ફેબ્રુઆરી મહિનામાં જ બપોરનો તડકો આકરો થવા લાગ્યો છે, જેના કારણે લોકોએ હવે AC ચલાવવાની શરૂઆત કરી દીધી છે. સામાન્ય રીતે એસી શરૂ કરતા પહેલા આપણે ટેકનિશિયનને બોલાવતા હોઈએ છીએ, પરંતુ જો ટેકનિશિયન પાસે સમય ન હોય તો તમે જાતે જ 'સોફ્ટ સર્વિસ' કરીને એસીને ઠંડક આપવા માટે તૈયાર કરી શકો છો. આ માટે તમારે કોઈ મોંઘા ઓજારોની જરૂર નથી, માત્ર એક જૂનું ટૂથબ્રશ અને પાણી જ કાફી છે.
હાર્ડ સર્વિસ અને સોફ્ટ સર્વિસ વચ્ચેનો તફાવત
હાર્ડ સર્વિસ: આ સર્વિસ ટેકનિશિયન દ્વારા મશીનો અને ખાસ ઓજારો વડે કરવામાં આવે છે, જેમાં એસીના દરેક ભાગને ખોલીને ઊંડાણપૂર્વક સાફ કરાય છે.
સોફ્ટ સર્વિસ: આમાં યૂઝર પોતે એસીના એવા મહત્વના ભાગો સાફ કરે છે જે ઠંડક માટે જવાબદાર છે. આ સર્વિસથી તમે હાર્ડ સર્વિસ માટે 15 દિવસનો સમય મેળવી શકો છો.
જાતે AC સર્વિસ કરવાની સ્ટેપ-બાય-સ્ટેપ રીત
યાદ રાખો: સર્વિસ શરૂ કરતા પહેલા એસીનો પ્લગ સ્વિચ બોર્ડમાંથી કાઢી લેવો અને પાવર ઓફ રાખવો.
સ્ટેપ 1: ફિલ્ટરની સફાઈ
એસીની અંદર જાળી જેવું ફિલ્ટર હોય છે જે હવામાંથી ધૂળ ખેંચે છે. સૌથી પહેલા આ ફિલ્ટરને બહાર કાઢીને પાણીની તેજ ધાર નીચે ધોઈ લો. તેના પર સહેજ પણ માટી ન રહે તે રીતે સાફ કરી તેને સુકવવા મૂકી દો.
સ્ટેપ 2: કોઈલ્સ (Coils) ને સાફ કરો
હવે જૂનું ટૂથબ્રશ લો અને તેને પાણીમાં પલાળીને એસીની આગળની તરફ દેખાતી કોપર કે એલ્યુમિનિયમની કોઈલ્સને હળવા હાથે સાફ કરો. બ્રશ પર જામતી માટીને વારંવાર પાણીથી સાફ કરતા રહો. ધ્યાન રાખવું કે કોઈલ્સ નમવી ન જોઈએ.
સ્ટેપ 3: વિન્ડો AC ના પાછળના ભાગની સફાઈ
જો તમે વિન્ડો એસી વાપરો છો, તો તેના પાછળના ભાગમાં રહેલી કોઈલ્સ પર પાણીના પાઈપથી તેજ ધાર મારો. આનાથી એસી પાછળથી ગરમ હવા વધુ સારી રીતે બહાર કાઢી શકશે.
સ્ટેપ 4: સ્પ્લિટ AC ના આઉટડોર યુનિટની સફાઈ
સ્પ્લિટ એસી ધરાવતા યૂઝર્સે ઘરની બહાર લાગેલા આઉટડોર યુનિટ પર પાણીનો મારો ચલાવવો જોઈએ. તેના પાછળના ભાગમાં રહેલી જાળીને પાણીથી બરાબર સાફ કરવાથી કમ્પ્રેસર પરનું દબાણ ઘટે છે અને ઠંડક વધે છે.
સ્ટેપ 5: ફાઈનલ ચેક
સફાઈ પૂરી થયા બાદ એસીને તરત શરૂ ન કરો. ઓછામાં ઓછો 1 થી દોઢ કલાક રાહ જુઓ જેથી બધું પાણી સુકાઈ જાય. ત્યારબાદ એસી શરૂ કરો, તમને ઠંડકમાં નોંધપાત્ર તફાવત જણાશે.
જોકે, યાદ રાખવું કે સોફ્ટ સર્વિસ એ હાર્ડ સર્વિસનો કાયમી વિકલ્પ નથી. એસીની લાઈફ વધારવા માટે આગામી 15 દિવસમાં પ્રોફેશનલ સર્વિસ જરૂર કરાવી લેવી જોઈએ.
