Daman News: દમણમાં કેસિનો અને સ્લોટ મશીન શરૂ કરવાની આશા રાખતી ડેલ્ટા કોર્પ લિમિટેડને બોમ્બે હાઈકોર્ટમાંથી મોટો ઝટકો મળ્યો છે. કોર્ટે સ્પષ્ટ શબ્દોમાં કહ્યું છે કે હાલના કાયદા મુજબ દમણ અને દીવમાં સ્લોટ મશીન ચલાવવાની કોઈ જ કાનૂની મંજૂરી ઉપલબ્ધ નથી અને તે ગુનાની શ્રેણીમાં આવે છે. આ ચુકાદો માત્ર એક કંપની માટે નહીં, પરંતુ કેન્દ્રશાસિત પ્રદેશોમાં ગેમ્બલિંગ નીતિ અને કાનૂની અમલ અંગે પણ મહત્વપૂર્ણ સંદેશ આપે છે.
દમણ સ્થિત ફાઈવ-સ્ટાર હોટલ ‘ધ ડેલ્ટિન’માં ઇલેક્ટ્રોનિક એમ્યુઝમેન્ટ ગેમ્સ અને સ્લોટ મશીનો સ્થાપિત કરવા માટે લાયસન્સ માગતી ડેલ્ટા કોર્પ લિમિટેડની અરજીને બોમ્બે હાઈકોર્ટે ફગાવી દીધી છે. ૨૯ એપ્રિલ, ૨૦૨૬ના રોજ આપવામાં આવેલા આ મહત્વપૂર્ણ ચુકાદામાં કોર્ટે સ્પષ્ટ કર્યું કે અરજદારે જે કાયદાકીય જોગવાઈનો આધાર લીધો હતો તે દમણ અને દીવમાં ક્યારેય અમલમાં જ આવી નહોતી.
અમદાવાદના ચાંદખેડા ખીરા કેસમાં નવો વળાંક : અઢી મહિનાની બાળકી રાહાનાના મોત અંગે સામે આવ્યો PM રિપોર્ટ
કંપનીએ પોતાની અરજીમાં ‘ગોવા પબ્લિક ગેમ્બલિંગ (એમેન્ડમેન્ટ) એક્ટ, ૧૯૯૨’ની કલમ ૧૩Aનો હવાલો આપ્યો હતો. આ જોગવાઈ હેઠળ ગોવામાં કેટલીક શરતો સાથે ફાઈવ-સ્ટાર હોટલોમાં સ્લોટ મશીનો અને ઇલેક્ટ્રોનિક ગેમ્સને મંજૂરી આપવામાં આવી હતી. ડેલ્ટા કોર્પનું દલીલ હતું કે આ જોગવાઈ દમણ અને દીવમાં પણ લાગુ થવી જોઈએ અને તેથી તેમને લાયસન્સ આપવામાં આવે. પરંતુ કોર્ટે વિગતવાર કાનૂની ચર્ચા બાદ જણાવ્યું કે ૧૯૯૨નો આ સુધારો દમણ અને દીવ માટે ક્યારેય સત્તાવાર રીતે અમલમાં મૂકવામાં આવ્યો નહોતો. કેન્દ્ર સરકાર દ્વારા ગેઝેટમાં તેની અમલ તારીખ જાહેર ન થતા આ સુધારો માત્ર કાગળ પર જ રહ્યો હતો. પરિણામે, દમણ અને દીવમાં ગેમ્બલિંગ સંબંધિત જૂના કાયદા જ યથાવત રહ્યા.
