અમદાવાદ શહેરના ગોમતીપુર વિસ્તારમાં ફરી એક વખત AMTS બસની બેફામ ડ્રાઇવિંગના કારણે એક નિર્દોષ બાળક ગંભીર રીતે ઇજાગ્રસ્ત બન્યાની ઘટના સામે આવી છે. ગોમતીપુરના ડાયાભાઈ કડિયાની ચાલીમાં રહેતા રાઈદ અહેમદ મોહમ્મદ રફીક અન્સારી (ઉંમર 8 વર્ષ), જે રખિયાલ ચાર રસ્તા નજીક આવેલી ઉર્દુ શાળા નંબર–2માં અભ્યાસ કરે છે, તે ગઈકાલે શાળા છૂટ્યા બાદ BRTS સર્વિસ રોડ પરથી ઘરે જઈ રહ્યો હતો. તે દરમિયાન રખિયાલ પોલીસ સ્ટેશન તરફથી પુરપાટ ઝડપે અને બેફામ રીતે આવતી AMTS બસના ડ્રાઇવરે ગંભીર અકસ્માત સર્જ્યો હતો, જેમાં બાળકના માથા, હાથ અને કમરના ભાગે ગંભીર ઇજાઓ પહોંચી હતી. અકસ્માત બાદ બાળક બેભાન હાલતમાં રસ્તા પર પડ્યો હતો અને તાત્કાલિક 108 એમ્બ્યુલન્સ મારફતે તેને શારદાબેન હોસ્પિટલના સર્જિકલ–2 વિભાગમાં દાખલ કરવામાં આવ્યો છે, જ્યાં હાલ તેની સારવાર ચાલી રહી છે.
'AMTS–BRTSની બેદરકારીના કારણે કુલ 269 અકસ્માતો થયા'
આ ઘટનાની જાણ થતાં જ સ્થાનિક મ્યુનિસિપલ કાઉન્સિલર ઈકબાલ શેખ તાત્કાલિક હોસ્પિટલ પહોંચ્યા હતા અને ડોક્ટરો સાથે બાળકની હાલત અને સારવાર અંગે ચર્ચા કરી હતી. તેમણે આ ગંભીર બનાવ અંગે ચિંતા વ્યક્ત કરતાં જણાવ્યું હતું કે AMTS અને BRTSના ડ્રાઇવરો દ્વારા થતી બેફામ ડ્રાઇવિંગ હવે ગંભીર સમસ્યા બની ગઈ છે. તેમના જણાવ્યા અનુસાર, છેલ્લા એક વર્ષમાં AMTS–BRTSની બેદરકારીના કારણે કુલ 269 અકસ્માતો થયા છે અને તેમાં 13 નાગરિકોના મૃત્યુ થયા છે, જે શહેરની સુરક્ષા માટે અત્યંત ચિંતાજનક બાબત છે.
મ્યુનિસિપલ કમિશનરને લેખિત ફરિયાદ આપી
ઈકબાલ શેખે મ્યુનિસિપલ કમિશનરને લેખિત ફરિયાદ આપી છે, જેમાં તેમણે જણાવ્યું છે કે AMTS અને BRTS મારફતે કોન્ટ્રાક્ટ અથવા સર્વિસ બેઝ પર રાખવામાં આવતા ઘણા ડ્રાઇવરોને પૂરતી તાલીમ આપવામાં આવતી નથી તેમજ તેમના ડ્રાઇવિંગ લાઇસન્સની પણ યોગ્ય રીતે ચકાસણી થતી નથી. કોર્પોરેશન દ્વારા આપવામાં આવેલી માર્ગદર્શિકાઓનું કડક પાલન કરાવવું અત્યંત જરૂરી છે, જેથી નાગરિકોની જાનમાલ સુરક્ષિત રહી શકે અને કોર્પોરેશનની પ્રતિષ્ઠા પણ જળવાઈ રહે.
લોકોમાં રોષ
વધુમાં તેમણે જણાવ્યું હતું કે અગાઉ પણ DCP ટ્રાફિકને લેખિત રજૂઆત કરવામાં આવી હતી કે ગોમતીપુર વિસ્તારમાં આવેલી તમામ શાળાઓ પાસે શાળા છૂટવાના સમય દરમિયાન, સવાર અને સાંજ બંને સમયે, ટ્રાફિક પોલીસની ફરજિયાત તૈનાતી કરવામાં આવે. છતાં આજે પણ શાળા છૂટવાના સમયે રસ્તાઓ પર અફરાતફરી અને અવ્યવસ્થા જોવા મળે છે, જે નાના બાળકો અને સામાન્ય નાગરિકોના જીવ માટે જોખમરૂપ સાબિત થઈ રહી છે.
