The Indian Team Is Celebrating Without The Trophy: પાકિસ્તાન સામે એશિયા કપ 2025 ની ફાઇનલ મેચ જીત્યા પછી, ભારતીય ટીમે એશિયન ક્રિકેટ કાઉન્સિલ (ACC) ના પ્રમુખ મોહસીન નકવી પાસેથી ટ્રોફી સ્વીકારવાનો ઇનકાર કર્યો હતો. ત્યારબાદ, ભારતીય ટીમને અન્ય કોઈ અધિકારી પાસેથી ટ્રોફી સ્વીકારવાની મંજૂરી આપવામાં આવી ન હતી, જેના કારણે ભારતીય ખેલાડીઓ ટ્રોફી વિના ઉજવણી કરવા લાગ્યા. ભારતીય કેપ્ટન સૂર્યકુમાર યાદવ આનાથી નારાજ દેખાયા.
ટીમના ખેલાડીઓ અને સપોર્ટ સ્ટાફ ટ્રોફી સમાન
ટાઇટલ જીત્યા બાદ પ્રેસ કોન્ફરન્સમાં સૂર્યકુમાર યાદવે કહ્યું, "જ્યારથી હું ક્રિકેટ રમી રહ્યો છું, ત્યારથી મેં પહેલી વાર જોયું છે કે ચેમ્પિયન ટીમને ટ્રોફી આપવામાં આવી નથી. અમે ખૂબ મહેનત કરીને આ ટુર્નામેન્ટ જીતી છે. અમે તેના લાયક હતા. હું આનાથી વધુ કંઈ કહી શકતો નથી. મારા માટે ટ્રોફી તો મારી ટીમના 14 ખેલાડીઓ અને તમામ સપોર્ટ સ્ટાફ જ વાસ્તવિક ટ્રોફી છે." જ્યારે સૂર્યકુમાર યાદવને પૂછવામાં આવ્યું કે, શું ભારતીય ક્રિકેટ કંટ્રોલ બોર્ડ (BCCI) એ ACC ને કોઈ સત્તાવાર ઇ-મેઇલ મોકલ્યો છે જેમાં કહેવામાં આવ્યું છે કે, જો ભારતીય ટીમ ટુર્નામેન્ટ જીતે છે, તો તે નકવી પાસેથી ટ્રોફી પ્રાપ્ત કરશે નહીં, ત્યારે સૂર્યાએ કહ્યું, "અમે આ નિર્ણય મેદાન પર જ લીધો હતો. અમને કોઈ સૂચના મળી ન હતી."
પાકિસ્તાનની ટીમનું પ્રદર્શન
રવિવારે દુબઈ ઈન્ટરનેશનલ ક્રિકેટ સ્ટેડિયમમાં રમાયેલી ફાઇનલમાં ભારતીય ટીમે પહેલા બોલિંગનો નિર્ણય લીધો. ટોસ હારીને પ્રથમ બેટિંગ કરવા આવેલ પાકિસ્તાનની ટીમ 19.1 ઓવરમાં 146 રનમાં ઓલઆઉટ થઈ ગઈ હતી. ઓપનરો સાહિબજાદા ફરહાન અને ફખર ઝમાને પ્રથમ વિકેટ માટે 84 રન ફટકાર્યા હતા. સાહિબજાદાએ 57 રન બનાવ્યા હતા, જ્યારે ફખરે 46 રન ફટકાર્યા, પરંતુ પાકિસ્તાની ટીમ તેમની શાનદાર શરૂઆતનો લાભ લેવામાં નિષ્ફળ રહી હતી.
ભારતીય ટીમનું પ્રદર્શન
ભારત તરફથી કુલદીપ યાદવે સૌથી વધુ ચાર વિકેટ લીધી, જ્યારે જસપ્રીત બુમરાહ, વરુણ ચક્રવર્તી અને અક્ષર પટેલે બે-બે વિકેટ લીધી. જવાબમાં ભારતે 19.4 ઓવરમાં મેચ જીતી લીધી. તિલક વર્માએ અણનમ 69 રન બનાવ્યા, જ્યારે શિવમ દુબેએ 33 રન બનાવ્યા.
