Banaskantha News : ગુજરાતમાં ધમકી ભર્યા ઈ મેઈલનો સિલસિલો યથાવત જોવા મળી રહ્યો છે. બનાસકાંઠાના પાલનપુર સ્થિત કલેક્ટર કચેરીમાં આજે અચાનક ભારે ચકચાર મચી ગઈ હતી. કલેક્ટર બનાસકાંઠાને ધમકી ભર્યો ઈમેલ મળતાં જ ડીવાયએસપી સહિત ઉચ્ચ પોલીસ અધિકારીઓ તાત્કાલિક કલેક્ટર કચેરી પહોંચ્યા હતા અને સમગ્ર કચેરીને પોતાના કબજામાં લીધી હતી. ઈમેલમાં કલેક્ટર કચેરીના અલગ અલગ સ્થળોએ છ બોમ્બ ફીટ કરવામાં આવ્યા હોવાની ગંભીર ધમકી આપવામાં આવી હોવાનું જાણવા મળ્યું છે.
બનાસકાંઠા કલેકટર કચેરીને ધમકી ભર્યો ઈમેલ મળ્યો
આ ધમકીના પગલે સલામતીના કારણોસર કલેક્ટર કચેરીમાંથી તમામ કર્મચારીઓ અને અધિકારીઓને તાત્કાલિક બહાર કાઢવામાં આવ્યા હતા. સાથે જ જનસેવા કેન્દ્ર, મામલતદાર કચેરી, પ્રાંત કચેરી અને કોર્ટ સહિત કલેક્ટર કચેરીના સમગ્ર પરિસરને ખાલી કરાવી દેવાયો હતો. પોલીસ દ્વારા કલેક્ટર કચેરીને ચારે બાજુથી ફરતે બંધી કરવામાં આવી હતી જેથી કોઈ પણ અનિચ્છનીય ઘટના ન બને.
બોમ્બ સ્કોડ અને ડોગ સ્ક્વોડ દ્વારા તપાસ
ધમકીની ગંભીરતાને ધ્યાનમાં રાખીને પોલીસે બોમ્બ સ્કોડ અને ડોગ સ્ક્વોડની મદદથી કલેક્ટર કચેરી અને આસપાસના વિસ્તારોમાં સઘન તપાસ હાથ ધરી હતી. દરેક રૂમ, ફાઇલ વિભાગ અને જાહેર સ્થળોની બારીકીથી ચકાસણી કરવામાં આવી હતી. હાલ પોલીસ સમગ્ર મામલે તપાસ કરી રહી છે અને ધમકી ભર્યો ઈમેલ કોણે અને કયા હેતુથી મોકલ્યો તેની તપાસ પણ શરૂ કરવામાં આવી છે. આ ઘટનાને લઈને કલેક્ટર કચેરી અને શહેરમાં થોડા સમય માટે ભયનો માહોલ સર્જાયો હતો.
