ગાંધીનગર: વર્તમાન સમયમાં ડિજિટલ પ્લેટફોર્મના વધતા ઉપયોગ સાથે સાયબર ગુનાઓ પણ ચિંતાજનક રીતે વધી રહ્યા છે. ખાસ કરીને શેરબજાર અને ઓનલાઈન ઇન્વેસ્ટમેન્ટના નામે સામાન્ય નાગરિકોને લલચાવી મોટી રકમ પડાવવાના બનાવો સતત સામે આવી રહ્યા છે. આવા જ એક મોટા ઇન્વેસ્ટમેન્ટ ફ્રોડના કેસમાં ગુજરાત સીઆઈડી ક્રાઈમના સાયબર સેન્ટર ઓફ એક્સીલન્સે મહત્વની સફળતા હાંસલ કરી છે. ગાંધીનગર સ્થિત સાયબર સેન્ટર ઓફ એક્સીલન્સે કરોડોના ઇન્વેસ્ટમેન્ટ ફ્રોડમાં સંડોવાયેલા બે આરોપીઓને ઉંઝા ખાતેથી ઝડપી પાડ્યા છે. આ ગેંગ વોટ્સએપ અને ખોટી વેબસાઈટ મારફતે લોકોને શેરબજારમાં રોકાણ કરાવવાની લાલચ આપી લાખો નહીં પરંતુ કરોડોની છેતરપિંડી કરતી હોવાનું તપાસમાં ખુલ્યું છે.
કેવી રીતે થયો ઇન્વેસ્ટમેન્ટ ફ્રોડ?
બે મહિના અગાઉ સાયબર સેન્ટર ઓફ એક્સીલન્સ, ગાંધીનગર ખાતે એક ફરિયાદ નોંધાઈ હતી. ફરિયાદ અનુસાર, અજાણ્યા ઈસમોએ વોટ્સએપ મારફતે સંપર્ક કરી શેરબજારમાં રોકાણ માટે નાણાકીય સેવા આપતી કંપની FINALTO ની ખોટી વેબસાઈટની લિંક મોકલી હતી.
ફરિયાદીને શરૂઆતમાં 500 ડોલરનું રોકાણ કરાવવામાં આવ્યું હતું અને તેની સામે 101 ડોલર નફો વર્ચ્યુઅલ વોલેટમાં બતાવી વિશ્વાસ બેસાડવામાં આવ્યો. બાદમાં રૂ. 43,500 ની વિથડ્રોઅલ પણ કરાવવામાં આવતા ફરીયાદી વધુ વિશ્વાસમાં આવ્યો. ત્યારબાદ અલગ-અલગ ચાર્જ અને રોકાણના નામે 7 ઓગસ્ટ 2025 થી 7 ઓક્ટોબર 2025 દરમિયાન મોટી રકમ પડાવવામાં આવી હતી.
કુલ આટલાની કરી છેતરપિંડી
આ સમગ્ર સમયગાળા દરમિયાન આરોપીઓએ કુલ રૂ. 26,66,66,000/- ની રકમ પડાવી લીધી હોવાનું તપાસમાં સામે આવ્યું છે. આ રકમ અલગ-અલગ બેંક ખાતાઓમાં જમા કરાવી ચેક દ્વારા ઉપાડી આંતરરાજ્ય તથા આંતરરાષ્ટ્રીય સાયબર ગુનાહિત નેટવર્ક સુધી પહોંચાડવામાં આવતી હતી.
મોબાઈલ તપાસમાં ચોંકાવનારા ખુલાસા
આ મામલે સાયબર સેન્ટર ઓફ એક્સીલન્સની ટીમે ઉંઝા ખાતેથી બે આરોપીઓને ઝડપી પાડ્યા છે, જેમાં રાજેશકુમાર ઉર્ફે કપિલ પ્રહલાદભાઈ ચૌધરી (ઉંમર 34), રહેવાસી આનંદપુરા–ઉનાવા, તા. ઉંઝા, જી. મહેસાણા, જે દ્વારકેશ ટ્રેડિંગના પ્રોપરાઈટર છે અને જેમના TMB બેંક એકાઉન્ટમાં રૂ. 1.27 કરોડ જેટલી ફ્રોડની રકમ જમા થયેલી હોવાનું તપાસમાં સામે આવ્યું છે, તેમજ ધમેન્દ્રકુમાર હરદભાઈ રાવલ (ઉંમર 35), રહેવાસી નાનાઘર, ઉનાવા, તા. ઉંઝા, જી. મહેસાણા, જે S S ENTERPRISEના પ્રોપરાઈટર છે અને જેમના બેંક એકાઉન્ટમાં રૂ. 63.41 લાખ જેટલી ફ્રોડની રકમના વ્યવહારો નોંધાયા હોવાનું જાણવા મળ્યું છે. આરોપીઓના મોબાઈલ તપાસતા કુલ 12 અલગ-અલગ બેંક એકાઉન્ટની માહિતી મળી આવી છે. NCCRP પોર્ટલ પર તપાસ કરતાં આ એકાઉન્ટ સામે 128થી વધુ ફરિયાદો/એફઆઈઆર નોંધાયેલી હોવાનું સામે આવ્યું છે, જેમાં કુલ રકમ આશરે રૂ.87 કરોડથી વધુ હોવાનું જાણવા મળ્યું છે.
શું હતી મોડસ ઓપરેન્ડી?
આરોપીઓ આર્થિક લાભ મેળવવા માટે પોતાના અથવા અન્ય લોકોના નામે બેંક એકાઉન્ટ ખોલાવતા. તેમાં સાયબર ફ્રોડની રકમ જમા થાય છે તેની જાણ હોવા છતાં, આ નાણાં રોકડમાં ફેરવી એજન્ટો અને હવાલા મારફતે આંતરરાજ્ય અને આંતરરાષ્ટ્રીય સાયબર ગુનાહિત સિન્ડિકેટ સુધી પહોંચાડવામાં આવતાં. બદલામાં આરોપીઓ કમિશન મેળવતા હતા. મુખ્યત્વે Investment Fraud ની પદ્ધતિ અપનાવવામાં આવી હતી. હાલ પોલીસે 2 મોબાઈલ ફોન અને 2 બેંક ચેકબુક સાથે આરોપીઓની ધરપકડ કરી કાર્યવાહી હાથધરી હતી.
