ગુજરાતની ગૌરવગાથા અમુલે ફરી એકવાર વિશ્વને ચોંકાવી દીધું છે. ICA વર્લ્ડ કોઓપરેટિવ મોનિટર 2025ના અહેવાલ મુજબ, ગુજરાત કોઓપરેટિવ મિલ્ક માર્કેટિંગ ફેડરેશન લિમિટેડ (GCMMF - અમુલ)એ માથાદીઠ GDPના આધારે વિશ્વની ટોચની સહકારી સંસ્થા તરીકે સ્થાન મેળવ્યું છે. આ સિદ્ધિ 3 નવેમ્બરે કતારના દોહામાં આયોજિત ICA CM-50 કોન્ફરન્સ દરમિયાન જાહેર કરવામાં આવી, જ્યાં 300 મોટી સહકારી સંસ્થાઓનું GDP-આધારિત મૂલ્યાંકન કરાયું હતું. અમુલે ભારતીય દિગ્ગજ IFFCOને પાછળ છોડીને આ પ્રતિષ્ઠિત ક્રમ હાંસલ કર્યો છે.
2025માં ભારતનું ગૌરવ
2025ને સંયુક્ત રાષ્ટ્રસંઘે આંતરરાષ્ટ્રીય સહકારી વર્ષ તરીકે જાહેર કર્યું છે. આ વિશેષ વર્ષમાં અમુલની આ સફળતા દેશના સહકારી ક્ષેત્ર માટે મોટો ગૌરવ છે. છેલ્લા કેટલાક વર્ષોથી અમુલ અને IFFCO વિશ્વ રેન્કિંગમાં ટોચ પર ઝળકી રહ્યા હતા, પરંતુ આ વખતે અમુલે નંબર વનનો તાજ પહેર્યો. સોશિયલ મીડિયા પર અમુલે ખુશી વ્યક્ત કરતાં લખ્યું: “અમને આનંદ છે કે ICA વર્લ્ડ કોઓપરેટિવ મોનિટર 2025માં અમુલને વિશ્વની નં.1 સહકારી તરીકે જાહેર કરાઈ છે!”
અમુલની સ્થાપના: મુશ્કેલીઓમાંથી ઉદ્ભવેલી સફળતા
GCMMFની સુવર્ણ જયંતિ: ફેબ્રુઆરી 2024માં 50 વર્ષ પૂર્ણ થયા.
શરૂઆત (1946-1974): ગુજરાતના 6 જિલ્લા (ખેડા, મહેસાણા, સાબરકાંઠા, બનાસકાંઠા, વડોદરા, સુરત)માં ડેરી સહકારી ચળવળ ખીલી. વેપારીઓના શોષણ સામે ખેડૂતોએ બળવો કર્યો.
1974માં સ્થાપના: 6 જિલ્લા દૂધ સંઘોના પ્રમુખો અને ડૉ. વર્ગીસ કુરિયનના નેતૃત્વમાં GCMMFની રચના.
ધ્યેય: પોતાનું માર્કેટિંગ નેટવર્ક.
આજે: 18 જિલ્લા દૂધ સંઘો, ₹90,000 કરોડથી વધુ ટર્નઓવર, 3.6 મિલિયન ખેડૂતો સાથે વિશ્વની સૌથી મોટી ડેરી સહકારી.
સફળતાનું રહસ્ય
ગામઠી સ્વાદ, પોષણ અને બજેટ
અમુલના MD જયેન મહેતા કહે છે: “અમારા 38% ગ્રાહકો નાના શહેરો અને ગામડાઓમાંથી છે જ્યાં વસ્તી 20,000થી ઓછી છે. અમે ફક્ત શહેરી બ્રાન્ડ નથી!” ભૂતપૂર્વ MD ડૉ. આર.એસ. સોઢી ઉમેરે છે: “લોકો સ્થાનિક પ્રોસેસ્ડ, સ્વાદિષ્ટ, પોષક અને સસ્તા ઉત્પાદનો પસંદ કરે છે. આ અમારી તાકાત છે.”અમુલની આ સફળતા દર્શાવે છે કે સહકારી મોડેલ દ્વારા ખેડૂતોની સમૃદ્ધિ અને ગ્રાહકોનો વિશ્વાસ કેવી રીતે વૈશ્વિક સ્તરે ચમકી શકે છે.
