સુરતના ઉમરપાડામાં સગીરા સાથે સામૂહિક દુષ્કર્મની ગંભીર ઘટના સામે આવતાં સમગ્ર વિસ્તારમાં ચકચાર મચી ગઈ છે.
સૂત્રો દ્વારા મળતી માહિતી મુજબ, ઉમરપાડા તાલુકામાં પાંચ જેટલા શખ્સોએ મળીને સગીરા સાથે દુષ્કર્મ આચર્યું હોવાનો આક્ષેપ સામે આવ્યો છે. ઘટનાની જાણ થતા પોલીસ તંત્ર તાત્કાલિક હરકતમાં આવ્યું હતું.
પાંચ આરોપીઓ પોલીસ કસ્ટડીમાં
મળતી માહિતી મુજબ પોલીસ દ્વારા ઘટનામાં સંડોવાયેલા તમામ આરોપીઓને ઝડપી લેવામાં આવ્યા છે. હાલ પોલીસ દ્વારા આરોપીઓની પૂછપરછ કરવામાં આવી રહી છે અને સમગ્ર ઘટનાની વિગતવાર તપાસ હાથ ધરાઈ છે.
વિસ્તારમાં ભય અને ચકચાર
આ ઘટના બહાર આવતા સ્થાનિક લોકોમાં ભારે રોષ અને ચિંતા જોવા મળી રહી છે. ખાસ કરીને સગીરા સાથે બનેલી આ ઘટના સામે આવતા કાયદો અને વ્યવસ્થાને લઈને પણ પ્રશ્નો ઉઠી રહ્યા છે.
5 માર્ચે ભરૂચમાં 11 વર્ષીય બાળકી સાથે દુષ્કર્મ
ભરૂચની એક ઝૂપડપટ્ટી વિસ્તારમાં રહેતો પરિવાર રાત્રીના સમયે પોતાના ઝૂપડામાં સુઇ રહ્યો હતો. જેમાં પતિ-પત્ની અને તેમના બે સંતાનોમાં એક પુત્ર અને 11 વર્ષની એક પુત્રી સાથે સાથે જ સુઇ ગયાં હતાં. દરમિયાનમાં રાત્રીના દોઢેક વાગ્યાના અરસામાં એક શખ્સે ઝૂપડાંમાં પ્રવેશી તેમની 11 વર્ષની પુત્રીનું મોઢું દબાવી દુષ્કર્મ આચર્યું હતું. બાળકીના મોઢેથી હાથ હટી જતાં તેને બુમરાણ મચાવી હતી. જેના પગલે તેના માતા-પિતા જાગી ગયાં હતાં. તેઓ કાંઇ કરે તે પહેલાં જ નરાધમ ત્યાંથી ભાગ્યો હતો.
સી ડિવિઝન પોલીસે પોક્સો એક્ટ સહિત અન્ય કલમોના આધારે પિયુષ ઉર્ફે પિયા ઠાકોર પરમાર વિરૂદ્ધ ગુનો નોંધી તેને શોધવાની કવાયત હાથ ધરી હતી. દરમિયાન પોલીસે હ્યુમન ઇન્ટેલિજન્સ અને ટેક્નિકલ સર્વેલન્સની મદદથી પિયુષ ઉર્ફે પિયા ઠાકોર પરમારને ઝડપી પાડ્યો હતો.
