Aarya Desai World Record: ગુજરાતના યુવા ખેલાડી આર્ય દેસાઈએ સુરત ક્રિકેટ T20 લીગમાં ધમાકેદાર ઇનિંગ રમીને વર્લ્ડ રેકોર્ડ બનાવ્યો છે. માત્ર 81 બોલમાં અણનમ 193 રન ફટકારીને તેમણે T20 ક્રિકેટના સૌથી વધુ વ્યક્તિગત સ્કોરનો નવો રેકોર્ડ સ્થાપ્યો છે. આ શાનદાર ઇનિંગમાં આર્યએ 21 ચોગ્ગા અને 14 છગ્ગાની મદદથી વિસ્ફોટક બેટિંગ કરી.
પહેલાનો રેકોર્ડ ક્રિસ ગેલના નામે
આ પ્રદર્શન ગુજરાત ક્રિકેટ એસોસિએશન (GCA) દ્વારા માન્યતા પ્રાપ્ત સુરત ક્રિકેટ T20 લીગમાં આવ્યું છે, જે તેની છઠ્ઠી આવૃત્તિમાં છે. પહેલાનો રેકોર્ડ વેસ્ટ ઇન્ડિઝના દિગ્ગજ ક્રિસ ગેલના નામે હતો, જેમણે 2013માં IPLમાં RCB તરફથી 66 બોલમાં175 રન બનાવ્યા હતા. આર્યની આ ઇનિંગે તેને પાછળ છોડી દીધો છે અને સોશિયલ મીડિયા પર ખળભળાટ મચાવી દીધો છે.
KKRના ભાગરૂપે IPLમાં સામેલ રહ્યા
GCAના સેક્રેટરી અનિલ પટેલે પણ આ પ્રદર્શનની પ્રશંસા કરી છે. તેમણે કહ્યું કે, "મેં ક્યારેય કોઈને આર્યા જેવી રીતે બોલ હિટ કરતા જોયા નથી." આર્ય દેસાઈ અગાઉ KKRના ભાગરૂપે IPLમાં સામેલ રહ્યા છે અને રણજી તથા દુલીપ ટ્રોફીમાં ગુજરાતનું પ્રતિનિધિત્વ કરી ચૂક્યા છે. તેમણે છેલ્લી રણજી સીઝનમાં500થી વધુ રન પણ બનાવ્યા હતા. આ યુવા ખેલાડીનું ભવિષ્ય ઉજ્જવળ લાગે છે અને ભારતીય ક્રિકેટ માટે એક નવી આશા જગાવી છે!
