વડોદરા શહેરના પશ્ચિમ વિસ્તારમાં આવેલા ભાયલી રોડ પર એક ગમખ્વાર અને કમકમાટીભર્યો અકસ્માત સર્જાયો હતો, જેમાં ગંભીર રીતે ઘાયલ મોપેડ સવાર 20 વર્ષીય યુવતીનું હોસ્પિટલ પહોંચતા પહેલાં જ રસ્તામાં મોત નીપજ્યું હતું. આ દુર્ઘટનાથી સમગ્ર વિસ્તારમાં શોકની લાગણી પ્રસરી ગઈ હતી.
મળતી માહિતી અનુસાર, ભાયલી રોડ પર પ્રિયા ટોકીઝ અને શેલ પેટ્રોલ પંપની નજીક રહેતી 20 વર્ષીય નેત્રા હિમાંશુ વ્યાસ મોપેડ પર જઈ રહી હતી. દરમિયાન અચાનક મોપેડ પરથી તેનો કાબૂ છૂટી જતાં વાહન સીધું જ રોડના ડિવાઈડર સાથે ધડાકાભેર અથડાયું હતું. ટક્કર એટલી ભયાનક હતી કે મોપેડનો કુરચો બોલી ગયો હતો અને નેત્રાને માથા સહિત શરીરના અન્ય ભાગોમાં ગંભીર ઈજાઓ પહોંચી હતી.
અકસ્માત થતાં જ આસપાસથી પસાર થતાં વાહનચાલકો અને સ્થાનિક લોકો ઘટનાસ્થળે દોડી આવ્યા હતા. તરત જ 108 એમ્બ્યુલન્સને જાણ કરી ગંભીર રીતે ઈજાગ્રસ્ત નેત્રાને સારવાર માટે ગોત્રી સરકારી હોસ્પિટલ ખસેડવામાં આવી હતી. જોકે, રસ્તામાં જ તેની હાલત વધુ બગડતાં હોસ્પિટલ પહોંચે તે પહેલાં જ નેત્રાએ દમ તોડી દીધો હતો. હોસ્પિટલ માં ફરજ પરના તબીબોએ તપાસ બાદ તેને મૃત જાહેર કરતાં પરિવારજનોમાં શોકની લાગણી છવાઈ ગઈ હતી.
યુવતીના અચાનક અવસાનની જાણ થતા પરિવારના સભ્યો હોસ્પિટલ પહોંચ્યા હતા, જ્યાં કરુણ દ્રશ્યો સર્જાયા હતા. આ ગોઝારા અકસ્માતને પગલે ભાયલી રોડ પર થોડા સમય માટે ટ્રાફિકજામની સ્થિતિ સર્જાઈ હતી, જેને પોલીસે નિયંત્રિત કરી હતી. ઘટનાની જાણ થતાં સ્થાનિક પોલીસ પણ ઘટનાસ્થળે પહોંચી હતી અને અકસ્માત અંગે તપાસ શરૂ કરી હતી.
શહેરમાં સતત વધી રહેલા માર્ગ અકસ્માતો ફરી એકવાર ચિંતાજનક બન્યા છે. ખાસ કરીને પશ્ચિમ વિસ્તારના વ્યસ્ત માર્ગો પર વાહનચાલકો દ્વારા ગતિમર્યાદાનું પાલન અને સાવચેતી રાખવાની જરૂરિયાત ઊભી થઈ છે. આ દુર્ઘટનાએ એક યુવાન જીવન અચાનક છીનવી લીધું હોવાનું દુઃખ વ્યક્ત કરવામાં આવી રહ્યું છે.
