Obscene Video Link Viral: એક તરફ ગુજરાતમાં સ્થાનિક સ્વરાજ્યની ચૂંટણીઓને લઈને રાજકીય પક્ષો તડામાર તૈયારીઓમાં લાગેલા છે. એવામાં બીજી તરફ કોઈકને કોઈક રીતે સત્તાપક્ષ ભાજપ વિવાદોમાં સપડાયેલું જોવા મળી રહ્યું છે. હાલ જૂનાગઢ ભાજપના એક વ્હોટ્સએપ ગ્રૂપે આખા સંગઠનની આબરૂના ધજાગરા ઉડાડ્યા છે. વ્હોટ્સએપ ગ્રૂપમાં કોઈએ અશ્લીલ વીડિયો શેર કરતા મહિલા કાર્યકરો રોષે ભરાઈ છે. જેમાં એક મહિલા કાર્યકરે તો રોષે ભરાઈને ટકોર પણ કરી છેકે, "ભાઈ, આવા ગંદા વીડિયો ના મૂકો, ગ્રૂપમાં લેડીઝ પણ છે".
જૂનાગઢમાં રાજકીય વર્તુળોમાં એક શરમજનક અને ચોંકાવનારી ઘટના સામે આવી છે, જેમાં ભારતીય જનતા પાર્ટીના ‘જૂનાગઢ સિટી વોર્ડ નંબર 6’ના સત્તાવાર વોટ્સએપ ગ્રુપમાં અશ્લીલ વીડિયો લિંક શેર થતાં ભારે વિવાદ ઊભો થયો છે. આ ઘટના ગત 22 માર્ચની મોડી રાત્રે બની હોવાનું જાણવા મળ્યું છે, જ્યારે રાત્રે લગભગ 1:57 વાગ્યે એક સભ્ય દ્વારા ગ્રુપમાં બિભત્સ અને અશ્લીલ લખાણ ધરાવતી લિંક મોકલવામાં આવી હતી.
આ ગ્રુપમાં મહિલા કાર્યકરો, કોર્પોરેટરો તેમજ પક્ષના અનેક હોદ્દેદારો જોડાયેલા હોવાને કારણે ઘટના વધુ ગંભીર બની ગઈ છે. મેસેજ આવતાની સાથે જ ગ્રુપના સભ્યોમાં ચોંકાવનારી સ્થિતિ સર્જાઈ હતી, જ્યારે ખાસ કરીને મહિલા સભ્યોમાં આ ઘટનાને લઈને ભારે રોષ ફાટી નીકળ્યો છે. મહિલા સભ્યોના મત મુજબ, આ પ્રકારની ઘટના તેમની સુરક્ષા અને ગરીમા સામે પ્રશ્નો ઉભા કરે છે.
ઘટના બાદ ગ્રુપના એક જાગૃત સભ્યે તરત જ વિરોધ નોંધાવતા મેસેજ કર્યો હતો કે, “આ ગ્રુપમાં આવા વીડિયો ન મૂકો, અહીં લેડીઝ પણ છે.” આ ટકોર બાદ પણ ઘટનાના સ્ક્રીનશોટ સોશિયલ મીડિયા પર વાઇરલ થઈ ગયા, જેના કારણે જૂનાગઢ શહેરના રાજકીય વાતાવરણમાં ભારે ખળભળાટ મચી ગયો છે.
આ મામલે વોર્ડ નંબર 6ના ભાજપના કોર્પોરેટર પ્રવીણ વાઘેલાએ પ્રતિક્રિયા આપતા જણાવ્યું કે તેમને હજુ સુધી આ ઘટનાની જાણ નથી અને તેઓ સોશિયલ મીડિયાનો ઓછો ઉપયોગ કરે છે. જોકે, તેમણે કહ્યું કે જો આવો મેસેજ મોકલાયો હશે તો તેને ડિલીટ કરવા માટે સૂચના આપવામાં આવશે.
બીજી તરફ, જે વ્યક્તિના નંબર પરથી લિંક મોકલાઈ હતી તેણે આશ્ચર્યજનક રીતે દાવો કર્યો કે મેસેજ કેવી રીતે મોકલાયો તેની તેને જાણ નથી અને કદાચ મોબાઈલ હાથમાંથી પડી જવાથી આ બન્યું હશે. હાલમાં આ ઘટનાના સ્ક્રીનશોટ્સ ઝડપથી વાયરલ થતા પક્ષની છબીને નુકસાન પહોંચ્યું છે અને શિસ્તભંગના મુદ્દે ચર્ચાઓ તેજ બની છે. હવે પક્ષ દ્વારા જવાબદાર વ્યક્તિ સામે શું કાર્યવાહી કરવામાં આવે છે અને આવનારા દિવસોમાં નેતૃત્વ શું વલણ અપનાવે છે, તે જોવું મહત્વપૂર્ણ રહેશે.
