માર્ચ મહિનાની શરૂઆત સાથે જ સૂર્યદેવનો પ્રકોપ વધવા લાગે છે. ઉનાળાની ગરમીમાં શરીરને ઠંડક આપવા અને ડિહાઈડ્રેશનથી બચવા માટે લોકો અવનવા પીણાંનો સહારો લેતા હોય છે. બજારમાં ઠેર-ઠેર શેરડીના રસના ચીચોડા અને નાળિયેર પાણીના ઢગલા જોવા મળે છે. સામાન્ય રીતે લોકો 10-20 રૂપિયામાં મળતા શેરડીના રસને સસ્તો અને સ્વાદિષ્ટ વિકલ્પ માને છે, જ્યારે નાળિયેર પાણીને 'સુપર ડ્રિંક' હોવા છતાં તેની કિંમતને કારણે ટાળતા હોય છે. પરંતુ શું તમે જાણો છો કે પોષણ અને સ્વાસ્થ્યની દ્રષ્ટિએ આ બંનેમાંથી બાજી કોણ મારે છે? ઇલેક્ટ્રોલાઇટ્સથી લઈને કેલરી સુધી, કયું પીણું તમારા શરીર માટે વરદાન સાબિત થશે, ચાલો જાણીએ આ વિસ્તૃત રિપોર્ટમાં.
નાળિયેર પાણી: હાઈ બીપી અને ઇમ્યુનિટી માટે રામબાણ
ઉનાળાની ગરમીમાં નાળિયેર પાણી સ્વાસ્થ્ય માટે વરદાન સમાન સાબિત થાય છે, જેને કુદરતનું સૌથી શુદ્ધ અને પૌષ્ટિક પીણું ગણવામાં આવે છે. તેમાં પોટેશિયમ ભરપૂર માત્રામાં રહેલું હોય છે, જે શરીરમાંથી વધારાના સોડિયમને દૂર કરી બ્લડ પ્રેશરને નિયંત્રિત કરવામાં મહત્વની ભૂમિકા ભજવે છે. પોષક તત્વોની વાત કરીએ તો, નાળિયેર પાણીમાં મેગ્નેશિયમ, કેલ્શિયમ અને મેંગેનીઝ જેવા આવશ્યક ખનિજો મળી આવે છે. આ પીણું સંપૂર્ણપણે ફેટ-ફ્રી છે અને વિટામિન-સીથી ભરપૂર હોવાને કારણે તે રોગપ્રતિકારક શક્તિને પણ મજબૂત બનાવે છે. જોકે, જે વ્યક્તિઓને લો બ્લડ પ્રેશરની સમસ્યા હોય, તેમણે તેનું સેવન કરતા પહેલા નિષ્ણાતોની સલાહ લેવી હિતાવહ છે.
શેરડીનો રસ: ઇન્સ્ટન્ટ એનર્જીનો ખજાનો
બીજી તરફ, શેરડીનો રસ ઉનાળામાં ઇન્સ્ટન્ટ એનર્જી મેળવવાનો શ્રેષ્ઠ સ્ત્રોત માનવામાં આવે છે. ખાસ કરીને જે લોકોને ડાયાબિટીસની સમસ્યા નથી, તેમના માટે શેરડીનો રસ ઉર્જાનો પાવરહાઉસ છે. તેમાં રહેલી કુદરતી ખાંડ, ગ્લુકોઝ અને ફ્રુક્ટોઝ શરીરમાં લોહીમાં ભળતાની સાથે જ તરત જ તાજગી અને સ્ફૂર્તિનો અનુભવ કરાવે છે. શેરડીના રસમાં કેલ્શિયમ, આયર્ન, ફોસ્ફરસ જેવા ખનિજોની સાથે વિટામિન એ, બી-કોમ્પ્લેક્સ અને સી જેવા શક્તિશાળી એન્ટીઓક્સીડેન્ટ્સ પણ ઉપલબ્ધ હોય છે.
જોકે, શેરડીના રસનું સેવન કરતી વખતે સાફ-સફાઈ (Hygiene) પ્રત્યે ખૂબ જ જાગૃત રહેવું જરૂરી છે. ઘણીવાર રસ્તા પર મળતા શેરડીના રસમાં અસ્વચ્છતાને કારણે ચેપ લાગવાનું કે પેટની બીમારીઓ થવાનું જોખમ રહેલું હોય છે. તેથી, હંમેશા સ્વચ્છ જગ્યાએથી તાજો કાઢેલો રસ જ પીવો જોઈએ. નાળિયેર પાણી હાઇડ્રેશન અને ઇલેક્ટ્રોલાઇટ્સ માટે શ્રેષ્ઠ છે, જ્યારે શેરડીનો રસ શારીરિક થાક દૂર કરી તરત શક્તિ આપવા માટે જાણીતો છે.
કોણે શું પીવું જોઈએ?
વજન ઘટાડવા માંગતા લોકો: તમારા માટે નાળિયેર પાણી બેસ્ટ છે કારણ કે તેમાં કેલરી ઓછી છે.
વધુ પરસેવો થતો હોય ત્યારે: પરસેવાને કારણે શરીરમાં ઇલેક્ટ્રોલાઇટ્સનું સંતુલન બગડે છે, જેને નાળિયેર પાણી ઝડપથી સરભર કરે છે.
તરત જ એનર્જી જોઈતી હોય: જો તમને થાક લાગતો હોય અને ગ્લુકોઝ લેવલ વધારવું હોય, તો શેરડીનો રસ પીવો જોઈએ.
ડાયાબિટીસના દર્દીઓ: શેરડીના રસમાં સુગર લેવલ હાઈ હોવાથી તેમણે નાળિયેર પાણીને જ પ્રાધાન્ય આપવું જોઈએ.