કોર્ટનું મહત્વપૂર્ણ અવલોકન
ચુકાદામાં કોર્ટે નોંધ્યું કે હાલના અમલમાં રહેલા કાયદાઓ અનુસાર દમણ અને દીવમાં સ્લોટ મશીન ચલાવવું ગેરકાયદેસર છે. કોર્ટે કહ્યું કે જ્યારે કોઈ પ્રવૃત્તિ કાયદા મુજબ પ્રતિબંધિત હોય ત્યારે માત્ર વ્યાપારી હિતના આધારે તેની મંજૂરી આપવા માટે કોર્ટ કોઈ આદેશ આપી શકે નહીં. ન્યાયાધીશોએ સ્પષ્ટ કહ્યું કે કાયદો અમલમાં આવ્યો જ નથી તો તેના આધારે લાયસન્સની માંગણી ટકી શકતી નથી. કોર્ટે આ મુદ્દે પ્રશાસનની નીતિગત સત્તાને પણ માન્યતા આપી અને જણાવ્યું કે જાહેર હિતના પ્રશ્નોમાં પ્રશાસનનો અભિગમ મહત્વનો હોય છે. આ ચુકાદો એ દિશામાં પણ મહત્વપૂર્ણ માનવામાં આવી રહ્યો છે કે જેમાં કોર્ટે કાનૂની અમલની પ્રક્રિયાને ખૂબ ગંભીરતાથી લીધી છે. માત્ર કાયદો પસાર થવો પૂરતો નથી, પરંતુ તેની સત્તાવાર અમલ તારીખ જાહેર કરવી પણ એટલી જ જરૂરી છે.
“હું રાજીનામું નહીં આપું” : ચૂંટણીમાં હાર બાદ ચૂંટણી પંચ અને BJP પર ગંભીર આરોપ
૨૦૧૪નું જાહેરનામું કેમ બન્યું મહત્વપૂર્ણ?
કોર્ટના નિર્ણયમાં ૨૦૧૪માં દમણ અને દીવ પ્રશાસન દ્વારા લેવામાં આવેલા એક મહત્વપૂર્ણ નિર્ણયનો પણ ઉલ્લેખ કરવામાં આવ્યો. પ્રશાસને તે સમયે ગેમ્બલિંગ અને સ્લોટ મશીન સંબંધિત જાહેરનામું પાછું ખેંચી લીધું હતું. કોર્ટે કહ્યું કે આ પગલું દર્શાવે છે કે સ્થાનિક પ્રશાસન દમણમાં આવી પ્રવૃત્તિઓને જાહેર હિતમાં યોગ્ય માનતું નહોતું. એટલે કે, સરકારની નીતિ પોતે જ આવા મશીનો અને કેસિનો પ્રકારની પ્રવૃત્તિઓથી દૂર રહેવાની હતી. કાયદા નિષ્ણાતોના મતે, કોર્ટે પ્રશાસનની નીતિને મહત્વ આપીને એક સંદેશ આપ્યો છે કે ગેમ્બલિંગ જેવા સંવેદનશીલ મુદ્દાઓમાં સ્થાનિક પરિસ્થિતિ, સામાજિક અસર અને જાહેર હિતને પ્રાથમિકતા આપવામાં આવશે.
ડેલ્ટા કોર્પ માટે શું અર્થ થાય છે?
ડેલ્ટા કોર્પ ભારતની જાણીતી ગેમિંગ અને કેસિનો કંપનીઓમાંની એક છે અને ગોવામાં તેના અનેક કેસિનો ઓપરેશન્સ છે. દમણમાં ‘ધ ડેલ્ટિન’ હોટલ દ્વારા કંપની ટુરિઝમ અને ગેમિંગ આધારિત બિઝનેસને વિસ્તૃત કરવા માંગતી હતી. જો કોર્ટે મંજૂરી આપી હોત તો દમણમાં ગોવા જેવી ગેમિંગ પ્રવૃત્તિઓ માટે નવા દ્વાર ખુલ્યા હોત. પરંતુ હાલના ચુકાદા પછી દમણમાં કેસિનો આધારિત ગેમિંગ ઉદ્યોગ માટે અનિશ્ચિતતા વધી છે. વિશેષજ્ઞો માને છે કે આ નિર્ણય ભવિષ્યમાં અન્ય હોટલો અથવા ગેમિંગ કંપનીઓ માટે પણ માર્ગદર્શક બની શકે છે. કારણ કે કોર્ટે સ્પષ્ટ કરી દીધું છે કે હાલના કાયદામાં ફેરફાર વગર આવી મંજૂરી શક્ય નથી.
