મહેસાણા લોકલ ક્રાઈમ બ્રાન્ચે એક સફળ ઑપરેશનમાં અમદાવાદના કાલુપુર રેલવે સ્ટેશન આસપાસ થનારી મોટા પાયે લૂંટની ગોઠવણનો ભાંડો ફોડ્યો છે. પોલીસને મળેલી ચોક્કસ માહિતીના આધારે ચાર યુવાનોને હથિયાર અને ચોરાયેલી મોટરસાયકલ સાથે ઝડપી લેવામાં આવ્યા છે, જ્યારે આ સમગ્ર યોજનામાં સામેલ કુલ આઠ શખ્સો વિરુદ્ધ વિસનગર પોલીસ સ્ટેશનમાં ગુનો નોંધવામાં આવ્યો છે.
LCBની ટીમ રાત્રિ દરમિયાન પેટ્રોલિંગ કરતી હતી ત્યારે ભાન્ડુ ગામ નજીક કેટલાક શંકાસ્પદ લોકોની હલચલ વિશે માહિતી મળી હતી. સ્થળ પર પહોંચેલી ટીમે ચાર યુવકોને મૂવમેન્ટ બદલતા જોયા અને તેમને કાબુમાં લીધા. પોલીસે પૂછપરછ કરતાં જાણવા મળ્યું કે તેઓ કાલુપુર સ્ટેશન પર આંગડિયાની મોટી રકમ ધરાવતા કર્મચારીને નિશાન બનાવવા ઈચ્છતા હતા.
જપ્ત કરાયેલી મોટરસાયકલ પર લગાડેલો નંબર ખોટો હોવાનું માલૂમ પડ્યું અને ચેસીસ તથા એન્જિન નંબરની ચકાસણી કરતાં આ વાહન ઉનાવા વિસ્તારમાંથી ચોરાયેલું હોવાનું બહાર આવ્યું. તપાસકર્તાઓનું માનવું છે કે આરોપીઓ લાંબા સમયથી ગેરકાયદેસર પ્રવૃત્તિઓમાં સંડોવાયેલા હોઈ શકે છે.
મુખ્ય શખ્સ ગણાતા ગણપત ઠાકુરના ભાડાના મકાનની તપાસમાં ઘરની અંદર રાખેલી ઘઉંની થેલીમાંથી બે દેશી બનાવટની પિસ્તોલ અને 9 લાઈવ કારતૂસ મળ્યાં. પોલીસે જણાવ્યું કે આ હથિયારો રાજસ્થાનના કેકરી વિસ્તાર તરફથી કોઈ અજાણ્યા વ્યકિત મારફતે લાવવામાં આવ્યા હતા. બંને પિસ્તોલની કિંમત મળીને અંદાજે 58000 જેટલી થાય છે.
તપાસમાં વધુ ખુલ્યું કે ગેંગના બે સાગરીતો અગાઉ આંગડિયા વ્યવસાય સાથે કામ કરી ચૂક્યા હોવાથી તેમને રૂટિન અવરજવર વિશે ચોક્કસ માહિતી હતી. તેઓએ સ્ટેશન ક્ષેત્રની બે ત્રણ વખત મુલાકાત લઈને લૂંટ માટે યોગ્ય સ્થળ અને સમય પસંદ કર્યો હતો. યોજના મુજબ આંગડિયા કર્મચારી વહેલી સવારે સ્ટેશનની બહાર નીકળે ત્યારે તેની ગાડી અટકાવી હથિયાર બતાવી રકમ છીનવવાની તૈયારી કરી હતી.
આંગડિયાની રકમ લૂંટી શકાય તે માટે ગુજરાતની સાથે સાથે રાજસ્થાનના રાધેશ્યામ બાવરી, જીતેન્દ્ર બાવરી, અલ્પેશ ઠાકોર અને મુન્નો બાવરીને પણ બોલાવવામાં આવ્યા હતા. ધરપકડ કરાયેલા રાધેશ્યામ બાવરીના રાજસ્થાનમાં ચોરી અને ઘરફોડના કુલ 9 ગુના દાખલ થયેલા હોવાનું સામે આવ્યું છે.
પોલીસે ચારેય ઝડપાયેલા આરોપીઓ અને અન્ય ચાર ફરાર સાગરીતો વિરુદ્ધ ગુનો નોંધ્યો છે. મહેસાણા LCB હવે હથિયારોની સપ્લાય, ગેંગના મુખ્ય સૂત્રધારો અને તેમની અગાઉની પ્રવૃત્તિઓ અંગે વધુ તપાસ કરી રહી છે.
