નબળા યુએસ ડોલર, અમેરિકી શટડાઉનના અંત અને ફેડરલ રિઝર્વના સંભવિત વ્યાજ દર ઘટાડાની અપેક્ષાઓને કારણે સોના અને ચાંદીના ભાવમાં તીવ્ર તેજી જોવા મળી છે. ગુરુવારે દિલ્હીના સરાફા બજારમાં સોનાના ભાવ ₹3,000 વધીને ₹1,30,900 પ્રતિ 10 ગ્રામ પર પહોંયા, જ્યારે ચાંદી ₹7,700ના ઉછાળા સાથે ₹1,69,000 પ્રતિ કિલો પર પહોંચી ગઈ. વિશ્લેષકોનું માનવું છે કે ફેડના કડક વલણને કારણે આગામી અઠવાડિયામાં બુલિયન બજારમાં વધુ તેજી આવી શકે છે.
દિલ્હીમાં સોના-ચાંદીના ભાવમાં રેકોર્ડ વધારો
ઓલ ઈન્ડિયા સરાફા એસોસિએશનના જણાવ્યા અનુસાર, ગુરુવારે 99.9 ટકા શુદ્ધ સોનું (બધા કર સહિત) ₹1,27,900થી વધીને ₹1,30,900 પ્રતિ 10 ગ્રામ થયું. 99.5 ટકા શુદ્ધ સોનું ₹1,27,300થી વધીને ₹1,30,300 પર પહોંચ્યું. આ સતત ત્રીજો દિવસ છે જ્યારે સોનામાં વધારો નોંધાયો છે.ચાંદીમાં પણ ધમાકેદાર તેજી જોવા મળી. તે ₹1,61,300થી ₹7,700 વધીને ₹1,69,000 પ્રતિ કિલો (બધા કર સહિત) થઈ. બુધવારે પણ ચાંદીમાં ₹5,540નો વધારો થયો હતો.
નબળો ડોલર અને યુએસ શટડાઉનનો અંત મુખ્ય કારણ
ડોલર ઈન્ડેક્સ 0.20 ટકા ઘટીને 99.30 પર આવ્યો, જેના કારણે કિંમતી ધાતુઓને ટેકો મળ્યો. યુએસ વહીવટીતંત્રના શટડાઉન સમાપ્ત કરવાના નિર્ણયથી પણ બજારમાં સકારાત્મક વાતાવરણ બન્યું.
આંતરરાષ્ટ્રીય બજારમાં પણ તેજી
વૈશ્વિક સ્તરે હાજર સોનું 0.98% ($41.19) વધીને $4,236.84 પ્રતિ ઔંસ થયું. ચાંદી 1.13% વધીને $53.86 પ્રતિ ઔંસ પર પહોંચી. HDFC સિક્યોરિટીઝના સિનિયર એનાલિસ્ટ સૌમિલ ગાંધીએ જણાવ્યું કે, ડોલરની નબળાઈ, ઘટતા આર્થિક ડેટા અને વ્યાજ દર ઘટાડાની અપેક્ષાઓથી બજારને બૂસ્ટ મળ્યું છે. ફેડ પ્રવાહિતા સંકટને પહોંચી વળવા વધુ ભંડોળ દાખલ કરી શકે છે.આ અઠવાડિયે ચાંદીમાં 10%થી વધુ વધારો થયો છે. તેના કારણોમાં દર ઘટાડા, પુરવઠા અછત, ઔદ્યોગિક-રોકાણ માંગ અને તકનીકી સંકેતોનો સમાવેશ થાય છે.
યુએસએ ચાંદીને 'ક્રિટિકલ મિનરલ્સ'માં ઉમેરી
યુએસ ડિપાર્ટમેન્ટ ઓફ ઈન્ટિરિયરે ચાંદીને 'ક્રિટિકલ મિનરલ્સ' યાદીમાં સામેલ કરી, જે તેની વૈશ્વિક માંગને વધારશે. શટડાઉન સમાપ્ત થતાં બજાર હવે આર્થિક ડેટાની રાહ જોઈ રહ્યું છે.પીએલ કેપિટલના ડિરેક્ટર સંદીપ રાચુરાએ જણાવ્યું કે, વૈશ્વિક તણાવ ઘટ્યો હોવા છતાં યુએસ-ભારત વેપાર વાટાઘાટો ભાવ પર દબાણ લાવી શકે છે. રોકાણકારો નફો બુક કરતા પહેલા બજારની દિશા જોશે.
