વડોદરા શહેર નજીક હાંડોદ ગામ પાસેથી પસાર થતા દિલ્હી-મુંબઈ એક્સપ્રેસ-વે પર આજે એક હૃદયદ્રાવક અકસ્માત સર્જાયો હતો. સુરત તરફ જઈ રહેલી ઠંડા પાણીની બોટલો ભરેલી એક આઈશર ટ્રક આગળ જઈ રહેલા અન્ય એક ભારે વાહન પાછળ ધડાકાભેર અથડાતા ખેડા જિલ્લાના ચાલકનું ઘટનાસ્થળે જ કમકમાટીભર્યું મોત નીપજ્યું હતું. અકસ્માત એટલો ભયાનક હતો કે ટ્રકનું કેબિન પડીકું વળી ગયું હતું અને ચાલકનો મૃતદેહ કેબિનમાં જ ફસાઈ ગયો હતો.
કેબિન કાપીને મૃતદેહ બહાર કાઢવો પડ્યો
મળતી માહિતી મુજબ, ટક્કર એટલી જોરદાર હતી કે આઈશર ટ્રકનું કેબિન આગળની તરફ નમી ગયું હતું અને ડ્રાઈવરની બોડી લટકતી હાલતમાં જોવા મળી હતી. ઘટનાની જાણ થતા જ કરજણ ફાયર વિભાગની ટીમ તાત્કાલિક આધુનિક સાધનો સાથે ઘટનાસ્થળે દોડી ગઈ હતી. ફાયર ફાઈટરોએ અદ્યતન 'હોલમેટ્રો કટીંગ ટૂલ્સ'નો ઉપયોગ કરી દોઢ કલાકની ભારે જહેમત બાદ કેબિનના પતરાં કાપીને ડ્રાઈવરને બહાર કાઢ્યો હતો. જોકે, ગંભીર ઈજાઓના કારણે ડ્રાઈવરે ઘટનાસ્થળે જ દમ તોડી દીધો હતો.
ખેડાના સોખડા ગામના ચાલકનું મોત
પોલીસ તપાસમાં જાણવા મળ્યું છે કે મૃતક ડ્રાઈવરનું નામ ભરત હરમાનભાઈ પરમાર (ઉં.વ. 46) છે. તેઓ ખેડા જિલ્લાના માતર તાલુકાના સોખડા ગામના ઉગમણા ફળિયાના રહેવાસી હતા. વ્યવસાયે ડ્રાઈવર ભરતભાઈ પોતાની ટ્રક લઈને સુરત તરફ જઈ રહ્યા હતા ત્યારે આ કાળમુખો અકસ્માત નડ્યો હતો.
પોલીસ કાર્યવાહી
અકસ્માતને પગલે એક્સપ્રેસ-વે પર ટ્રાફિક જામના દ્રશ્યો સર્જાયા હતા. કરજણ પોલીસે ઘટનાસ્થળે પહોંચી મૃતદેહનો કબજો મેળવી પોસ્ટમોર્ટમ માટે હોસ્પિટલ ખસેડ્યો છે. પોલીસે અકસ્માતે મોતનો ગુનો નોંધી આગળની તપાસ હાથ ધરી છે. એક્સપ્રેસ-વે પર વધતા અકસ્માતોને લઈ ફરી એકવાર વાહનચાલકોની સુરક્ષા અને ગતિ મર્યાદા બાબતે ચર્ચાઓ જાગી છે.
