Petition against Vadodara cricketers: વડોદરા શહેરમાં ભારતીય ક્રિકેટરો હાર્દિક પંડ્યા અને ઈશાન કિશન વિરુદ્ધ રાષ્ટ્રધ્વજના અપમાનના આક્ષેપોને લઈને કારેલીબાગ પોલીસ મથકે અરજી આપવામાં આવી છે. શહેરના સામાજિક આગેવાનો દ્વારા કરવામાં આવેલી આ અરજીમાં બંને ક્રિકેટરો પર અમદાવાદ સ્થિત નરેન્દ્ર મોદી સ્ટેડિયમ ખાતે ઉજવણી દરમિયાન તિરંગાનું અપમાન તથા અશોભનીય વર્તન કર્યાનો આરોપ મૂકવામાં આવ્યો છે.
વીડિયો સોશિયલ મીડિયા પર વાયરલ:
માહિતી મુજબ, ટીમ ઈન્ડિયાની T20 વર્લ્ડકપ જીત બાદ અમદાવાદના સ્ટેડિયમમાં ખેલાડીઓ દ્વારા કરવામાં આવેલી ઉજવણીના કેટલાક વીડિયો સોશિયલ મીડિયા પર વાયરલ થયા હતા. આ વીડિયોમાં હાર્દિક પંડ્યા ખભા પર તિરંગો ઓઢીને મેદાનમાં નાચતા અને દોડતા જોવા મળતા હોવાનું અરજીમાં ઉલ્લેખ કરવામાં આવ્યો છે. અરજીકર્તાઓનો આક્ષેપ છે કે આ રીતે તિરંગાને ઓઢીને મનોરંજન કરવું રાષ્ટ્રધ્વજની ગૌરવ પર અસર કરે છે.
રાષ્ટ્રીય પ્રતિકો પ્રત્યે અશ્રદ્ધા:
અરજીમાં વધુમાં જણાવાયું છે કે ઉજવણી દરમિયાન એક અન્ય વીડિયોમાં હાર્દિક પંડ્યા પોતાની ગર્લફ્રેન્ડ સાથે સ્ટેજ પર સૂતેલા જોવા મળ્યા હતા અને તે સમયે પણ તેમના ખભા પર તિરંગો હતો. અરજીકર્તાઓનું કહેવું છે કે આ વર્તન રાષ્ટ્રીય પ્રતિકો પ્રત્યે અશ્રદ્ધા દર્શાવે છે. સાથે સાથે ઈશાન કિશન દ્વારા પણ તિરંગા સાથે અયોગ્ય વર્તન કરવામાં આવ્યું હોવાનો આક્ષેપ કરવામાં આવ્યો છે.
આ મામલે જાગૃત નગરી અને સામાજિક આગેવાન રાજેશકુમાર ગોયલે જણાવ્યું હતું કે 8 માર્ચના રોજ અમદાવાદના નરેન્દ્ર મોદી સ્ટેડિયમમાં ઉજવણી દરમિયાન દેશના રાષ્ટ્રધ્વજનું અપમાન થયું હોવાના આરોપોને લઈને તેઓ કારેલીબાગ પોલીસ મથકમાં આવ્યા છે. તેમણે પોલીસ સમક્ષ રજૂઆત કરી છે કે આ ઘટનાની તપાસ કરીને સંબંધિત ક્રિકેટરો સામે કાયદેસરની કાર્યવાહી કરવામાં આવે.
બિડકર દ્વારા હાર્દિક પંડ્યા સામે ફરિયાદ:
ઉલ્લેખનીય છે કે આ મુદ્દે અગાઉ પણ બેંગલુરુના શિવાજીનગર પોલીસ સ્ટેશનમાં પુણેના વકીલ વાજીદ ખાન બિડકર દ્વારા હાર્દિક પંડ્યા સામે ફરિયાદ કરવામાં આવી હતી. હાલમાં વડોદરામાં આપવામાં આવેલી અરજી અંગે પોલીસે નોંધ લઈને કાયદેસરની પ્રક્રિયા હાથ ધરવાની દિશામાં તપાસ શરૂ કરવાની સંભાવના વ્યક્ત કરવામાં આવી રહી છે.
