અમરેલી જિલ્લામાં ખાંભા તાલુકાના હનુમાનપુર ગામમાં દીપડાના હુમલાની ચોંકાવનારી ઘટના સામે આવી છે, જેમાં ખેત મજૂર પરિવારના બે વર્ષના બાળક પર દીપડાએ હુમલો કરતા વિસ્તારમાં ભયનો માહોલ સર્જાયો છે. પ્રાપ્ત માહિતી મુજબ, હનુમાનપુર ખાતે રમણિકભાઈ બોડાની વાડીમાં ખેત મજૂરી કરતા પરિવારનો બે વર્ષનો બાળક ઇશ્વર પરમાર ઓસરીના આંગણે રમી રહ્યો હતો. તે સમયે અચાનક દીપડો આવી પહોંચ્યો અને બાળકને ઉઠાવીને ભાગી ગયો હતો.
દીપડો બાળકને થોડે દૂર મૂકીને નાસી છૂટ્યો
આ ઘટનાને જોઈ પરિવારજનો અને આસપાસના લોકોએ જોરદાર હાકલા-પડકારા કર્યા હતા, જેથી દીપડો બાળકને થોડે દૂર મૂકીને નાસી છૂટ્યો હતો. દીપડાના હુમલામાં બાળકને માથાના ભાગે ઇજાઓ પહોંચી હતી. ઘટના બાદ તાત્કાલિક 108 એમ્બ્યુલન્સ બોલાવી બાળકને સારવાર અર્થે ખાંભા હોસ્પિટલમાં ખસેડવામાં આવ્યો હતો. હાલ બાળકની સારવાર ચાલી રહી છે.
દીપડાને પકડવા વન વિભાગે કાર્યવાહી હાથધરી
આ ઘટનાની જાણ થતાં વનવિભાગ પણ હરકતમાં આવ્યું છે. દીપડાને પકડવા માટે વનવિભાગ દ્વારા આસપાસના વિસ્તારમાં પાંજરા ગોઠવવામાં આવ્યા છે. સાથે જ ગ્રામજનોને સતર્ક રહેવા અને બાળકોને એકલા ન છોડવા સૂચનાઓ આપવામાં આવી છે. આ ઘટનાથી સમગ્ર વિસ્તારમાં ભય અને ચિંતાનો માહોલ ફેલાયો છે.
