HDFC Bank News: ભારતની સૌથી મોટી ખાનગી ક્ષેત્રની બેંક, HDFC બેંકમાંથી એક એવા સમાચાર આવ્યા છે જેણે સમગ્ર બેંકિંગ સેક્ટર અને શેરબજારને હચમચાવી દીધું છે. બેંકના પાર્ટ-ટાઈમ ચેરમેન અતનુ ચક્રવર્તીએ (Atanu Chakraborty) અચાનક પોતાના પદ પરથી રાજીનામું આપી દીધું છે. આ રાજીનામું માત્ર એક વહીવટી ફેરફાર નથી, પરંતુ તેમણે રાજીનામા પાછળ જે કારણો દર્શાવ્યા છે તેણે રોકાણકારોમાં ભારે ચિંતા જન્માવી છે. અતનુ ચક્રવર્તીએ સ્પષ્ટપણે જણાવ્યું છે કે બેંકની કેટલીક પદ્ધતિઓ અને કામગીરી તેમના અંગત મૂલ્યો અને નૈતિકતા (Values and Ethics) સાથે સુસંગત નથી.
જ્યારે માર્કેટ કેપની દ્રષ્ટિએ દેશની બીજી સૌથી મોટી કંપનીનો ચેરમેન 'એથિક્સ' અને 'કોર્પોરેટ ગવર્નન્સ' પર સવાલ ઉઠાવીને પદ છોડે, ત્યારે બજારમાં તેની ગંભીર અસર પડવી સ્વાભાવિક છે. આ સમાચાર વાયુવેગે ફેલાતા જ આજે શેરબજાર ખૂલતાની સાથે જ HDFC બેંકના શેરમાં ભારે વેચવાલી જોવા મળી હતી. રોકાણકારોએ બેંકના ભવિષ્ય અને મેનેજમેન્ટની વિશ્વસનીયતા પર સવાલો ઉઠાવતા શેરના ભાવમાં મોટું ગાબડું પડ્યું છે.
શેરબજારમાં HDFC બેંકના શેરમાં 5% થી વધુનો કડાકો
ચેરમેનના અચાનક રાજીનામાની અસર સીધી શેરના ભાવ પર જોવા મળી હતી. આજે સવારે ટ્રેડિંગ શરૂ થતાની સાથે જ HDFC બેંકનો શેર 5% થી વધુ (આશરે ₹42) તૂટીને ₹800.90 ના સ્તર પર આવી ગયો હતો. બેંકની સાખ પર લાગેલા આ ધક્કાને કારણે રોકાણકારોમાં ગભરાટ ફેલાયો હતો અને લાખો કરોડ રૂપિયાનું માર્કેટ કેપ મિનિટોમાં સાફ થઈ ગયું હતું. બેંકિંગ ઇન્ડેક્સને પણ આ ઘટાડાએ નીચે ખેંચી લીધો છે.
અતનુ ચક્રવર્તીએ કેમ આપ્યું રાજીનામું? ઉઠ્યા ગંભીર સવાલો
અતનુ ચક્રવર્તીની નિમણૂક મે 2021 માં થઈ હતી અને મે 2024 માં તેમને 2027 સુધીનો બીજો કાર્યકાળ આપવામાં આવ્યો હતો. જોકે, કાર્યકાળ પૂરો થાય તે પહેલા જ તેમણે પદ છોડ્યું છે. સ્ટોક એક્સચેન્જને આપેલી માહિતીમાં તેમણે લખ્યું છે કે, "છેલ્લા બે વર્ષમાં મેં બેંકની અંદર કેટલીક એવી પદ્ધતિઓ જોઈ છે જે મારા વ્યક્તિગત સિદ્ધાંતો અને એથિક્સ સાથે મેળ ખાતી નથી." જોકે તેમણે આ ઘટનાઓ વિશે વિગતવાર ખુલાસો કર્યો નથી, પરંતુ 'એથિક્સ' શબ્દનો પ્રયોગ બેંકના મેનેજમેન્ટ સામે આંગળી ચીંધી રહ્યો છે.
કેકી મિસ્ત્રી સંભાળશે બેંકની કમાન: RBI એ આપી મંજૂરી
અતનુ ચક્રવર્તીના ગયા પછી બેંકે તાત્કાલિક અસરથી નવા નામની જાહેરાત કરી છે. ભારતીય રિઝર્વ બેંક (RBI) એ કેકી મિસ્ત્રીને (Keki Mistry) ત્રણ મહિના માટે વચગાળાના પાર્ટ-ટાઈમ ચેરમેન તરીકે નિયુક્ત કરવાની મંજૂરી આપી દીધી છે. તેમની નિમણૂક આજથી એટલે કે 19 માર્ચથી અમલી બની છે. કેકી મિસ્ત્રી બેંકિંગ અને ફાઈનાન્સ સેક્ટરના અનુભવી ખેલાડી છે. બેંકને આશા છે કે તેમના અનુભવથી આ મુશ્કેલ સમયમાં બેંકની છબી સુધારવામાં અને રોકાણકારોનો વિશ્વાસ જીતવામાં મદદ મળશે.
HDFC બેંકની શાખ પર શું અસર થશે?
HDFC બેંક માત્ર એક બેંક નથી, પરંતુ ભારતીય અર્થતંત્રનો એક મજબૂત આધારસ્તંભ છે. એસેટ્સની દ્રષ્ટિએ સૌથી મોટી પ્રાઈવેટ બેંક હોવાને કારણે તેના આંતરિક મતભેદો બહાર આવવા એ ચિંતાનો વિષય છે. અતનુ ચક્રવર્તીના રાજીનામાથી એ સ્પષ્ટ થાય છે કે બેંકના ઉચ્ચ સ્તરે ચોક્કસપણે કોઈ ગંભીર વિવાદ ચાલી રહ્યો છે. આવનારા દિવસોમાં જો આ વિવાદની વધુ વિગતો બહાર આવશે, તો તેની અસર બેંકના બિઝનેસ અને લાંબા ગાળાના રોકાણકારો પર પડી શકે છે.
