Uttar Pradesh Tourism : જ્યારે પણ હિલ સ્ટેશન પર ફરવા જવાની વાત આવે છે ત્યારે મોટાભાગના લોકોના મનમાં સૌથી પહેલા શિમલા, મનાલી, નૈનિતાલ અથવા મસૂરી જેવા સ્થળોના નામ આવે છે. પરંતુ જો તમે હજુ પણ એવું માનો છો કે ઉત્તર પ્રદેશ માત્ર ધાર્મિક પર્યટન માટે જ ઓળખાય છે, તો હવે તમારી આ ધારણા બદલવાનો સમય આવી ગયો છે. રાજ્યમાં એવી ઘણી કુદરતી જગ્યાઓ પણ છે, જ્યાં પહાડો, ધોધ, ગાઢ જંગલો અને હરિયાળી મળીને હિલ સ્ટેશન જેવો જ અનુભવ કરાવે છે. આ સ્થળોની ખાસિયત એ છે કે અહીં પહોંચવું સરળ છે, પ્રવાસનો ખર્ચ પણ તુલનાત્મક રીતે ઓછો છે અને બે-ત્રણ દિવસની વીકેન્ડ ટ્રિપ માટે આ સ્થળો ઉત્તમ વિકલ્પ બની શકે છે. પ્રકૃતિપ્રેમી, ફોટોગ્રાફીનો શોખ ધરાવતા લોકો તેમજ શાંતિભર્યો સમય પસાર કરવા ઇચ્છતા પ્રવાસીઓ માટે ઉત્તર પ્રદેશના આ ચાર મિની હિલ સ્ટેશન યાદગાર અનુભવ આપી શકે છે.
Sonbhadra : ઉત્તર પ્રદેશનું 'ભારતનું સ્વિટ્ઝર્લૅન્ડ'
સોનભદ્ર જિલ્લો ઉત્તર પ્રદેશના સૌથી સુંદર કુદરતી વિસ્તારોમાંનો એક માનવામાં આવે છે. વિંધ્ય અને કૈમૂર પર્વતમાળાની વચ્ચે આવેલો આ વિસ્તાર ધોધ, જંગલો અને મનમોહક પહાડી દૃશ્યો માટે પ્રસિદ્ધ છે. દેશના પ્રથમ વડાપ્રધાન જવાહરલાલ નહેરુએ અહીંની પ્રાકૃતિક સુંદરતાથી પ્રભાવિત થઈને સોનભદ્રને 'ભારતનું સ્વિટ્ઝર્લૅન્ડ' તરીકે સંબોધ્યું હોવાનું કહેવાય છે. અહીં મુક્ખા ફોલ, રિહંદ ડેમ, કૈમૂર વાઇલ્ડલાઇફ સેન્ચુરી, સાલખાન ફોસિલ પાર્ક અને અનેક પ્રાચીન મંદિરો પ્રવાસીઓ માટે મુખ્ય આકર્ષણ છે. ખાસ કરીને વરસાદી મોસમમાં અહીંના ધોધ અને હરિયાળી વધુ આકર્ષક બની જાય છે. પ્રકૃતિ, ટ્રેકિંગ અને વન્યજીવનમાં રસ ધરાવતા પ્રવાસીઓ માટે સોનભદ્ર ઉત્તમ સ્થળ છે.
આ પણ ખાસ વાંચો : સ્વર્ગથી ઓછી નથી આ 7 જગ્યાઓની સુંદરતા : કુદરતી નજારા જોવા દેશ-વિદેશમાંથી ઉમટી આવે છે પ્રવાસીઓની ભીડ
Chitrakoot : આધ્યાત્મિકતા અને પ્રકૃતિનું અનોખું મિલન
ચિત્રકૂટ માત્ર ધાર્મિક દૃષ્ટિએ જ મહત્વપૂર્ણ નથી, પરંતુ તેની આસપાસનું કુદરતી સૌંદર્ય પણ પ્રવાસીઓને મંત્રમુગ્ધ કરી દે છે. વિંધ્ય પર્વતમાળાની વચ્ચે આવેલું આ સ્થળ ભગવાન શ્રીરામના વનવાસ સાથે જોડાયેલું હોવાનું માનવામાં આવે છે, જેના કારણે અહીં વર્ષભર શ્રદ્ધાળુઓ અને પ્રવાસીઓની અવરજવર રહે છે. મંદાકિની નદીના કિનારે આવેલું રામઘાટ, કામદગિરિ પર્વત, હનુમાન ધારા, ગુપ્ત ગોદાવરી, સ્ફટિક શિલા અને ભરત મિલાપ જેવા સ્થળો ચિત્રકૂટને વિશેષ બનાવે છે. સૂર્યોદયના સમયે આસપાસની પહાડીઓ અને હરિયાળીના દૃશ્યો પ્રવાસીઓને અનોખો અનુભવ કરાવે છે. ધાર્મિક યાત્રાની સાથે કુદરતી શાંતિ માણવા માંગતા લોકો માટે ચિત્રકૂટ આદર્શ સ્થળ છે.
