Uttarayan 2025 : વડોદરા શહેરમાં રંગબેરંગી પતંગો અને ઉત્સાહનો પર્વ ગણાતી ઉત્તરાયણને હવે ગણતરીના દિવસો જ બાકી રહ્યા છે, પરંતુ દર વર્ષની સરખામણીએ આ વર્ષે શહેરના પતંગ બજારોમાં ખાસ રોનક જોવા મળી રહી નથી. મોંઘવારીના માર અને પતંગ–દોરાના ભાવમાં થયેલા નોંધપાત્ર વધારાને કારણે ગ્રાહકો ખરીદીથી દૂર રહેતા વેપારીઓ ચિંતામાં મુકાયા છે. વેપારીઓના જણાવ્યા અનુસાર, પતંગ અને દોરાના ભાવમાં આ વર્ષે 20 થી 30 ટકા સુધીનો વધારો થયો છે.
ચાલુ વર્ષે પતંગ બનાવવા માટે ઉપયોગમાં લેવાતા કાગળ, કામડી, દોરા સહિતના કાચા માલના ભાવમાં થયેલા વધારાની સીધી અસર તૈયાર પતંગો પર પડી છે. પરિણામે પતંગબાજીનો આનંદ સામાન્ય મધ્યમ વર્ગ માટે થોડો મોંઘો બની ગયો છે. વેપારીઓ કહે છે કે ગત વર્ષની તુલનામાં આ વર્ષે ગ્રાહકો ઓછા પ્રમાણમાં ખરીદી કરી રહ્યા છે, જેના કારણે વેચાણમાં ઘટાડો નોંધાયો છે.
વડોદરા શહેરના મુખ્ય વેપારી વિસ્તારો જેમ કે રાવપુરા, માંડવી, ગેડીગેટ, દિવાળીપુરા સહિતના વિસ્તારોમાં પતંગોના મોટા સ્ટોલ અને દુકાનો સજાઈ ગઈ છે, પરંતુ બજારમાં ગ્રાહકોની પાંખી હાજરી વેપારીઓની ચિંતા વધારી રહી છે. ઉત્તરાયણને હવે થોડા જ દિવસો બાકી હોવા છતાં બજારમાં જોઈએ તેવી ભીડ હજુ સુધી જોવા મળી નથી. વેપારીઓના મતે મંદી અને મોંઘવારીના કારણે લોકો ખર્ચ કરતા ખચકાઈ રહ્યા છે.
સ્થાનિક વેપારીઓ સાથેની વાતચીતમાં જાણવા મળ્યું કે આ વર્ષે પતંગ અને દોરાના ભાવ અપેક્ષા કરતા વધારે વધ્યા છે. જોકે, બજારમાં નવી વેરાયટીની પતંગો ઉપલબ્ધ છે. ખાસ કરીને બાળકોને આકર્ષે તેવી કાર્ટૂનવાળી પતંગો અને ‘સિન્દૂર પતંગ’ ખાસ લોકપ્રિય બની રહી છે. અવનવી ડિઝાઈન અને થીમ આધારિત પતંગો પતંગપ્રેમીઓ માટે બજારમાં મુકાઈ છે, પરંતુ ઊંચા ભાવ સાંભળીને ઘણા ગ્રાહકો ખરીદી કરતા અટકી રહ્યા છે.
વેપારીઓને આશા છે કે ઉત્તરાયણના છેલ્લાં બે-ત્રણ દિવસોમાં ગ્રાહકો બજારમાં ઉમટી પડશે અને વેચાણમાં વધારો થશે. જો આવું નહીં થાય તો વેપારીઓને મોટું આર્થિક નુકસાન સહન કરવું પડી શકે છે. હવે જોવાનું એ રહેશે કે અંતિમ દિવસોમાં ઉત્તરાયણનો રંગ બજારમાં ખીલશે કે બજારો સુમસામ જ રહેશે.
