અમદાવાદના નારણપુરા વિસ્તારમાં માનવતા શરમાવે તેવી ઘટના સામે આવી છે, જેમાં પાડોશમાં રહેતા યુવકે માત્ર 7 વર્ષીય બાળક સાથે દુષ્કર્મ આચર્યું હોવાની ફરિયાદ નોંધાઈ છે. આ બનાવે સમગ્ર વિસ્તારમાં ચકચાર મચાવી છે.
મળતી માહિતી અનુસાર, પીડિત બાળક તેની માતા અને પરિવાર સાથે રહેતો હતો. પરિવાર આર્થિક રીતે નબળો હોવાને કારણે માતા ઘરકામ કરીને જીવન ગુજારે છે. આરોપીએ બાળકને ફુગ્ગો અપાવવાનો બહાનો બનાવી ઘરે બોલાવ્યો હતો. ત્યારબાદ તેને પોતાના ઘરે લઈ જઈ તેની સાથે ગુદામાર્ગે દુષ્કર્મ આચર્યું હતું.
ઘટના બાદ બાળક રડતા-રડતા ઘરે પરત ફર્યો અને પરિવારને સમગ્ર વાત જણાવી. બાળકને દુખાવો થતો હોવાથી પ્રાથમિક સારવાર અપાઈ, પરંતુ સ્થિતિ સુધરતી ન હોવાથી તેને તાત્કાલિક હોસ્પિટલમાં દાખલ કરાયો. હોસ્પિટલ દ્વારા પોલીસને જાણ કરવામાં આવતા મામલો પ્રકાશમાં આવ્યો હતો.
નારણપુરા પોલીસે આ ઘટનાની ગંભીરતા સમજી તરત જ ફરિયાદ નોંધાવી અને POCSO Act તેમજ અન્ય સંબંધિત કલમો હેઠળ ગુનો દાખલ કર્યો. પોલીસે ઝડપી કાર્યવાહી કરતાં આરોપીને પકડી પાડ્યો છે.
પ્રાથમિક તપાસમાં સામે આવ્યું છે કે આરોપી એકલો રહેતો હતો અને મજૂરી કામ કરતો હતો. હાલ પોલીસ દ્વારા મેડિકલ તપાસ, ફોરેન્સિક પુરાવા (FSL) સહિત તમામ જરૂરી કાર્યવાહી હાથ ધરવામાં આવી રહી છે.
પોલીસે જણાવ્યું છે કે કેસમાં મજબૂત પુરાવા એકત્રિત કરી આરોપીને કડક સજા અપાવવા માટે પ્રયાસ કરવામાં આવશે. આ ઘટના બાળક સુરક્ષા અને સમાજમાં જાગૃતિ લાવવાની જરૂરિયાત પર ફરી એકવાર પ્રશ્ન ઉઠાવે છે.
