પાદરા તાલુકાના એક ગામમાં ઈંટોના ભઠ્ઠામાં કામ કરતા પરપ્રાંતિય યુવક દ્વારા ત્યાં નજીક રહેતા પરિવારની યુવતી પર દુષ્કર્મ ગુજાર્યાનો ગંભીર અને ચકચારજનક બનાવ સામે આવ્યો છે. આરોપીએ ઘટનાની જાણ કોઈને કરશે તો જાનથી મારી નાખવાની ધમકી આપતા ભોગ બનનાર યુવતી ભયભીત બની ગઈ હતી, જેના કારણે ફરિયાદ મોડેથી પોલીસ મથકે નોંધાઈ હતી. હાલ પાદરા પોલીસે ફરિયાદના આધારે આરોપી વિરુદ્ધ ગુનો નોંધાવી વધુ તપાસ હાથ ધરી છે.
યુવતીનું મોઢું દબાવી બળજબરીથી...
પ્રાપ્ત વિગતો મુજબ ઉત્તર પ્રદેશના શિરમોરા ગામનો રહેવાસી અરુણ રામશંકર કશ્યપ પાદરા તાલુકાના એક ગામમાં આવેલ ઈંટોના ભઠ્ઠામાં કામ કરતો હતો. ભઠ્ઠા નજીક જ એક અન્ય પરિવાર પણ રહેતો અને ત્યાં કામ કરતો હતો. ભોગ બનનાર યુવતી કુદરતી હાજતે બહાર ગઈ હતી. તે સમયે આરોપીએ યુવતીને એકલી જોઈ તેનો પીછો કર્યો હતો. પરત ફરતી વખતે તેણે યુવતીનું મોઢું દબાવી બળજબરીથી ઈંટોના ભઠ્ઠાની ઓફિસમાં લઈ જઈ તેના પર બળાત્કાર ગુજાર્યો હોવાનો આક્ષેપ ફરિયાદમાં કરવામાં આવ્યો છે.
જાનથી મારી નાખવાની ધમકી આપતાં યુવતી ડરી ગઈ હતી
ઘટના બાદ આરોપીએ યુવતીને આ બાબત કોઈને જણાવશે તો જાનથી મારી નાખવાની ધમકી આપતાં યુવતી ડરી ગઈ હતી અને તાત્કાલિક કોઈને જાણ કરી શકી નહોતી. જોકે, બાદમાં હિંમત એકઠી કરીને યુવતીએ સમગ્ર ઘટનાની જાણ પરિવારજનોને કરી હતી. પરિવારજનો સાથે ચર્ચા કર્યા બાદ યુવતીના પિતાએ મોડેથી પાદરા પોલીસ મથકે ફરિયાદ નોંધાવી હતી. પોલીસે ફરિયાદના આધારે આરોપી અરુણ રામશંકર કશ્યપ વિરુદ્ધ બળાત્કાર, અયોગ્ય વર્તન અને ધમકી આપવાના ગંભીર આરોપો હેઠળ ગુનો નોંધ્યો છે. પોલીસ સૂત્રોના જણાવ્યા મુજબ કેસની તપાસ ઉચ્ચ અધિકારી દ્વારા હાથ ધરવામાં આવી રહી છે. ભોગ બનનાર યુવતીનું નિવેદન લેવામાં આવ્યું છે અને જરૂરી તબીબી તથા કાયદાકીય કાર્યવાહી કરવામાં આવી રહી છે. પાદરા પોલીસે જણાવ્યું છે કે સમગ્ર મામલે સંવેદનશીલતા રાખીને તપાસ આગળ ધપાવવામાં આવી રહી છે અને આરોપી વિરુદ્ધ કડક કાયદાકીય કાર્યવાહી કરવામાં આવશે. હાલ સમગ્ર ઘટનાએ પાદરા તાલુકામાં ભારે ચકચાર જગાવી છે
