8th Pay Commission Latest Update: કેન્દ્ર સરકારના કરોડો કર્મચારીઓ અને પેન્શનરો માટે આઠમું પગાર પંચ (8th Pay) અત્યારે ચર્ચાનો સૌથી મોટો વિષય છે. આ દરમિયાન ઇન્ડિયન રેલવે ટેકનિકલ સુપરવાઇઝર્સ એસોસિએશન (IRTSA) એ પંચની કાર્યપ્રણાલી પર ગંભીર સવાલો ઉઠાવ્યા છે. સંગઠનનું કહેવું છે કે પંચની હાલની પ્રશ્નાવલી (Questionnaire) અધૂરી છે અને તેમાં કર્મચારીઓના અનેક પાયાના મુદ્દાઓની અવગણના કરવામાં આવી છે.
કઈ માંગણીઓ રાખવામાં આવી છે?
ડેડલાઇન વધી, પણ વિવાદ પણ વધ્યો
પંચે સૂચનો આપવાની છેલ્લી તારીખ 16 માર્ચથી વધારીને 31 માર્ચ 2026 કરી દીધી છે. પરંતુ IRTSA એ ચેરપર્સન રંજના પ્રકાશ દેસાઈને પત્ર લખીને સ્પષ્ટ કર્યું છે કે હાલના 18 પ્રશ્નોનો દસ્તાવેજ કર્મચારીઓની જરૂરિયાતો પૂરી કરતો નથી.
ગ્રુપ સિસ્ટમ બદલવાની માંગ
સંગઠનની સૌથી મોટી માંગ કર્મચારીઓના વર્ગીકરણ (Classification) ને લઈને છે. તેમનું કહેવું છે કે આજના યુગમાં ટેકનોલોજી અને જવાબદારીઓ બદલાઈ ગઈ છે, તેથી જૂના ગ્રુપ A, B અને C ના માળખાને ખતમ કરીને એક નવું અને આધુનિક માળખું તૈયાર કરવું જોઈએ, જેથી પ્રમોશન અને પગારમાં પારદર્શિતા આવી શકે.
ભથ્થાં (Allowances) પર કાપ મૂકવાનો વિરોધ
7મા પગાર પંચમાં જ્યાં 196 ભથ્થાં પર ચર્ચા થઈ હતી, ત્યાં 8મા પંચની થીમમાં માત્ર 12 કેટેગરી રાખવામાં આવી છે. રેલવે સંગઠનનું કહેવું છે કે દરેક ભથ્થું એક વિશેષ જરૂરિયાત માટે હોય છે, તેને મર્યાદિત કરવું એ કર્મચારીઓ સાથે અન્યાય હશે.
પેન્શનરોની અવગણના પર સવાલ
લાખો નિવૃત્ત કર્મચારીઓ માટે સૌથી ચિંતાજનક બાબત એ છે કે પ્રશ્નાવલીમાં પેન્શન અને ફેમિલી પેન્શનનો સ્પષ્ટ ઉલ્લેખ જ નથી. સંગઠને માંગ કરી છે કે વૃદ્ધ પેન્શનરો અને તેમના પરિવારોના હિતોને આમાં પ્રાથમિકતાથી સામેલ કરવામાં આવે.
જુનિયર એન્જિનિયર અને IT સ્ટાફ માટે અલગ જોગવાઈ
સંગઠને માંગ કરી છે કે રેલવેના જુનિયર એન્જિનિયર, સીનિયર સેક્શન એન્જિનિયર અને આઈટી સ્ટાફ જેવા ટેકનિકલ પદોની સમસ્યાઓ અલગથી સાંભળવામાં આવે. માત્ર MACP સ્કીમના ભરોસે કરિયર ગ્રોથ છોડી શકાય નહીં, પરંતુ 'ફંક્શનલ પ્રમોશન' પર ભાર મૂકવો પડશે.
કર્મચારીઓએ અન્ય આ માંગણીઓ પણ કરી છે. જેમાં ઓનલાઇન ફોર્મમાં શબ્દ મર્યાદા (Character Limit) વધારવામાં આવે. સૂચનોને ફિઝિકલ (હાર્ડ કોપી) તરીકે પણ જમા કરવાની મંજૂરી મળે. કર્મચારીઓ પોતાના પક્ષમાં જૂના અદાલતી ચુકાદાઓને પણ પુરાવા તરીકે રજૂ કરી શકે.
