેરલા સ્ટોરી’માં જે રીતે સગીરાઓને પ્રેમજાળમાં ફસાવી, તેમના નકલી દસ્તાવેજો બનાવી ધર્મ પરિવર્તન અને શોષણના કિસ્સાઓ દર્શાવવામાં આવ્યા હતા, તેના જેવો જ એક ચોંકાવનારો કિસ્સો અમદાવાદમાં પ્રકાશમાં આવ્યો છે. હિન્દુ સંગઠનોની સતર્કતાને કારણે એક સગીરા વિધર્મી યુવકોના 'સેક્સ ટ્રેપ'નો શિકાર બનતા બચી ગઈ છે.

શું છે સમગ્ર મામલો?

અમદાવાદના રિવરફ્રન્ટ પર હિન્દુ સંગઠનના આગેવાનો જ્યારે રાઉન્ડમાં હતા, ત્યારે તેમની નજર ત્રણ સગીરાઓ પર પડી જે ત્રણ મુસ્લિમ યુવકો સાથે જોવા મળી હતી. શંકા જતાં સંગઠનના સભ્યોએ જ્યારે પૂછપરછ કરી, ત્યારે એક સગીરાએ પોતાનું નામ 'નાઝિયાબી' જણાવ્યું હતું. તેણે પુરાવા તરીકે એક ઓળખપત્ર પણ બતાવ્યું, જેમાં તેનું નામ નાઝિયાબી મોહમ્મદ સરફરાજ અબ્બાસી લખેલું હતું. જોકે, સગીરાના ગળામાં માતાજીનું પેન્ડલ જોઈને સંગઠનના સભ્યોને દાળમાં કંઈક કાળું હોવાની શંકા ગઈ. તુરંત જ પોલીસને બોલાવવામાં આવી અને કડક પૂછપરછ શરૂ કરાઈ, જેમાં સમગ્ર સત્ય બહાર આવ્યું.

પોલીસ તપાસમાં ખુલેલા ચોંકાવનારા તથ્યો

વાસણા પોલીસે આ મામલે તપાસ હાથ ધરતા અનેક ગંભીર ખુલાસાઓ થયા છે. સગીરા પાસેથી મળી આવેલા આધારકાર્ડમાં ફોટો સગીરાનો હતો, પરંતુ નામ મુસ્લિમ હતું અને સરનામું ઈન્દોર (મધ્યપ્રદેશ)નું હતું. સૌથી ગંભીર બાબત એ હતી કે સગીરા હોવા છતાં આધારકાર્ડમાં તેની ઉંમર 21 વર્ષ (પુખ્ત) દર્શાવવામાં આવી હતી. પૂછપરછમાં જાણવા મળ્યું કે આરોપીઓ સગીરાને હોટલમાં લઈ જઈ દુષ્કર્મ ગુજારવાના ઈરાદે આ નકલી કાર્ડ બનાવ્યું હતું. હોટલમાં એન્ટ્રી માટે પુખ્ત વયના હોવું જરૂરી હોવાથી આ કાવતરું ઘડાયું હતું. પોલીસે આ મામલે આમીરઅલી શેખ, સિરાજ સલમાની અને અરવિંદ ચૌહાણ** નામના ત્રણ શખ્સોની ધરપકડ કરી છે. જેમાં અરવિંદ ચૌહાણે દોઢ વર્ષ પહેલા આ નકલી દસ્તાવેજ બનાવવામાં મદદ કરી હતી.

મોટી ગેંગ સક્રિય હોવાની આશંકા

આરોપીઓ અને ભોગ બનનાર એક જ વિસ્તારમાં રહેતા હોવાથી પરિચયમાં આવ્યા હતા. જોકે, જે રીતે પ્રોફેશનલ રીતે નકલી આઈડી કાર્ડ બનાવવામાં આવ્યું અને સગીરાનું નામ બદલી દેવાયું, તે જોતા પોલીસને શંકા છે કે આ માત્ર વ્યક્તિગત ગુનો નથી, પરંતુ તેની પાછળ કોઈ મોટી ગેંગ કાર્યરત હોઈ શકે છે. હાલ પોલીસે આ ત્રણેય આરોપીઓ વિરુદ્ધ પોક્સો (POCSO) અને બનાવટી દસ્તાવેજો (Forgery) બનાવવાની કલમો હેઠળ ગુનો નોંધી વધુ તપાસ હાથ ધરી છે. હિન્દુ સંગઠનની સમયસૂચકતાને કારણે ત્રણ સગીરાઓ મોટી આફતમાંથી ઉગરી ગઈ છે.