Black market for match tickets: વડોદરામાં આજે (11 જાન્યુઆરી, 2026) ભારત અને ન્યૂઝીલેન્ડ વચ્ચે યોજાઈ રહેલી પ્રથમ વનડે મેચને લઈને શહેરમાં ક્રિકેટનો જનજોશ છવાયો છે. કોટંબી સ્ટેડિયમ તરફ ચાહકોની ભીડ ઉમટી પડી છે, રસ્તાઓ પર ટીમ ઈન્ડિયાના પોસ્ટર્સ, ઝંડા અને 'ઈન્ડિયા... ઈન્ડિયા'ના નારા ગુંજી રહ્યા છે. ખાસ કરીને ચાહકોમાં એક મોટી આશા છે કે વિરાટ કોહલી પોતાની દીકરી વામિકાના પાંચમા જન્મદિવસના ખાસ પ્રસંગે સદી ફટકારીને મેચને યાદગાર બનાવશે! પરંતુ આ ઉત્સાહની વચ્ચે મેચની ટિકિટોની કાળાબજારીનો કિસ્સો પણ સામે આવ્યો છે. વડોદરા ક્રાઈમ બ્રાન્ચે ત્વરિત અને કડક કાર્યવાહી કરીને બે આરોપીઓને રંગેહાથ ઝડપી લીધા છે.
બંને આરોપીઓને પકડવામાં આવ્યા
પોલીસને ગુપ્ત માહિતી મળતા નકલી ગ્રાહક બનાવીને ટ્રેપ ગોઠવવામાં આવ્યો હતો. ભાંડવાડા નાકા સેલ પેટ્રોલપંપ પાસેથી આ કાર્યવાહીમાં બંને આરોપીઓને પકડવામાં આવ્યા હતા.પોલીસે બંને પાસેથી કુલ 17 મેચ ટિકિટો કબજે કરી છે. આરોપીઓના નામ છે: કેતન પટેલ (છાણી ગામનો રહેવાસી)
હિતેષ જોશી (નિઝામપુરા વિસ્તારનો રહેવાસી)
મૂળ કિંમત કરતાં પાંચ ગણા ઊંચા ભાવે ટિકિટો વેચી
પ્રાથમિક તપાસમાં જાણવા મળ્યું છે કે આ બંને આરોપીઓ મેચની ટિકિટોની ભારે માંગનો લાભ લઈને લાંબા સમયથી કાળાબજારી કરી રહ્યા હતા. તેઓ મૂળ કિંમત કરતાં પાંચ ગણા ઊંચા ભાવે ટિકિટો વેચી રહ્યા હતા. હવે તપાસનો મુખ્ય પ્રશ્ન એ છે કે આ 17 ટિકિટો તેઓ ક્યાંથી મેળવી રહ્યા હતા, કારણ કે ટિકિટો ઓફિશિયલી વેચાઈ ગઈ છે અને ચાહકોને મળી નથી. ક્રાઈમ બ્રાન્ચે બંને આરોપીઓ સામે ગુનો નોંધીને વધુ તપાસ શરૂ કરી છે. પોલીસે સ્પષ્ટ સંદેશ આપ્યો છે કે ટિકિટોની કાળાબજારી કે કોઈપણ પ્રકારની ગેરકાયદેસર પ્રવૃત્તિને સહન કરવામાં આવશે નહીં. સ્ટેડિયમ અને આસપાસના વિસ્તારોમાં ચુસ્ત પોલીસ બંદોબસ્ત ગોઠવવામાં આવ્યો છે.
પોલીસની અપીલ
ક્રિકેટપ્રેમીઓને વિનંતી છે કે કોઈ શંકાસ્પદ વ્યક્તિ કે પ્રવૃત્તિ નજરે પડે તો તાત્કાલિક પોલીસને જાણ કરો. જેથી મેચનો માહોલ સુરક્ષિત, નિષ્પક્ષ અને આનંદમય રહી શકે!આજની આ મેચ ના થઈ રહી હોય ત્યારે ચાહકો માટે એક તરફ ક્રિકેટનો ઉત્સાહ અને બીજી તરફ કાયદાનું રક્ષણ – બંને મહત્વપૂર્ણ છે.
