Khambhat Rope Accident : ખંભાતના પતરીયાપુરા–નેજા માર્ગ પર એક ગંભીર અકસ્માતની ઘટના સામે આવી છે. આ માર્ગ પરથી બાઈક પર જઈ રહેલા યુવક સામે અચાનક દોરી આવી જતાં તેમને ગંભીર ઇજા પહોંચી હતી. દોરી ગળા અને ચહેરા પાસે આવતાં યુવકના નાકના ઉપરના ભાગે ગંભીર કાપ લાગ્યો હતો.
ઈજાગ્રસ્તને સારવાર અર્થે ખસેડ્યા
ઇજાગ્રસ્ત યુવકનું નામ પુનમભાઈ મઘજીભાઈ પરમાર (ઉંમર 23 વર્ષ) છે, જે ખંભાત તાલુકાના બાજીપુરા ગામના રહેવાસી છે. અકસ્માત બાદ તરત જ 108 એમ્બ્યુલન્સની મદદથી તેમને ખંભાત જનરલ હોસ્પિટલ ખાતે સારવાર માટે લઈ જવાયા હતા.
નાકના ઉપરના ભાગે 16 ટાંકા લેવામાં આવ્યા
હોસ્પિટલમાં ડોક્ટરો દ્વારા તેમની તાત્કાલિક સારવાર કરવામાં આવી હતી. નાકના ઉપરના ભાગે ગંભીર ઇજા થતાં તેમને કુલ 16 ટાંકા લેવામાં આવ્યા છે. હાલ તેમની તબિયત સ્થિર હોવાનું જાણવા મળ્યું છે અને તેઓ સારવાર હેઠળ છે. આ ઘટનાએ ફરી એકવાર ખુલ્લી દોરીઓ અને બેદરકારીના કારણે થતી જોખમી પરિસ્થિતિઓ તરફ ધ્યાન દોર્યું છે, જેમાં વાહનચાલકોને ખાસ સાવચેત રહેવાની જરૂરિયાત છે.
