અમદાવાદ શહેરમાં મિલકત સંબંધિત ગુનાઓ, નાસતા-ફરતા તેમજ પેરોલ-ફર્લો જમ્પ આરોપીઓને ઝડપી પાડવા માટે શહેર પોલીસ દ્વારા સઘન કાર્યવાહી ચાલી રહી છે. આ અંતર્ગત અમદાવાદ શહેર પોલીસ ના માર્ગદર્શન હેઠળ એલ.સી.બી. ઝોન-5 ની ટીમે મોટી સફળતા હાંસલ કરી છે.
રામોલ પોલીસ સ્ટેશન વિસ્તારમાં પેટ્રોલિંગ દરમિયાન LCB ઝોન-5 પોલીસને મળેલી ચોક્કસ બાતમીના આધારે સુરેશકુમાર નાથાલાલ ઠુમ્મર (પટેલ), ઉંમર 42, રહે. ન્યુ મણીનગર, રામોલ, અમદાવાદને ઝડપી પાડવામાં આવ્યો હતો. તપાસ દરમિયાન આરોપી પાસેથી કુલ રૂ.15,87,389 નો મુદ્દામાલ કબ્જે લેવામાં આવ્યો છે, જેમાં મોંઘા લેપટોપ, મોબાઇલ ફોન, DJI ડ્રોન, હાઇએન્ડ હેડફોન અને અન્ય ઇલેક્ટ્રોનિક સામાનનો સમાવેશ થાય છે.
પોલીસ તપાસમાં ખુલ્યું છે કે આરોપી OLX એપ્લિકેશન પર વેચાણ માટે મુકાયેલી વસ્તુઓને નિશાન બનાવતો હતો. આરોપી ખોટું નામ આપી વેચનારનો સંપર્ક કરતો, “પૈસા આપી જઈશ” એવો વિશ્વાસ આપીને વસ્તુ લઇ લેતો અને બાદમાં રૂપિયા ચૂકવ્યા વિના ફરાર થઈ જતો હતો. કેટલીક વખત વેચનાર બહાર હોય ત્યારે વસ્તુ બહાર મુકાવી લઇ નજરચૂકવીને ગુનો આચરતો હતો.
આરોપીની પૂછપરછમાં અમદાવાદના નારોલ, ચાંદખેડા, ઓઢવ, તેમજ વડોદરા, ભરૂચ અને સુરત ઉત્રાણ પોલીસ સ્ટેશનમાં નોંધાયેલા કુલ 6 વણશોધાયેલ ચોરી અને છેતરપિંડીના ગુનાઓ ઉકેલાયા છે. આરોપી સામે અગાઉ ગાંધીનગર અને છોટાઉદેપુર જિલ્લામાં પણ ગુનાહિત ઇતિહાસ નોંધાયેલ હોવાનું સામે આવ્યું છે.
પોલીસે BNSS-2023 હેઠળ કાયદેસર કાર્યવાહી કરી આરોપીને અટકાયત કરી છે અને આગળની તપાસ માટે સંબંધિત પોલીસ સ્ટેશનોને સોંપવાની કાર્યવાહી હાથ ધરાઈ છે.
