Mukesh Ambani Jio IPO: ભારતીય શેરબજાર અને કોર્પોરેટ જગત માટે ઐતિહાસિક ક્ષણ ગણાય તેવી મોટી જાહેરાત રિલાયન્સ ઇન્ડસ્ટ્રીઝની 49મી વાર્ષિક સામાન્ય સભા (AGM) દરમિયાન કરવામાં આવી છે. વર્ષોથી ચર્ચામાં રહેલા Jio Platformsના IPOને લઈને હવે સત્તાવાર પ્રક્રિયા શરૂ થઈ ગઈ છે. રિલાયન્સ ઇન્ડસ્ટ્રીઝના ચેરમેન અને મેનેજિંગ ડિરેક્ટર મુકેશ અંબાણીએ જાહેરાત કરી છે કે, Jio Platforms તેના IPO માટેનો Draft Red Herring Prospectus (DRHP) માર્કેટ રેગ્યુલેટર SEBI સમક્ષ ફાઇલ કરશે. આ જાહેરાત સાથે જ દેશના સૌથી મોટા અને સૌથી વધુ ચર્ચિત IPO પૈકીના એક માટેનો માર્ગ ખુલ્લો થયો છે. બજારના નિષ્ણાતોનું માનવું છે કે Jioનું લિસ્ટિંગ ભારતીય મૂડીબજાર માટે એક ઐતિહાસિક ઘટના બની શકે છે અને ટેક્નોલોજી ક્ષેત્રમાં ભારતની વૈશ્વિક ઓળખને વધુ મજબૂત બનાવશે.
AGMમાં મુકેશ અંબાણીની મોટી જાહેરાત
રિલાયન્સની AGM દરમિયાન શેરધારકોને સંબોધતા મુકેશ અંબાણીએ જણાવ્યું કે Jio Platformsના બોર્ડે DRHPને મંજૂરી આપી દીધી છે અને તેને SEBI સમક્ષ રજૂ કરવામાં આવશે. તેમણે કહ્યું કે, "આ મારા માટે, સમગ્ર રિલાયન્સ પરિવાર માટે અને લાખો શેરધારકો માટે અત્યંત ભાવનાત્મક ક્ષણ છે." અંબાણીએ ઉમેર્યું કે Jioનું લિસ્ટિંગ માત્ર એક કંપનીનું IPO નથી, પરંતુ ભારતની ટેક્નોલોજીકલ શક્તિ અને ક્ષમતાનું વૈશ્વિક સ્તરે પ્રદર્શન છે.
અંબાણી પરિવારની નવી પેઢી સંભાળશે IPOનું નેતૃત્વ
આ IPOની સૌથી ખાસ બાબત એ છે કે, તેની સમગ્ર પ્રક્રિયાની જવાબદારી હવે અંબાણી પરિવારની આગામી પેઢી સંભાળી રહી છે. ઈશા અંબાણી, આકાશ અંબાણી અને અનંત અંબાણી Jioના લિસ્ટિંગને આગળ વધારવામાં મુખ્ય ભૂમિકા ભજવી રહ્યા છે. મુકેશ અંબાણીએ જણાવ્યું કે, નવી પેઢી માત્ર IPO જ નહીં, પરંતુ ભવિષ્યના મૂલ્ય સર્જન અને ડિજિટલ બિઝનેસના વિસ્તરણ માટે પણ નેતૃત્વ કરશે. આ નિવેદનને રિલાયન્સ ગ્રુપમાં સત્તાંતરણ અને નવી પેઢીના વધતા પ્રભાવ તરીકે પણ જોવામાં આવી રહ્યું છે.
‘Jio વિશ્વને ભારતની ટેક્નોલોજી ક્ષમતા બતાવશે’
મુકેશ અંબાણીએ પોતાના સંબોધનમાં ભારપૂર્વક જણાવ્યું કે Jioનું લિસ્ટિંગ સમગ્ર વિશ્વને બતાવશે કે ભારત વૈશ્વિક સ્તરની ટેક્નોલોજી કંપનીઓ ઉભી કરવાની ક્ષમતા ધરાવે છે. તેમણે કહ્યું કે Jioએ ટેલિકોમ ક્ષેત્રથી આગળ વધીને ડિજિટલ સર્વિસિસ, ક્લાઉડ કમ્પ્યુટિંગ, AI અને નવી પેઢીની ટેક્નોલોજીમાં મજબૂત સ્થાન બનાવ્યું છે. Jioનું IPO ભારતના ડિજિટલ અર્થતંત્ર માટે એક મહત્વપૂર્ણ માઈલસ્ટોન સાબિત થશે.
