ICC Women's World Cup 2025: મંગળવારથી વર્લ્ડ કપની 13મી આવૃત્તિ શરૂ થઈ ગઈ છે. ભારત અને શ્રીલંકા વચ્ચે પ્રથમ મેચ રમાઈ હતી, જે આસામના ગુવાહાટીના ACA સ્ટેડિયમમાં રમાઈ હતી. આ મેચમાં એક અનોખો રેકોર્ડ બન્યો પણ આ રેકોર્ડ કોઈ ટીમ કે ખેલાડી દ્વારા નહીં, પરંતુ દર્શકો દ્વારા બનાવવામાં આવ્યો હતો.
દર્શકોનો રેકોર્ડ શું છે?
આસામના ગુવાહાટીના ACA સ્ટેડિયમમાં રમાયેલી આ મેચમાં 22,843 દર્શકોએ હાજરી આપી હતી. આ કોઈપણ મહિલા વર્લ્ડ કપની સૌથી વધુ હાજરી ધરાવતી ગ્રુપ સ્ટેજ મેચનો રેકોર્ડ છે. આ પહેલા સૌથી વધુ હાજરી ધરાવતી વર્લ્ડ કપ ગ્રુપ સ્ટેજ મેચ ગયા વર્ષે ICC મહિલા T20 વર્લ્ડ કપ 2024 માં ભારત અને પાકિસ્તાન વચ્ચે રમાઈ હતી. સ્ટેડિયમમાં 15,935 દર્શકો હાજર રહ્યા હતા. આ સિદ્ધિ આ પ્રતિષ્ઠિત ટુર્નામેન્ટનો નવીનતમ રેકોર્ડ છે.
સચિન તેંડુલકરે મહિલા વર્લ્ડ કપમાં બનેલ રેકોર્ડ અંગે શું કહ્યું?
સચિન તેંડુલકરે ICC માટેના પોતાના કોલમમાં કહ્યું,"છેલ્લા કેટલાક વર્ષોમાં થયેલી પ્રગતિની હું પ્રશંસા કરું છું. મહિલા પ્રીમિયર લીગ એક ગેમ-ચેન્જરથી ઓછી રહી નથી. તેણે એવું પ્લેટફોર્મ, દૃશ્યતા અને નાણાકીય સુરક્ષા પ્રદાન કરી છે જેનું મહિલા ક્રિકેટરોની પેઢીઓ ફક્ત સ્વપ્ન જ જોઈ શકે છે. આનો મોટો શ્રેય જય શાહને જાય છે, જેમણે BCCI સચિવ તરીકેના તેમના કાર્યકાળ દરમિયાન પુરુષો અને સ્ત્રીઓ માટે સમાન મેચ ફી કરી હતી અને WPL નો પાયો નાખ્યો હતો. આ પગલાં કાગળ પર વહીવટી લાગે છે, પરંતુ વાસ્તવમાં, તે જીવન બદલી નાખે છે."
ભારતનો આગામી મેચ કઈ ટીમ સામે?
મહિલા વનડે વર્લ્ડ કપ 2025 ની બીજી મેચ આજે એટલે કે, 1 ઓક્ટોબરે ઓસ્ટ્રેલિયા અને ન્યુઝીલેન્ડ વચ્ચે રમાવાની છે. હરમનપ્રીત કૌર અને મહિલા ટીમની આવનારી મેચ રવિવાર, 5 ઓક્ટોબરના રોજ પાકિસ્તાન સામે છે. આ મેચ કોલંબોના આર. પ્રેમદાસા સ્ટેડિયમ ખાતે રમાશે.
