Dahod gang busted : વડોદરા શહેરમાં રાત્રીના સમયે બંધ મકાનોને નિશાન બનાવી ઘરફોડ ચોરીને અંજામ આપતી દાહોદની એક ગેંગનો વડોદરા ક્રાઇમ બ્રાન્ચે પર્દાફાશ કર્યો છે. આ કાર્યવાહી હેઠળ ગેંગના ત્રણ આરોપીઓને ઝડપી પાડવામાં આવ્યા છે, જેના પરિણામે શહેરના વિવિધ વિસ્તારોમાં બનેલા કુલ 6 ઘરફોડ ચોરીના ગુનાઓનો ભેદ ઉકેલાયો છે. પોલીસે આરોપીઓ પાસેથી રૂ. 16.01 લાખથી વધુ કિંમતનો મુદ્દામાલ કબ્જે કરી વધુ તપાસ શરૂ કરી છે.
વડોદરા શહેરમાં છેલ્લા કેટલાક સમયથી રાત્રીના સમયે બંધ મકાનોમાં ઘરફોડ ચોરીની ઘટનાઓ વધી રહી હતી. આ બાબતે ક્રાઇમ બ્રાન્ચે ગંભીરતા દાખવી CCTV ફૂટેજ, ટેક્નિકલ સર્વેલન્સ અને હ્યુમન ઇન્ટેલિજન્સના આધારે સઘન તપાસ હાથ ધરી હતી. તપાસ દરમિયાન દાહોદ જિલ્લાના કેટલાક રીઢા આરોપીઓ તથા વડોદરામાં રહેતા સ્થાનિક ઇસમો શંકાના દાયરામાં આવ્યા હતા.
અંગત બાતમીદારો પાસેથી મળેલી ચોક્કસ માહિતીના આધારે ક્રાઇમ બ્રાન્ચની ટીમે હરિનગર બ્રિજ નીચેના વિસ્તારમાં દરોડો પાડ્યો હતો. અહીં એક ઓટોરિક્ષા અને બાઇક સાથે ઊભેલા ત્રણ શખ્સોને કોર્ડન કરી પકડી પાડવામાં આવ્યા હતા. પૂછપરછ દરમિયાન તેમની ઓળખ જયંતિભાઇ રમેશભાઇ મંડોર, વિશાલભાઇ માધુભાઇ ડામોર અને રાજેશભાઇ રમેશભાઇ નીનામા તરીકે થઈ હતી. ત્રણેય આરોપીઓ મૂળ દાહોદ જિલ્લાના લીમખેડા તાલુકાના વતની છે અને હાલ વડોદરા શહેરમાં વસવાટ કરતા હતા.
DCP ક્રાઇમ હિમાંશુકુમાર વર્માએ જણાવ્યું હતું કે, સઘન પૂછપરછમાં આરોપીઓએ કબૂલાત કરી હતી કે તેઓ દાહોદના રીઢા આરોપીઓ સાથે મળીને વડોદરાના વિસ્તારોમાં અગાઉથી રેકી કરતા હતા. બંધ મકાનો, આસપાસના CCTV કેમેરાની સ્થિતિ તપાસ્યા બાદ મોડી રાત્રે ઓટોરિક્ષા કે બાઇક પર આવી ઘરફોડ ચોરીને અંજામ આપતા હતા. ચોરી કરેલા સોના-ચાંદીના દાગીના દાહોદમાં વેચી દેવામાં આવતા હતા.
આરોપીઓ પાસેથી પોલીસે 2 સોનાની રીંગ, 2 ચાંદીની રીંગ, એક ઓટોરિક્ષા, એક મોટરસાઇકલ અને 3 મોબાઇલ ફોન સહિત કુલ રૂ. 16,01,118નો મુદ્દામાલ કબ્જે કર્યો છે. આ કાર્યવાહીથી ગોત્રી, અટલાદરા અને અકોટા પોલીસ સ્ટેશનમાં નોંધાયેલા ઘરફોડ ચોરીના 6 ગુનાઓનો ભેદ ઉકેલાયો છે. પોલીસે આ ગેંગ સાથે સંકળાયેલા અન્ય આરોપીઓ અંગે વધુ તપાસ હાથ ધરી છે.
