Gandhinagar Collector Office Threat : ગુજરાતમાં ધમકીનો સિલસિલો યથાવત જોવા મળી રહ્યો છે. સ્કૂલ, અરપોર્ટ બાદ કોર્ટ અને હવે ગાંધીનગર કલેક્ટર કચેરીને બોમ્બથી ઉડાવી દેવાની ધમકી મળી છે. ગાંધીનગર સ્થિત કલેક્ટર કચેરીને બોમ્બથી ઉડાવી દેવાની ધમકી મળતા આજે ભારે અફરાતફરીનો માહોલ સર્જાયો હતો. ધમકી મળતાની સાથે જ તંત્ર દ્વારા તાત્કાલિક પગલાં લેવામાં આવ્યા હતા અને સુરક્ષાને ધ્યાનમાં રાખીને સમગ્ર કલેક્ટર કચેરી ખાલી કરાવાઈ હતી. કચેરીમાં હાજર તમામ કર્મચારીઓ અને અધિકારીઓને બહાર કાઢવામાં આવ્યા હતા, જ્યારે કચેરીએ આવતા અન્ય કર્મચારીઓ અને નાગરિકોને અંદર પ્રવેશ કરતા અટકાવવામાં આવ્યા હતા.
કલેક્ટર કચેરીનો એન્ટ્રી ગેટ કરાયો બંધ
સાવચેતીના ભાગરૂપે કલેક્ટર કચેરીનો મુખ્ય એન્ટ્રી ગેટ બંધ કરી દેવામાં આવ્યો હતો અને આસપાસના વિસ્તારમાં પોલીસ બંદોબસ્ત ગોઠવવામાં આવ્યો હતો. ઘટનાની જાણ થતાં જ બોમ્બ સ્ક્વોડ તાત્કાલિક સ્થળ પર પહોંચી ગઈ હતી અને ડોગ સ્ક્વોડ સાથે મળીને સમગ્ર કચેરી પરિસરમાં સઘન તપાસ શરૂ કરવામાં આવી હતી. ઓફિસના દરેક રૂમ, દસ્તાવેજ વિભાગ, પાર્કિંગ વિસ્તાર સહિત તમામ સંવેદનશીલ સ્થળોની બારીક તપાસ કરવામાં આવી રહી છે.
હાલ સુરક્ષા એજન્સીઓ એલર્ટ મોડમાં
આ ઘટનાને પગલે થોડા સમય માટે કલેક્ટર કચેરીની તમામ કામગીરી અટકાવી દેવામાં આવી છે. તંત્ર દ્વારા સ્પષ્ટ કરવામાં આવ્યું છે કે કોઈ પણ પ્રકારની અફવા પર ધ્યાન ન આપવું અને તપાસ પૂર્ણ થયા બાદ જ આગળની માહિતી આપવામાં આવશે. હાલ સુરક્ષા એજન્સીઓ એલર્ટ મોડમાં છે અને સમગ્ર ઘટનાને ગંભીરતાથી લઈ તપાસ ચાલુ રાખવામાં આવી છે.
