Surat Police Operations : સુરત શહેરના ડ્રીમ સિટી વિસ્તારમાં ઉતરાયણ પર્વની અનોખી અને સંવેદનશીલ રીતે ઉજવણી કરવામાં આવી હતી. ડ્રીમ સિટી પોલીસ દ્વારા ખજોદ ડિસ્પોઝલ સાઇટ પર મજૂરી કામ કરતા શ્રમજીવીઓના બાળકોના જીવનમાં ખુશીઓ લાવવાના હેતુથી વિશેષ કાર્યક્રમનું આયોજન કરવામાં આવ્યું હતું. રોજબરોજ કઠિન પરિસ્થિતિઓમાં જીવન પસાર કરતા આ બાળકો માટે ઉત્તરાયણનો તહેવાર યાદગાર બની રહ્યો હતો.
પોલીસની સરહાનીય કામગીરી
ગૃહ રાજ્યમંત્રી હર્ષ સંઘવીના જન્મદિવસને ધ્યાનમાં રાખીને, ડ્રીમ સિટી પોલીસ મથકના પોલીસ ઇન્સ્પેક્ટર એ.પી. ચૌધરી અને તેમની ટીમે આ સેવા કાર્ય હાથ ધર્યું હતું. આ દરમિયાન વિસ્તારમાં રહેતા બાળકો અને શ્રમિકોને પતંગ, ફિરકી, તલના લાડુ તેમજ ઠંડીથી બચાવ માટે ધાબળાનું વિતરણ કરવામાં આવ્યું હતું. કાર્યક્રમ દરમિયાન પોલીસ ઇન્સ્પેક્ટર એ.પી. ચૌધરી પોતે બાળકો સાથે પતંગ ચગાવતા નજરે પડ્યા હતા. ખાખી વર્દીની પાછળ રહેલી માનવીય સંવેદનશીલતા અને લાગણીસભર અભિગમ જોઈને સ્થાનિક લોકો પણ પોલીસની આ કામગીરીને ખુલ્લા દિલે બિરદાવતા જોવા મળ્યા હતા.
પોલીસે પતંગ આપ્યા!
પતંગ ઉડાવતી વખતે બાળકોના ચહેરા પર દેખાતો નિર્દોષ અને અનોખો આનંદ સમગ્ર વાતાવરણને ભાવુક બનાવી ગયો હતો. બાળકોની ખુશી જોઈ હાજર પોલીસ કર્મચારીઓના ચહેરા પર પણ સ્મિત છવાઈ ગયું હતું. આ રીતે ડ્રીમ સિટી પોલીસ દ્વારા ઉત્તરાયણ પર્વને સેવામાં અને સંવેદનામાં રૂપાંતરિત કરી એક માનવતાભર્યો સંદેશ આપ્યો હતો.
