Gujarat Weather Forecast: ભરઉનાળે ગુજરાતમાં ફૂંકાયું વાવાઝોડું. મધરાત્રે અચાનક વધી ગઈ પવનની ગતિ અને બદલાઈ ગયો મૌસમનો મિજાજ. અંબાલાલ પટેલે જે કહ્યું હતું એવું જ થયું અને ફરી એકવાર સાચી પડી તેમની આગાહી. તેમણે આગાહી કરી હતી કે, ગુજરાતમાં વાવાઝોડું ફૂંકાશે અને પવનની ગતિ અચાનક વધી જશે. આ આગાહી મુજબ ગઈ કાલે સાંજથી વાતાવરણમાં પલટો આવવા લાગ્યો. રાત પડતા પડતા તો ગુજરાતના અનેક ભાગોમાં ધૂળની ડમરીઓ ઉડવા લાગી અને વાવાઝોડાએ અને જિલ્લાઓને હચમચાવ્યાં. મધરાત્રે અનેક જિલ્લાઓમાં ભારે પવન સાથે વરસાદ ખાબક્યો.
ગુજરાતના વાતાવરણમાં આજે અચાનક મોટો પલટો જોવા મળ્યો છે. વહેલી સવારથી જ રાજ્યના અનેક વિસ્તારોમાં જોરદાર પવન, ધૂળની આંધી અને ગાજવીજ સાથે વરસાદી માહોલ સર્જાયો છે. હવામાન વિભાગની આગાહી મુજબ આગામી બે દિવસ રાજ્ય માટે ભારે સાબિત થઈ શકે છે. અમદાવાદ સહિત ઉત્તર ગુજરાત અને કચ્છના વિસ્તારોમાં વહેલી સવારે જોરદાર પવન ફૂંકાયો હતો. 30થી 40 કિલોમીટર પ્રતિ કલાકની ઝડપે ફૂંકાતા પવનના કારણે ધૂળની ડમરીઓ ઉડી અને વિઝિબિલિટી ઘટી ગઈ. અનેક જગ્યાએ વૃક્ષો અને હોર્ડિંગ્સ ધરાશાયી થયા, જ્યારે કેટલાક વિસ્તારોમાં વીજ પુરવઠો ખોરવાયો.
બનાસકાંઠાના ધાનેરા, પાલનપુર, ડીસા અને કાંકરેજમાં વરસાદી ઝાપટાં સાથે તોફાની પવન જોવા મળ્યો. સાબરકાંઠા અને મહેસાણા જિલ્લામાં પણ મિનિ વાવાઝોડા જેવી પરિસ્થિતિ સર્જાઈ હતી. હિંમતનગર અને વિસનગરમાં ભારે પવનથી દુકાનોના શેડ ઉડી ગયા અને વીજળી ગુલ થઈ ગઈ. સુરેન્દ્રનગર જિલ્લામાં પણ રાત્રે વાતાવરણમાં અચાનક ફેરફાર આવ્યો હતો. ભારે પવન અને વરસાદી છાંટાં સાથે અંધારપટ જેવી સ્થિતિ સર્જાઈ હતી.
કેમ અચાનક બદલાઈ ગયું વાતાવરણ?
હવામાન વિભાગના જણાવ્યા મુજબ હાલ બે મુખ્ય સિસ્ટમ સક્રિય છે. ખાસ કરીને દક્ષિણ-પશ્ચિમ રાજસ્થાન વિસ્તારમાં અપર એર સર્ક્યુલેશન અને પશ્ચિમી પહાડી પ્રદેશોમાં ટ્રફ (Trough) આ સિસ્ટમને કારણે ગુજરાતમાં વાવાઝોડાની સ્થિતિ સર્જાઈ. આ બંને સિસ્ટમની સંયુક્ત અસરને કારણે ગુજરાત સહિત ઉત્તર અને મધ્ય ભારતમાં વરસાદી માહોલ સર્જાયો છે.
કયા જિલ્લામાં શું રહેશે અસર?
હવામાન વિભાગે 13 જિલ્લાઓમાં ખાસ ચેતવણી આપી છે:
ઉત્તર ગુજરાત: બનાસકાંઠા, સાબરકાંઠા અને મહેસાણામાં ગાજવીજ સાથે ભારે પવન અને વરસાદ
સૌરાષ્ટ્ર-કચ્છ: કચ્છ, જામનગર અને રાજકોટમાં ધૂળની આંધી સાથે હળવો વરસાદ
મધ્ય-દક્ષિણ ગુજરાત: અરવલ્લી, મહીસાગર, દાહોદ અને ડાંગમાં 20 માર્ચ સુધી માવઠું
તે ઉપરાંત સુરત, વડોદરા, નર્મદા, ભરૂચ, નવસારી, વલસાડ અને તાપી જિલ્લામાં પણ વરસાદ અને પવનની શક્યતા છે.
ખેડૂતો અને નાગરિકો માટે સૂચનોઃ
ખેતરમાં તૈયાર પાકને સુરક્ષિત રાખો અથવા ઢાંકી દો
ભારે પવન દરમિયાન ઝાડ, હોર્ડિંગ્સ અથવા નબળી ઇમારતોની નજીક ન ઉભા રહેવું
વીજળીના કડાકા દરમિયાન ઇલેક્ટ્રોનિક ઉપકરણોનો ઉપયોગ સાવચેતીપૂર્વક કરવો
અનાવશ્યક બહાર નીકળવાનું ટાળો
આગામી દિવસોની સ્થિતિઃ
20 માર્ચ સુધી ઉત્તર ગુજરાત અને કચ્છના સરહદી વિસ્તારોમાં ગાજવીજ સાથે હળવાથી મધ્યમ વરસાદ ચાલુ રહેવાની શક્યતા છે. હવામાન વિભાગે એલર્ટ જાહેર કરીને તંત્રને તૈયાર રહેવા સૂચના આપી છે. આ અચાનક બદલાયેલા વાતાવરણને ધ્યાનમાં રાખીને સાવચેતી રાખવી અત્યંત જરૂરી છે. આગામી દિવસોમાં હવામાનની સ્થિતિ પર નજર રાખવી અને સત્તાવાર સૂચનાઓનું પાલન કરવું અનિવાર્ય છે.