પેટન્ટ ઇનોવેશનમાં Jioએ સર્જ્યો રેકોર્ડ
AGM દરમિયાન અંબાણીએ Jioની ઇનોવેશન ક્ષમતાનો પણ ઉલ્લેખ કર્યો હતો. તેમણે World Intellectual Property Organization (WIPO)ના અહેવાલનો ઉલ્લેખ કરતાં જણાવ્યું કે, Jio Platforms પેટન્ટ ઇનોવેશન વેલોસિટી રેન્કિંગમાં માત્ર એક વર્ષમાં 340મા ક્રમથી સીધું 20મા સ્થાને પહોંચી ગયું છે. આ સિદ્ધિ સાથે Jio વૈશ્વિક ટોપ-20માં સ્થાન મેળવનારી એકમાત્ર ભારતીય કંપની બની છે. કંપનીનું કહેવું છે કે સતત ઇનોવેશન અને ટેક્નોલોજીકલ રોકાણો તેના વિકાસનું મુખ્ય કારણ છે.
શેરધારકો સાથેના સંબંધોને ગણાવ્યા ‘પવિત્ર બંધન’
મુકેશ અંબાણીએ AGM દરમિયાન શેરધારકો પ્રત્યેની પોતાની પ્રતિબદ્ધતા પર પણ ભાર મૂક્યો હતો. તેમણે કહ્યું કે રિલાયન્સ અને તેના રોકાણકારો વચ્ચેનો સંબંધ માત્ર વ્યાવસાયિક નહીં પરંતુ વિશ્વાસ, સન્માન અને સહિયારા વિકાસ પર આધારિત પવિત્ર બંધન છે. તેમણે કંપનીના સ્થાપક ધીરુભાઈ અંબાણીને યાદ કરતાં કહ્યું કે શેરધારકો માટે મૂલ્ય સર્જન કરવું હંમેશા રિલાયન્સની પ્રાથમિકતા રહી છે અને ભવિષ્યમાં પણ રહેશે.
રિલાયન્સના નાણાકીય પરિણામો રહ્યા મજબૂત
AGM દરમિયાન રિલાયન્સ ઇન્ડસ્ટ્રીઝના 2025-26ના નાણાકીય પરિણામો પણ રજૂ કરવામાં આવ્યા હતા. કંપનીની કુલ આવક વર્ષ દરમિયાન 9.8 ટકા વધીને રેકોર્ડ ₹11.75 લાખ કરોડ સુધી પહોંચી છે. કંપનીનું EBITDA પણ નોંધપાત્ર રીતે વધ્યું છે. અંબાણીના જણાવ્યા અનુસાર રિટેલ અને ડિજિટલ બિઝનેસ મળીને હવે કંપનીના કુલ EBITDAમાં લગભગ 50 ટકા ફાળો આપી રહ્યા છે, જે રિલાયન્સના બિઝનેસ મોડલમાં આવેલા મોટા પરિવર્તનને દર્શાવે છે.
આ પણ વાંચો: નોઈડા ઈન્ટરનેશનલ એરપોર્ટમાં બિઝનેસ કરવાની સુવર્ણ તક : દુકાન કે આઉટલેટ કેવી રીતે મળશે? જાણો સમગ્ર પ્રક્રિયા
નફામાં 17.8 ટકાનો ઉછાળો
રિલાયન્સ ઇન્ડસ્ટ્રીઝનો ચોખ્ખો નફો પણ વર્ષ દરમિયાન 17.8 ટકા વધીને ₹95,754 કરોડ સુધી પહોંચ્યો છે. કંપનીના ડિજિટલ અને રિટેલ બિઝનેસ હવે તેના વિકાસના સૌથી મોટા એન્જિન તરીકે ઉભરી આવ્યા છે. એક સમયે પેટ્રોકેમિકલ અને ઊર્જા ક્ષેત્ર પર નિર્ભર રહેલી રિલાયન્સ હવે ડિજિટલ સર્વિસિસ અને કન્ઝ્યુમર બિઝનેસમાં પણ વૈશ્વિક સ્તરે મજબૂત હાજરી નોંધાવી રહી છે.
હવે રોકાણકારોની નજર SEBIની મંજૂરી પર
Jio IPO અંગેની સત્તાવાર જાહેરાત બાદ હવે બજાર અને રોકાણકારોની નજર SEBIની મંજૂરી અને આગામી પ્રક્રિયા પર રહેશે. DRHP જાહેર થયા બાદ IPOનું કદ, મૂલ્યાંકન, શેર વેચાણની વિગતો અને લિસ્ટિંગની સમયરેખા અંગે વધુ માહિતી સામે આવશે. નિષ્ણાતોનું માનવું છે કે, Jioનું IPO ભારતીય શેરબજારના ઇતિહાસમાં સૌથી મોટા લિસ્ટિંગ પૈકીનું એક બની શકે છે અને લાખો રોકાણકારો માટે મહત્વપૂર્ણ તક ઉભી કરી શકે છે.
