સવારનો નાસ્તો એ દિવસની સૌથી મહત્વપૂર્ણ ભોજન માનવામાં આવે છે, કારણ કે તે આપણા શરીરને દિવસભરની એનર્જી આપે છે અને આંતરડાના સ્વાસ્થ્ય (ગટ હેલ્થ) પર પણ સીધી અસર કરે છે. આજની ઝડપી જીવનશૈલીમાં ઘણા લોકો ઉતાવળમાં જે મળે તે ખાઈ લે છે, પરંતુ શું તમે જાણો છો કે તમારો નાસ્તો તમારા મેટાબોલિઝમ, ભૂખ અને ડાયજેશન પર કેટલી અસર કરે છે? AIIMSમાં ટ્રેઇન્ડ ગેસ્ટ્રોએન્ટેરોલોજિસ્ટ ડૉ. સૌરભ સેઠીએ આ વિષય પર વિગતવાર માહિતી આપી છે અને સામાન્ય નાસ્તાની વસ્તુઓને તેમની પેટ અને ઓવરઓલ હેલ્થ પરની અસરના આધારે રેટિંગ આપ્યું છે. તેમણે ઈંડા, ઓટ્સ, ઈડલી જેવા વિકલ્પોની તુલના કરીને જણાવ્યું છે કે, કયો નાસ્તો તમારા શરીર માટે સૌથી ફાયદાકારક છે. આ રેટિંગમાં પ્રોટીનની ગુણવત્તા, ફાઇબરની માત્રા, એનર્જી રીલીઝ અને ગટ હેલ્થનું ખાસ ધ્યાન રાખવામાં આવ્યું છે.
ઈંડા: ડોક્ટરની નંબર-1 પસંદગી, 10માંથી 10 રેટિંગ
ડૉ. સૌરભ સેઠીએ ઈંડાને નાસ્તાના વિકલ્પોમાં પ્રથમ સ્થાન આપ્યું છે અને તેને 10માંથી પૂર્ણ 10 પોઇન્ટ આપ્યા છે. તેમના મતે, ઈંડામાં ઉચ્ચ ગુણવત્તાવાળું પ્રોટીન હોય છે જે શરીર સરળતાથી પચાવી લે છે. ઈંડા ખાવાથી પેટ લાંબા સમય સુધી ભરેલું રહે છે, જેનાથી વારંવાર ભૂખ લાગતી નથી અને એનર્જી સ્તર સ્થિર રહે છે. ગટ હેલ્થ અને મેટાબોલિઝમ માટે ઈંડા સૌથી બેસ્ટ વિકલ્પ છે.
ગ્રીક યોગર્ટ: પ્રોટીન અને પ્રોબાયોટિક્સનો ખજાનો, 9 રેટિંગ
ગ્રીક યોગર્ટને ડોક્ટરે 10માંથી 9 રેટિંગ આપ્યું છે. તે પ્રોટીનથી ભરપૂર હોય છે અને તેમાં રહેલા પ્રોબાયોટિક્સ ડાયજેશનને સુધારે છે અને ગટ હેલ્થને મજબૂત બનાવે છે. તેમની સલાહ છે કે હંમેશા ખાંડ વગરનું ગ્રીક યોગર્ટ પસંદ કરો, કારણ કે ફ્લેવર્ડ યોગર્ટમાં વધુ શુગર હોય છે જે સ્વાસ્થ્ય માટે હાનિકારક છે.
ઓટ્સ: ફાઇબરથી ભરપૂર, પરંતુ પ્રકાર પસંદ કરવો જરૂરી
ઓટ્સને પણ ડોક્ટર સારો વિકલ્પ માને છે, કારણ કે તેમાં બીટા-ગ્લુકન ફાઇબર હોય છે જે ગટ હેલ્થ માટે ફાયદાકારક છે અને ધીમે ધીમે એનર્જી આપે છે. જોકે, સ્ટીલ-કટ અથવા રોલ્ડ ઓટ્સ શ્રેષ્ઠ છે, જ્યારે ઇન્સ્ટન્ટ ઓટ્સ ટાળવા જોઈએ કારણ કે તે વધુ પ્રોસેસ્ડ હોય છે અને બ્લડ સુગર ઝડપથી વધારી શકે છે.
એવોકાડો ટોસ્ટ અને પનીર: હેલ્ધી ફેટ્સ અને પ્રોટીનનો સારો સ્ત્રોત
એવોકાડો ટોસ્ટને ડોક્ટર હેલ્ધી વિકલ્પ માને છે, કારણ કે તેમાં હેલ્ધી ફેટ્સ અને ફાઇબર હોય છે જે પેટને લાંબા સમય સુધી ભરેલું રાખે છે અને ગટ હેલ્થ માટે ફાયદાકારક છે. પનીર (કોટેજ ચીઝ)માં કેસીન પ્રોટીન હોય છે જે ધીમે પચે છે અને લાંબા સમય સુધી એનર્જી આપે છે.
ટોફુ: પ્લાન્ટ બેઝ્ડ ડાયટ માટે બેસ્ટ વિકલ્પ
વેજિટેરિયન અને વીગન લોકો માટે ટોફુ એક સંપૂર્ણ પ્લાન્ટ બેઝ્ડ પ્રોટીન છે. ડોક્ટરના મતે, તે મેટાબોલિઝમને સુધારે છે અને ગટ હેલ્થ માટે પણ સારું છે.
ઈડલી-ઢોંસા અને અન્ય દક્ષિણ ભારતીય વિકલ્પો
ડૉ. સેઠીએ ઈડલી-ડોસાને પણ સારા નાસ્તાના વિકલ્પ તરીકે ગણાવ્યા છે, કારણ કે તે ફર્મેન્ટેડ હોય છે અને તેમાં પ્રોબાયોટિક્સ હોય છે જે ડાયજેશનને સુધારે છે. તેમજ સ્મૂધી અને પીનટ બટરને પણ હેલ્ધી માનવામાં આવે છે, જ્યારે સીરિયલ અને ગ્રાનોલાને ઓછું રેટિંગ આપવામાં આવ્યું છે કારણ કે તેમાં વધુ શુગર હોય છે. આ રેટિંગથી સ્પષ્ટ થાય છે કે પ્રોટીન અને ફાઇબરથી ભરપૂર નાસ્તો તમારા સ્વાસ્થ્ય માટે શ્રેષ્ઠ છે. તમારી જીવનશૈલી અને પસંદગી અનુસાર આ વિકલ્પોમાંથી પસંદ કરો અને તમારા દિવસની શરૂઆત હેલ્ધી રીતે કરો!
