Banaskantha News: જિલ્લાના ઉણ ગામે તાજેતરમાં બનેલી હિંસક પથ્થરમારાની ઘટનાને પગલે સમગ્ર પંથકમાં ભારેલા અગ્નિ જેવી સ્થિતિ સર્જાઈ છે. આ ગંભીર પરિસ્થિતિનો તાગ મેળવવા અને કાયદો-વ્યવસ્થા જાળવવા માટે રેન્જ આઈજી પરીક્ષિતા રાઠોડ જાતે ઘટના સ્થળે પહોંચ્યા હતા. તેમની સાથે બનાસકાંઠા અને વાવ-થરાદ જિલ્લાના ઉચ્ચ પોલીસ અધિકારીઓનો કાફલો પણ ખડેપગે તૈનાત રહ્યો હતો.
ઘટનાની વિગત અને પોલીસની કાર્યવાહી
ઉણ ગામે અચાનક ઉશ્કેરાયેલા ટોળા દ્વારા પથ્થરમારો કરવામાં આવતા અફરાતફરીનો માહોલ સર્જાયો હતો. આ હિંસામાં ફરજ પરના 4 પોલીસકર્મીઓ અને અન્ય 4 નાગરિકો મળી કુલ 8 લોકો ઈજાગ્રસ્ત થયા હોવાના અહેવાલ પ્રાપ્ત થયા છે. પરિસ્થિતિને વધુ વણસતી રોકવા અને ટોળાને વિખેરવા માટે પોલીસ દ્વારા ટીયર ગેસના સેલ છોડવાની ફરજ પડી હતી. હાલમાં ચુસ્ત પોલીસ બંદોબસ્ત વચ્ચે સ્થિતિ કાબુમાં હોવાનું જણાવાઈ રહ્યું છે.
રેન્જ આઈજીની પ્રતિક્રિયા અને કડક વલણ
ઘટના સ્થળની મુલાકાત લીધા બાદ રેન્જ આઈજી પરીક્ષિતા રાઠોડે મીડિયા સાથેની વાતચીતમાં જણાવ્યું હતું કે, "હિંસા આચરનારા તત્વો સામે કડક હાથે કામ લેવામાં આવશે. અત્યાર સુધીમાં અંદાજે ૩૫ જેટલા શંકાસ્પદ લોકોની અટકાયત કરવામાં આવી છે." તેમણે વધુમાં ઉમેર્યું કે સમગ્ર પરિસ્થિતિ પર પોલીસની બાજ નજર છે અને શાંતિ ભંગ કરનાર કોઈપણ વ્યક્તિને છોડવામાં આવશે નહીં.
પોલીસ તંત્ર એક્શન મોડમાં
બનાસકાંઠા અને વાવ-થરાદ જિલ્લા પોલીસ વડા દ્વારા સંયુક્ત રીતે ઓપરેશન હાથ ધરી પરિસ્થિતિને થાળે પાડવાના પ્રયાસો તેજ કરાયા છે. ગામ અને આસપાસના વિસ્તારોમાં સઘન પેટ્રોલિંગ શરૂ કરી દેવામાં આવ્યું છે. વીડિયો ફૂટેજ અને અન્ય પુરાવાઓના આધારે વધુ આરોપીઓની ઓળખ કરવાની પ્રક્રિયા ગતિમાં છે. હાલમાં સમગ્ર ઉણ ગામમાં પોલીસ છાવણીમાં ફેરવાઈ ગયું છે અને તંત્ર દ્વારા લોકોને શાંતિ જાળવવા અપીલ કરવામાં આવી છે.
