Surat News : દેશભરની પોલીસ માટે છેલ્લા બે દાયકાથી માથાનો દુખાવો બનેલો કુખ્યાત ગુનેગાર ‘રહેમાન ડકેત’ આખરે સુરત ક્રાઇમ બ્રાન્ચના ગુપ્ત ઓપરેશનમાં ઝડપાયો છે. સુરતના લાલગેટ વિસ્તારમાંથી કોઈ પણ પ્રકારના ગોળીબાર વિના આ આંતરરાજ્ય ગુનેગારને દબોચવામાં આવ્યો છે. તેની ધરપકડથી અનેક વર્ષોથી વણઉકેલાયેલા ગુનાઓના રહસ્યો ખુલવાની શરૂઆત થઈ હોવાનું પોલીસે જણાવ્યું છે.
14 રાજ્યોમાં ગુનાખોરીનો નેટવર્ક ઝડપાયો
પકડાયેલો આરોપી મધ્યપ્રદેશના ભોપાલનો રહેવાસી આબીદ અલી ઉર્ફે રાજુ ઉર્ફે રહેમાન ડકેત છે. તે ‘ઇરાની ડેરા’ તરીકે ઓળખાતી કુખ્યાત ગેંગનો માસ્ટરમાઇન્ડ તેમજ 14 રાજ્યોમાં ફેલાયેલા ગુનાખોરીના નેટવર્કનો સરદાર હોવાનું સામે આવ્યું છે. રાજુ ઇરાની છેલ્લા 20 વર્ષથી વધુ સમયથી પોલીસને ચકમા આપી રહ્યો હતો.
ગંભીર ગુનાઓમાં સંડોવાયેલો છે
આ ડકેત નકલી CBI અધિકારી બની લૂંટ કરવી, સાધુ-બાવાના વેશમાં લોકોને છેતરવું, જીવતા સળગાવવાના પ્રયાસ, તેમજ MCOCA જેવા કડક કાયદા હેઠળના અનેક ગંભીર ગુનાઓમાં સંડોવાયેલો છે. ભોપાલના ‘ઇરાની ડેરા’માંથી તે અલગ-અલગ રાજ્યોમાં પોતાની ગેંગોને ઓપરેટ કરતો હતો. ક્રાઇમ બ્રાન્ચના જણાવ્યા મુજબ તે અલગ-અલગ છ ગેંગનો સૂત્રધાર અને ગેંગ લીડર હતો.
ગુનાખોરીના પૈસાથી ઉંચા શોખ પૂરા કરતો
લૂંટ અને ગુનાખોરીથી કમાયેલા પૈસાથી રાજુ ઇરાની લક્ઝરી કારો, મોંઘી સ્પોર્ટ્સ બાઇક અને અરબી ઘોડા જેવા શોખ પૂરા કરતો હતો. ઘોડાથી લઈને લક્ઝરી કાર સુધીના તેના શોખ ગુનાખોરીથી કમાયેલી કમાણીની સાક્ષી આપે છે.
DCP ભાવેશ રોઝીયાએ શું કહ્યું?
ક્રાઇમ બ્રાન્ચના DCP ભાવેશ રોઝીયાએ જણાવ્યું હતું કે મધ્યપ્રદેશના ભોપાલનો રહેવાસી આબીદ અલી ઉર્ફે રાજુ ઇરાની સુરતને પોતાનું નવું ટાર્ગેટ બનાવવા આવ્યો હોવાની ચોક્કસ બાતમી મળી હતી. આ માહિતીના આધારે સુરત ક્રાઇમ બ્રાન્ચે ગુપ્ત રીતે લાલગેટ વિસ્તારમાંથી તેની ધરપકડ કરી હતી. પોલીસના જણાવ્યા અનુસાર, આ ધરપકડ સાથે અનેક વર્ષોથી અટવાયેલા અને વણઉકેલાયેલા ગુનાઓના રહસ્યો બહાર આવવાની શક્યતા છે. સુરત ક્રાઇમ બ્રાન્ચની આ સફળ કાર્યવાહીએ દેશભરની પોલીસને મોટી રાહત આપી છે અને ગુનાખોરીના મોટા નેટવર્ક પર કડક પ્રહાર કર્યો છે.
