Panchmahal News : પંચમહાલ જિલ્લાના હાલોલ તાલુકાના ઘાટા ગામે એક કરૂણ ઘટના બની છે, જેમાં પાણી ભરેલા હોજમાં પડી જવાથી ત્રણ વર્ષના બાળકનું મોત નીપજ્યું છે. આ દુર્ઘટનાએ સમગ્ર ગામમાં શોકનો માહોલ સર્જ્યો છે.
પાણી ભરેલા હોજમાં પડી જવાથી બાળકનું મોત
મળતી માહિતી મુજબ ઘાટા ગામમાં ત્રણ વર્ષનો પિયુષ અચાનક ઘરની આસપાસ આવેલા પાણી ભરેલા હોજમાં પડી ગયો હતો. થોડા સમય બાદ બાળક પાણીમાં પડેલું હોવાનું ધ્યાનમાં આવતા પરિવારજનો દોડી આવ્યા અને બાળકને તરત જ પાણીમાંથી બહાર કાઢ્યો હતો. જોકે, તેને સારવાર માટે લઈ જવાય તે પહેલાં જ પિયુષનું કરુણ મોત થઈ ગયું હતું.
પરિવાર પર દુઃખનો પહાડ તૂટી પડ્યો
નાનકડા બાળકના અચાનક મોતથી પરિવાર પર દુઃખનો પહાડ તૂટી પડ્યો છે. આ ઘટના તમામ માતા-પિતા માટે ચેતવણીજનક છે કે બાળકોને પાણી ભરેલા સ્થળો નજીક એકલા ન છોડવા અને સતત નજર રાખવી જરૂરી છે. પોલીસે ઘટનાની જાણ લઈ જરૂરી કાર્યવાહી હાથ ધરી છે.