Mahoba : ઇતિહાસ અને કુદરતનો સુંદર સમન્વય
મહોબા સામાન્ય રીતે આલ્હા-ઉદલ જેવા શૂરવીરોની ધરતી તરીકે ઓળખાય છે, પરંતુ અહીંનું કુદરતી સૌંદર્ય પણ એટલું જ આકર્ષક છે. ગોખર પર્વત, ચરખારીની નાની ટેકરીઓ, હરિયાળી અને અનેક તળાવો આ વિસ્તારને એક અનોખી ઓળખ આપે છે. મહોબામાં આવેલા ઐતિહાસિક સ્મારકો અને પ્રાચીન મંદિરો પ્રવાસીઓને ઇતિહાસ સાથે જોડે છે, જ્યારે આસપાસનું શાંત વાતાવરણ અને કુદરતી દૃશ્યો મનને તાજગી આપે છે. ભીડભાડથી દૂર શાંતિપૂર્ણ પ્રવાસ ઇચ્છતા લોકો માટે મહોબા એક હિડન જેમ સમાન છે.
આ પણ ખાસ વાંચો : ચોમાસામાં ઉદયપુર ફરવાનો પ્લાન છે? : હરિયાળી, ધોધ અને મનમોહક નજારાઓથી ભરપૂર આ 5 સ્થળો જરૂર એક્સપ્લોર કરો
Mirzapur : ધોધ અને પહાડોની વચ્ચે વસેલું મનોહર શહેર
વેબ સિરીઝના કારણે દેશભરમાં ચર્ચામાં આવેલું મિર્ઝાપુર વાસ્તવમાં તેની કુદરતી સુંદરતા માટે વધુ જાણીતું છે. ગંગા નદીના કિનારે આવેલું આ શહેર પહાડીઓ, ધોધો અને ઐતિહાસિક સ્થળોથી સમૃદ્ધ છે. અહીં વિંધ્યમ વોટરફોલ, લાખણિયા દરી, ટાંડા વોટરફોલ, ચુનાર કિલ્લો અને સીતા કુંડ જેવા અનેક પ્રવાસન સ્થળો આવેલા છે. ખાસ કરીને ચોમાસામાં અહીંના ધોધોમાં પાણીની આવક વધતા સમગ્ર વિસ્તાર હરિયાળીની ચાદર ઓઢી લે છે અને કુદરતી સૌંદર્ય અનેકગણું વધી જાય છે. ફોટોગ્રાફી, કુદરતી પ્રવાસ અને વીકેન્ડ ગેટવે માટે મિર્ઝાપુર ઝડપથી લોકપ્રિય બની રહ્યું છે. ઉત્તર પ્રદેશને માત્ર ધાર્મિક પર્યટન પૂરતું મર્યાદિત માનવું હવે યોગ્ય નથી. જો તમે ઓછા ખર્ચમાં પહાડો, હરિયાળી, ધોધ અને શાંતિપૂર્ણ વાતાવરણનો આનંદ માણવા માંગતા હોવ, તો સોનભદ્ર, ચિત્રકૂટ, મહોબા અને મિર્ઝાપુર તમારી આગામી ટ્રાવેલ લિસ્ટમાં ચોક્કસ સામેલ કરવા જેવા સ્થળો છે. ખાસ કરીને ચોમાસા અને શિયાળાની ઋતુમાં આ સ્થળોની કુદરતી સુંદરતા વધુ નીખરી ઊઠે છે અને પ્રવાસીઓને યાદગાર અનુભવ કરાવે છે.
