દિવાળીના તહેવાર દરમિયાન ગુજરાતના પ્રખ્યાત યાત્રાધામ અંબાજી ખાતે ભક્તિનો ઘોડાપૂર જોવા મળી રહ્યો છે. દિવાળી વેકેશનના કારણે રાજ્યભરના હજારો લોકો માતાજીના દર્શન માટે અંબાજી પહોંચ્યા છે. છેલ્લા કેટલાક દિવસોમાં પાંચ લાખથી વધુ શ્રદ્ધાળુઓએ માતા અંબાજીના દર્શન કર્યા હોવાનું અનુમાન છે. અંબાજી મંદિર પરિસર ભક્તોના "જય માતાજી" ના નાદોથી ગુંજી ઉઠ્યું છે અને સમગ્ર વિસ્તારમાં ધાર્મિક માહોલ છવાયો છે.
ભક્તોનું ઘોડાપૂર
ભક્તોની આટલી મોટી સંખ્યાને કારણે અંબાજી તરફ જતા માર્ગો પર ભારે ટ્રાફિક જામ જોવા મળી રહ્યો છે. ત્રણ કિલોમીટર સુધી વાહનોની લાંબી કતારો લાગી ગઈ છે. બસો, કાર અને બાઈકની લાઈનોને કારણે માર્ગોમાં ધીમે ધીમે વાહન વ્યવહાર થઈ રહ્યો છે. પોલીસ અને સ્થાનિક તંત્ર દ્વારા ટ્રાફિક નિયંત્રણ માટે ખાસ વ્યવસ્થા કરવામાં આવી છે જેથી યાત્રાળુઓને કોઈ મુશ્કેલી ન પડે.
અંબાજીથી માઉન્ટ આબુ રસ્તા પર ટ્રાફિકજામ
વેકેશન ચાલતું હોવાથી અંબાજીમાં યાત્રિકોનો પ્રવાહ અવિરત રીતે વધી રહ્યો છે. ઘણા ભક્તો માતાજીના દર્શન કર્યા બાદ નજીકના રાજસ્થાન રાજ્યમાં આવેલું પ્રસિદ્ધ પ્રવાસન સ્થળ માઉન્ટ આબુ તરફ પણ જઈ રહ્યા છે. જેના કારણે અંબાજીથી માઉન્ટ આબુ જતા માર્ગ પર પણ વાહનોનું “કીડીયારું” ઊભરાતું જોવા મળી રહ્યું છે.
શ્રદ્ધા, ભક્તિ અને ઉત્સાહનો અદભૂત સંગમ
આ રીતે દિવાળીના પાવન પ્રસંગે અંબાજી ધામમાં શ્રદ્ધા, ભક્તિ અને ઉત્સાહનો અદભૂત સંગમ જોવા મળી રહ્યો છે. ભક્તો માતાજીના દર્શનથી ધન્યતા અનુભવી રહ્યા છે અને સમગ્ર વિસ્તાર દિવાળીના તહેવારની જેમ જ પ્રકાશ અને ભક્તિથી ઝળહળી રહ્યો છે.
