Vadodara accident: વડોદરા શહેરમાં ભારે વાહનોના કારણે અકસ્માતોનો સિલસિલો ચાલુ છે. તાજેતરમાં વડસર બ્રિજ નજીક વડોદરા મહાનગરપાલિકાના ડમ્પરે એક વૃદ્ધ સાયકલચાલકને અડફેટે લીધા બાદ તેમનું ઘટનાસ્થળે જ કરુણ મોત નીપજ્યું હતું.
વૃદ્ધનું ઘટનાસ્થળે જ મોત
ઘટનાની વિગતો મુજબ, વૃદ્ધ વ્યક્તિ સાયકલ પરથી વડસર બ્રિજ પાસે પસાર થઈ રહ્યા હતા ત્યારે ડીઝલ ભરીને પેટ્રોલ પંપમાંથી બહાર નીકળતા પાલિકાના ડમ્પરે તેમને અડફેટે લીધા હતા. અકસ્માત એટલો ગંભીર હતો કે વૃદ્ધનું ઘટનાસ્થળે જ મોત થયું. પ્રત્યક્ષદર્શીઓના જણાવ્યા અનુસાર, અકસ્માત બાદ ડમ્પર ચાલક વાહન છોડીને ફરાર થઈ ગયો હતો. એક મહિલાએ ડ્રાઇવરને પૂછ્યું કે 'આ શું કર્યું?' પરંતુ તે તરત જ નાસી છૂટ્યો.
ફરાર ડ્રાઇવરની શોધખોળ ચાલુ
ઘટનાની જાણ થતાં જ રોડ પર ટોળું એકઠું થયું અને લાંબો ટ્રાફિક જામ લાગી ગયો. સ્થાનિક લોકોમાં ડ્રાઇવર વિરુદ્ધ ભારે રોષ ફેલાયો. માંજલપુર પોલીસ તાત્કાલિક ઘટનાસ્થળે પહોંચી અને તપાસ શરૂ કરી. ફરાર ડ્રાઇવરની શોધખોળ ચાલુ છે, જ્યારે મૃતકની ઓળખ માટે પ્રયાસો કરવામાં આવી રહ્યા છે. મૃતદેહને પોસ્ટમોર્ટમ માટે સયાજી હોસ્પિટલમાં ખસેડવામાં આવ્યો છે. આ ઘટનાએ વડોદરામાં ભારે વાહનોની લાપરવાહી અને રોડ સેફ્ટીના મુદ્દે ફરી ચિંતા વધારી છે. સ્થાનિકો અને ટ્રાફિક નિષ્ણાતો ડ્રાઇવરોની અસાવધાની પર ચિંતા વ્યક્ત કરી રહ્યા છે અને પોલીસને તાત્કાલિક કડક કાર્યવાહી કરવાની માંગ કરી છે.
