દુષ્કર્મના હચમચાવતા આંકડા : 3 વર્ષમાં ગુજરાતમાં 8 હજારથી વધુ કેસ

ગુજરાતમાં છેલ્લા ત્રણ વર્ષ દરમિયાન દુષ્કર્મના કેસોમાં ચોંકાવનારો વધારો નોંધાયો છે. તાજેતરમાં યોજાયેલા વિધાનસભા સત્રમાં રાજ્ય સરકારે આપેલી માહિતી અનુસાર, જૂન 2022થી મે 2025 વચ્ચે કુલ 8,849 દુષ્કર્મના કેસ નોંધાયા છે, એટલે કે રાજ્યમાં દરરોજ સરેરાશ આઠ મહિલાઓ પર શારીરિક શોષણ થાય છે.

સરકારી આંકડા મુજબ, આ કેસોમાંથી 60 ટકા (5,330) કેસ ગ્રામીણ વિસ્તારોમાં જ્યારે 40 ટકા (3,519) કેસ શહેરી વિસ્તારોમાં નોંધાયા છે.

ફક્ત 3% આરોપીઓ દોષી ઠર્યા, 3821માંથી 97ને જ સજા

એનસીઆરબી (National Crime Records Bureau)ના તાજેતરના આંકડા મુજબ, 2018થી 2022 દરમ્યાન દુષ્કર્મના કેસમાં કુલ 3,821 આરોપીઓની ધરપકડ થઈ, પરંતુ માત્ર 97 આરોપીઓને જ દોષી ઠરાવવામાં આવ્યા — એટલે કે દોષી ઠરાવાનો દર 3%થી પણ ઓછો રહ્યો.

કુલ 2,766 કેસમાંથી 2,572 કેસોમાં ચાર્જશીટ દાખલ કરવામાં આવી હતી, પરંતુ માત્ર 708 કેસોમાં જ ટ્રાયલ પૂર્ણ થયું. અંતે, ફક્ત 79 કેસોમાં ચુકાદો આવ્યો — જે ન્યાયિક પ્રક્રિયાની ધીમી ગતિને પણ ઉજાગર કરે છે.

હત્યા અને અન્ય ગુનાઓમાં પણ વધારો

એ જ સમયગાળા દરમિયાન, રાજ્યમાં 2,882 હત્યાના કિસ્સા નોંધાયા છે — એટલે કે દરરોજ સરેરાશ 2 થી 3 હત્યાના બનાવો બન્યા છે.

તે ઉપરાંત, દારૂ, બિયર અને વિદેશી દારૂ સંબંધિત 6.20 લાખ કેસો નોંધાયા હતા.

કુલ મળીને, મુખ્ય આઠ પ્રકારના ગુનાઓ (દુષ્કર્મ, છેડતી, હત્યા, છેતરપિંડી, લૂંટ, જુગાર, દારૂ અને નશીલા પદાર્થો)ની સંખ્યા 2.25 લાખથી વધીને 2.30 લાખ સુધી પહોંચી ગઈ છે.

225 તાલુકામાં નોંધાયા દુષ્કર્મના કેસ

રાજ્યના 225 તાલુકાઓમાં, છેલ્લા ત્રણ વર્ષ દરમિયાન ઓછામાં ઓછો એક દુષ્કર્મનો કેસ નોંધાયો છે.
શહેરી વિસ્તારોમાં 33 જિલ્લાનાં મુખ્ય શહેરો સૌથી વધુ અસરગ્રસ્ત રહ્યા છે.

દારૂ સંબંધિત ગુનાઓમાં સૌથી વધુ 61,000 કેસ સુરતમાં નોંધાયા, જ્યારે છેડતીના 3,379 અને છેતરપિંડીના 6,832 કેસો પણ નોંધાયા હતા.

7,953 આરોપીઓ હજી પણ ફરાર

આંકડાઓ દર્શાવે છે કે જુદા જુદા ગંભીર ગુનાઓમાં કુલ 7,953 આરોપીઓ હજી પણ પોલીસ પકડથી દૂર છે.
કાયદા વ્યવસ્થાની અસરકારકતા અંગે પ્રશ્નો ઊભા થતાં, રાજ્ય સરકારે પોલીસ અને ન્યાયિક પ્રક્રિયાને વધુ ઝડપી બનાવવા માટે સંકેત આપ્યા છે.