વડોદરા શહેરના નવાયાર્ડ વિસ્તારમાં રહેતી 14 વર્ષીય સગીરા સાથે થયેલી સામૂહિક દુષ્કર્મની ઘટનાએ શહેરમાં ચકચાર મચાવી છે. ફતેગંજ પોલીસ સ્ટેશનમાં સગીરાના પિતાએ ફરિયાદ નોંધાવતા પોલીસે તાત્કાલિક કાર્યવાહી કરી એક આરોપીની ધરપકડ કરી છે, જ્યારે બીજા આરોપીની શોધખોળ શરૂ કરવામાં આવી છે. ઘટનાના પગલે સગીરાને મેડિકલ તપાસ માટે વડોદરાની એસએસજી હોસ્પિટલમાં ખસેડવામાં આવી છે.
પ્રાપ્ત માહિતી અનુસાર, ફતેગંજ વિસ્તારમાં રહેતા હર્ષિત મેકવાન અને ‘હેપ્પી’ નામના યુવકે સગીરાને લલચાવીને એક રૂમમાં લઈ ગયા હતા. ત્યાં બંને યુવકોએ બળજબરીપૂર્વક વારાફરતી દુષ્કર્મ આચર્યું હોવાનું ફરિયાદમાં જણાવાયું છે. આશરે ત્રણ કલાક સુધી સગીરાને કેદ જેવી સ્થિતિમાં રાખી તેના પર અત્યાચાર ગુજારવામાં આવ્યો હતો. બાદમાં ગભરાયેલી હાલતમાં સગીરા ત્યાંથી છૂટી ઘરે પહોંચી હતી.
ઘરે પહોંચ્યા બાદ સગીરાના પિતાએ દીકરીને પૂછપરછ કરતા સમગ્ર ઘટના સામે આવી હતી. દીકરીની વાત સાંભળતા જ પરિવારમાં ભારે આઘાત અને રોષ ફેલાયો હતો. ત્યારબાદ પરિવારજનોએ વિલંબ કર્યા વગર ફતેગંજ પોલીસ સ્ટેશનમાં પહોંચીને બંને આરોપીઓ સામે સામૂહિક દુષ્કર્મની ફરિયાદ નોંધાવતા પોલીસે ગુનો દાખલ કરી તપાસ હાથ ધરી છે.
સગીરાના પિતાએ જણાવ્યું હતું કે, “મારી દીકરી સાથે જે બન્યું છે તે અત્યંત અમાનવીય છે. આવું કૃત્ય ફરી કોઈ બીજી દીકરી સાથે ન થાય તે માટે આરોપીઓને કડકમાં કડક સજા થવી જોઈએ. ન્યાય માટે અમે અંત સુધી લડીશું.”
ઉલ્લેખનીય છે કે, છેલ્લા કેટલાક સમયથી વડોદરા શહેરના વિવિધ વિસ્તારોમાં સગીરા તથા યુવતીઓ પર દુષ્કર્મના બનાવો નોંધાઈ રહ્યા છે. નવરાત્રી દરમિયાન ભાયલી વિસ્તારમાં થયેલી સામૂહિક દુષ્કર્મની ઘટનાના પડઘા હજી શમ્યા નથી ત્યાં વધુ એક ગેંગરેપની ઘટના સામે આવતાં શહેરની સલામતી અંગે ગંભીર પ્રશ્નો ઊભા થયા છે.
ઘટનાની જાણ થતાં સામાજિક કાર્યકરો પણ પરિવાર સાથે પોલીસ સ્ટેશન પહોંચ્યા હતા. તેમણે આરોપીઓને કડકમાં કડક સજા આપવા અને પીડિત પરિવારને ઝડપી ન્યાય મળે તેવી માંગ ઉઠાવી હતી. ફતેગંજ પોલીસનું કહેવું છે કે, ફરાર આરોપીની ધરપકડ માટે ટીમો તૈનાત કરી તપાસ વધુ તેજ બનાવવામાં આવી છે.
