જામનગર જિલ્લામાં નિયમોના ઉલ્લંઘન કરનારા કોમન સર્વિસ સેન્ટરો (CSC) સામે તંત્ર દ્વારા કડક કાર્યવાહી હાથ ધરવામાં આવી છે. મિનિસ્ટ્રી ઓફ ઇન્ફોર્મેશન એન્ડ ટેકનોલોજી હેઠળ કાર્યરત CSC સેન્ટરોની તપાસ બાદ કુલ 46 સેન્ટરોના લોગીન આઈડી તાત્કાલિક અસરથી બ્લોક કરી દેવામાં આવ્યા છે.
46 CSC સેન્ટરોના આઈડી બ્લોક કરાયાં
જિલ્લા તંત્ર તરફથી મળેલી માહિતી મુજબ જામનગર જિલ્લામાં હાલમાં 1300થી વધુ CSC સેન્ટરો કાર્યરત છે, જે નાગરિકોને વિવિધ સરકારી અને અર્ધ-સરકારી સેવાઓ ઓનલાઈન ઉપલબ્ધ કરાવે છે. જોકે છેલ્લા કેટલાક સમયથી CSC સેન્ટરો અંગે ફરિયાદો મળતી હતી. આ ફરિયાદો અને આંતરિક તપાસ દરમિયાન સામે આવ્યું હતું કે ઘણા સેન્ટરો દ્વારા નક્કી કરાયેલા નિયમોનું યોગ્ય રીતે પાલન કરવામાં આવતું ન હતું.
ક્ષતિઓને ધ્યાનમાં રાખી તંત્ર દ્વારા કાર્યવાહી કરાઈ
તપાસમાં જણાયું હતું કે અનેક સેન્ટરોની બહાર CSCનું ફરજિયાત બ્રાન્ડિંગ લગાવવામાં આવ્યું ન હતું, સરકાર દ્વારા નિર્ધારિત રેટ ચાર્જ લિસ્ટ પ્રદર્શિત કરવામાં આવતું ન હતું તેમજ અનિવાર્ય પોલીસ ક્લિયરન્સ સર્ટિફિકેટ (PCC) પણ ઉપલબ્ધ ન હતું. આવી ગંભીર ક્ષતિઓને ધ્યાનમાં રાખી તંત્ર દ્વારા કાર્યવાહી કરવામાં આવી છે. નક્કી કરેલા નિયમોનો ભંગ કરનારા કુલ 46 CSC સેન્ટરોના લોગીન આઈડી બંધ કરી દેવામાં આવ્યા છે. તંત્રએ વધુમાં સ્પષ્ટ કર્યું છે કે જે સેન્ટરો પાસે સ્થાયી ઓફિસ નથી અથવા જેઓ ફરજિયાત રેટ ચાર્ટ પ્રદર્શિત કરતા નથી, તેમની સામે આવી કાર્યવાહી આગળ પણ ચાલુ રહેશે.
જિલ્લા મેનેજરે સ્પષ્ટ ચેતવણી આપતાં જણાવ્યું છે કે ડિજિટલ સેવાઓના નામે નાગરિકો સાથે કોઈ પણ પ્રકારની છેતરપિંડી કે અનિયમિતતા સહન કરવામાં આવશે નહીં. નિયમોનું કડક પાલન થાય તે માટે તંત્ર સતત નજર રાખી રહ્યું છે અને આવનાર સમયમાં પણ આવી ઝુંબેશ ચાલુ રહેશે.
