બનાસકાંઠા જિલ્લામાંથી એક હૃદયદ્રાવક કિસ્સો સામે આવ્યો છે, જેણે 'માની મમતા' પર જ સવાલ ઉઠાવ્યો છે. દિયોદરના મકડાલા ગામની એક પરિણીત મહિલાએ પોતાના બે માસૂમ બાળકોને તરછોડીને પ્રેમી સાથે જવાનું પસંદ કર્યું. આ સમગ્ર ઘટનાનો વીડિયો સોશિયલ મીડિયા પર વાયરલ થતાં લોકોમાં ભારે રોષ અને ફિટકારની લાગણી જોવા મળી રહી છે.
પોલીસ સ્ટેશનમાં જ કરુણ દ્રશ્યો
ઘટનાની શરૂઆત એક અઠવાડિયા પહેલા થઈ, જ્યારે દિયોદરના મકડાલા ગામની મહિલા ગુમ થતા તેના પતિએ પોલીસ સ્ટેશનમાં ફરિયાદ નોંધાવી. પોલીસે તપાસ હાથ ધરતા માલુમ પડ્યું કે મહિલા કાંકરેજના નાણોટા ગામના એક પુરુષ સાથે મૈત્રી કરાર કરીને સાથે રહેતી હતી. પોલીસે બંનેને વલસાડથી ઝડપી પાડ્યા અને પોલીસ સ્ટેશન લાવ્યા.
અહીં જ માનવતાને શરમસાર કરનારો કિસ્સો બન્યો. પોલીસ સ્ટેશનમાં મહિલાને સમજાવવા તેના બાળકોને બોલાવવામાં આવ્યા. બાળકો, રડતા રડતા અને હાથ જોડીને, પોતાની માતાને ઘરે પાછા ફરવા માટે આજીજી કરતા રહ્યા. પરંતુ, નિષ્ઠુર માતા પર તેની કોઈ અસર થઈ નહીં. તેણે પોતાના બાળકોને હડસેલીને દૂર કર્યા અને પોતાના પ્રેમી સાથે જ રહેવાનો નિર્ણય કર્યો.
સમાજમાં આક્રોશ અને ફિટકાર
આ કાળજું કંપાવી મૂકે તેવા દ્રશ્યોનો વીડિયો સોશિયલ મીડિયા પર વાયરલ થતાં લોકોમાં ભારે આક્રોશ જોવા મળ્યો. લોકોએ માતા અને તેના પ્રેમી પર ફિટકાર વરસાવ્યો. આશ્ચર્યની વાત તો એ છે કે, પ્રેમીના પરિવારે પણ આ મહિલાને નવી દુલ્હનની જેમ આવકારી હતી.
આ ઘટના સમાજમાં વધી રહેલા નૈતિક મૂલ્યોના પતનની ગંભીરતા દર્શાવે છે. એક માતા જે પોતાના બાળકો માટે સર્વસ્વ છોડી દે છે, તેના બદલે એક સ્ત્રીએ પોતાના અંગત સ્વાર્થ માટે બાળકોની લાગણીઓને અવગણી. આ ઘટનાએ સાબિત કર્યું છે કે અમુક કિસ્સાઓમાં સંબંધો અને લાગણીઓનું કોઈ મૂલ્ય રહેતું નથી. આ ઘટના સમાજ માટે એક ગંભીર ચેતવણી છે કે પ્રેમ અને સંબંધોના નામે માનવીય મૂલ્યોનું પતન કેટલું ગંભીર બની શકે છે.
