Kotambi Stadium Drone Video: 11 જાન્યુઆરીએ વડોદરા નજીકના કોટંબી સ્ટેડિયમમાં ભારત અને ન્યૂઝીલેન્ડ વચ્ચેની પ્રથમ વનડે મેચ રમાશે. રોહિત શર્મા અને વિરાટ કોહલી જેવા સ્ટાર ખેલાડીઓની હાજરીને કારણે મેચ હાઉસફુલ થવાની પૂરેપૂરી શક્યતા છે. મેચના દિવસે ટ્રાફિક જામ ન થાય અને દર્શકો આરામથી સ્ટેડિયમ પહોંચી શકે તે માટે વડોદરા ગ્રામ્ય પોલીસે ત્રિસ્તરીય સુરક્ષા વ્યવસ્થા સાથે વિશેષ ટ્રાફિક મેનેજમેન્ટ પ્લાન તૈયાર કર્યો છે.
વીડિયોમાં સ્ટેડિયમ પહોંચવાના મુખ્ય માર્ગો
આ પ્લાન હેઠળ પોલીસે ગોલ્ડન ચોકડીથી કોટંબી સ્ટેડિયમ સુધીના આખા રૂટનો ડ્રોન વીડિયો જાહેર કર્યો છે. આ વીડિયોમાં સ્ટેડિયમ પહોંચવાના મુખ્ય માર્ગો, રૂટ A અને રૂટ B, જનરલ તેમજ VIP પાર્કિંગની જગ્યાઓ અને મેચ પૂરી થયા પછી પરત ફરવાના વૈકલ્પિક રસ્તાઓની સ્પષ્ટ માહિતી આપવામાં આવી છે. આનાથી ક્રિકેટપ્રેમીઓ અગાઉથી રૂટ સમજીને કોઈ મુંઝવણ વગર સ્ટેડિયમ પહોંચી શકશે.
કોટંબી સ્ટેડિયમનું દૃશ્ય:
ડ્રોન વીડિયો પ્રમાણે, વડોદરાથી આવતા દર્શકો ગોલ્ડન ચોકડીથી ગોલ્ડન ટોલનાકા તરફ જઈને સીધા સ્ટેડિયમ પહોંચશે. સ્ટેડિયમ નજીક પહોંચતાં જ પહેલા જમણી બાજુએ જનરલ પાર્કિંગ અને મુખ્ય રોડ પર આગળ વધતાં જમણી તરફ VIP પાર્કિંગની વ્યવસ્થા છે. બંને પાર્કિંગમાંથી સ્ટેડિયમમાં પ્રવેશની સુવિધા મળશે.મેચ પૂરી થયા પછી દર્શકો સ્ટેડિયમમાંથી નીકળીને ગોલ્ડન ચોકડી તરફ જઈ વડોદરા પરત ફરી શકશે. વૈકલ્પિક રૂટ તરીકે ગોલ્ડન ચોકડી પહેલાં ડાબી બાજુ કુમેઠા ગામ તરફ વળી, સિકોતર માતાના મંદિર પછી જમણે વળીને આજવા ચોકડી પહોંચી શકાશે.
રૂટ મેપ અને ગોલ્ડન ચોકડીનું દૃશ્ય:
આ ઉપરાંત, વડોદરા અધિક જિલ્લા મેજિસ્ટ્રેટ બી.એસ. પટેલે હાલોલ-વડોદરા રોડ પર ટ્રાફિક ડાયવર્ઝનનું જાહેરનામું બહાર પાડ્યું છે. 11 જાન્યુઆરીએ સવારે 10 વાગ્યાથી મેચ પૂરી થાય ત્યાં સુધી હાલોલ તરફથી વડોદરા આવતા વાહનોને મુખ્ય રોડ પર પ્રતિબંધ રહેશે. આ વાહનોને જરોદ રેફરલ ચોકડીથી રાહકુઈ, રસુલાબાદ, રવાલ, જેસંગપુરા પાટીયા, નિમેટા પાટીયા, સિકંદરપુરા પાટીયા અને આજવા ચોકડી વાયા વડોદરા આવવું પડશે.પોલીસના આ આયોજનથી ક્રિકેટરસિકો બિનઅડચણે મેચનો આનંદ માણી શકશે.
