Ahmedabad Vishal Ahir : અમદાવાદ શહેર પોલીસની ક્રાઈમ બ્રાન્ચમાં ફરજ બજાવતા યુવાન વિશાલ આહીરે ‘ભાગીરથી રન’ અંતર્ગત હરિદ્વારથી જામનગર જિલ્લાના ખરેડી ગામ સુધીની આશરે 1400 કિલોમીટર લાંબી ઐતિહાસિક દોડ સફળતાપૂર્વક પૂર્ણ કરી છે. રાષ્ટ્રપ્રેમ, સામાજિક જાગૃતિ અને આધ્યાત્મિક ભાવનાનો અદભૂત સંગમ સર્જતી આ રિલે દોડ ગુજરાતના કુલ 35 યુવાનો દ્વારા પૂર્ણ કરવામાં આવી, જેમાં વિશાલ આહીરનો મહત્વપૂર્ણ અને પ્રેરણારૂપ ફાળો રહ્યો છે.
આ દોડ માત્ર 7 દિવસમાં નોન-સ્ટોપ રીતે પૂર્ણ કરી
27 ડિસેમ્બર 2025ના રોજ હરિદ્વારથી શરૂ થયેલી આ દોડ માત્ર 7 દિવસમાં નોન-સ્ટોપ રીતે પૂર્ણ કરવામાં આવી હતી. આ દરમિયાન ટીમે ઉત્તરાખંડ, ઉત્તર પ્રદેશ, હરિયાણા, રાજસ્થાન અને ગુજરાત એમ કુલ પાંચ રાજ્યોમાંથી પસાર થઈને જનજાગૃતિ ફેલાવી. દોડ દરમ્યાન વિવિધ શહેરો અને ગામોમાં યુવાનો દ્વારા રાષ્ટ્રપ્રેમ, સ્વદેશી અપનાવવાની ભાવના, વ્યસનમુક્તિ અને પર્યાવરણ સંરક્ષણ માટે વૃક્ષારોપણ જેવા મહત્વના સામાજિક સંદેશો લોકો સુધી પહોંચાડવામાં આવ્યા.
ભક્તિ અને સાહસનો અનોખો સંગમ
આ અભિયાનની સૌથી વિશેષ બાબત એ હતી કે ટીમ હરિદ્વારથી પવિત્ર ગંગાજળ સાથે લઈને આવી હતી. આ ગંગાજળને અંતે ખરેડી ગામ ખાતે ભગવાન શિવનો વિધિવત જળાભિષેક કરીને ભક્તિભાવથી અર્પણ કરવામાં આવ્યું. ભક્તિ અને સાહસના આ અનોખા સંગમે લોકોમાં ભારે પ્રશંસા અને ઉત્સાહ જગાવ્યો. ફરજ સાથે ફિટનેસ, શિસ્ત અને સમાજસેવાને જોડીને વિશાલ આહીર અને તેમની ટીમે સાબિત કર્યું કે યુવાનોની એકતા, સંકલ્પશક્તિ અને સમર્પણથી સમાજમાં સકારાત્મક પરિવર્તન શક્ય છે. ‘ભાગીરથી રન’ માત્ર એક દોડ નહીં પરંતુ રાષ્ટ્ર, સમાજ અને સંસ્કૃતિ માટેની પ્રેરણાત્મક યાત્રા બની છે, જે અનેક યુવાનોને નવી દિશા આપશે.
