Bhavnagar Police Action: ભાવનગર શહેરમાં કાયદો અને વ્યવસ્થાની સ્થિતિ વધુ મજબૂત કરવાના હેતુથી જિલ્લા પોલીસ વડા નિતેશ પાંડેયે કડક વલણ અપનાવ્યું છે. વર્ષોથી બુટલેગરોના સૌથી મોટા અડ્ડા તરીકે જાણીતા એવા 'આડોડિયાવાસ' સહિતના વિસ્તારોમાં આજે વહેલી સવારથી પોલીસનું બુલડોઝર ફરી વળ્યું હતું. વારંવારની પોલીસ રેડ અને કડક કાર્યવાહી છતાં આ વિસ્તારોમાં દેશી-વિદેશી દારૂના વેપલાના સ્ટેન્ડ ફરી ધમધમતા થઈ જતા હતા. આ સમસ્યાનો કાયમી ઉકેલ લાવવા માટે એસપી નિતેશ પાંડેયની સીધી સૂચનાથી પોલીસ અને મહાનગરપાલિકાની ટીમે સંયુક્ત રીતે ઓપરેશન હાથ ધરીને બુટલેગરોના ગેરકાયદેસર મકાનો અને દુકાનો પર ડિમોલિશનની કાર્યવાહી શરૂ કરી હતી.
આ ઓપરેશન અંતર્ગત શહેરના આડોડિયાવાસ, દીપક ચોક અને તિલકનગર જેવા સંવેદનશીલ વિસ્તારોમાં મ્યુનિસિપલ કોર્પોરેશનની દબાણ હટાવવાની ટીમ હિટાચી અને જેસીબી (JCB) જેવા મસમોટા મશીનો સાથે ત્રાટકી હતી. પોલીસના ચુસ્ત બંદોબસ્ત વચ્ચે બુટલેગરો દ્વારા સરકારી જમીન પર ઊભા કરાયેલા અંદાજે 8 જેટલા મકાનો અને દુકાનોને તોડી પાડી જમીનદોસ્ત કરી દેવામાં આવ્યા હતા. પોલીસની આ આક્રમક કાર્યવાહીથી અસામાજિક તત્વોમાં ફફડાટ ફેલાઈ ગયો છે, તો બીજી તરફ સામાન્ય જનતામાં પોલીસની આ કામગીરીની પ્રશંસા થઈ રહી છે.
રેડ છતાં ચાલતા અડ્ડાઓ પર કાયમી 'બ્રેક': પોલીસનું મેગા ઓપરેશન
ભાવનગર પોલીસ દ્વારા ભૂતકાળમાં અનેકવાર આ સંવેદનશીલ વિસ્તારોમાં દારૂના અડ્ડાઓ પર દરોડા પાડવામાં આવ્યા હતા, પરંતુ પોલીસની કાર્યવાહી પૂર્ણ થયા બાદ બુટલેગરો ફરી સક્રિય થઈ જતા હતા. આ સમસ્યાના કાયમી ઉકેલ માટે હાથ ધરાયેલી તપાસમાં જાણવા મળ્યું હતું કે આ ગેરકાયદેસર વ્યવસાયો મજબૂત બાંધકામોના ઓથા હેઠળ ચાલી રહ્યા છે, જેથી એસપી નિતેશ પાંડેયે આ અડ્ડાઓને જ જમીનદોસ્ત કરવાનો કડક નિર્ણય લીધો હતો. આ મેગા ઓપરેશનમાં મહાનગરપાલિકાની ટીમ દ્વારા હિટાચી અને જેસીબી જેવા મસમોટા મશીનોનો ઉપયોગ કરીને બુટલેગરોના ગઢ ગણાતા ગેરકાયદેસર સ્થાનોને તોડી પાડવામાં આવ્યા હતા, જેનાથી ગુનેગારોના આર્થિક સામ્રાજ્ય પર સીધો પ્રહાર થયો છે.
સ્થાનિકોનો હોબાળો અને પોલીસનો ચુસ્ત બંદોબસ્ત
જ્યારે પોલીસ અને કોર્પોરેશનની સંયુક્ત ટીમ ડિમોલિશનની કામગીરી માટે પહોંચી ત્યારે મોટી સંખ્યામાં સ્થાનિક લોકોના ટોળાં ઉમટી પડ્યા હતા અને વાતાવરણ તંગ બની ગયું હતું. કેટલીક જગ્યાઓ પર લોકો દ્વારા પોલીસની આ આક્રમક કાર્યવાહીનો ઉગ્ર વિરોધ કરી હોબાળો મચાવવાનો પ્રયાસ પણ કરવામાં આવ્યો હતો. જોકે, પોલીસ તંત્ર અગાઉથી જ સતર્ક હોવાથી ઘટનાસ્થળે વધારાનો પોલીસ ફોર્સ અને ચુસ્ત બંદોબસ્ત તૈનાત કરી દેવામાં આવ્યો હતો. આ મજબૂત સુરક્ષા વ્યવસ્થાને કારણે પરિસ્થિતિ પર ત્વરિત કાબૂ મેળવી શકાયો હતો અને કોઈ પણ મોટી અનિચ્છનીય ઘટના વગર ડિમોલિશનની કામગીરી નિર્વિઘ્નપણે પૂર્ણ થઈ હતી.
ગુનેગારોને એસપીનો કડક સંદેશ
જિલ્લા પોલીસ વડા નિતેશ પાંડેયની આ કાર્યવાહીએ સ્પષ્ટ કરી દીધું છે કે, શહેરમાં ગેરકાયદેસર પ્રવૃત્તિઓ ચલાવનારાઓ સામે હવે માત્ર કેસ જ નહીં, પરંતુ તેમના આર્થિક અને ભૌતિક સામ્રાજ્યને પણ તોડી પાડવામાં આવશે. આગામી દિવસોમાં પણ શહેરના અન્ય વિસ્તારોમાં રહેલા દબાણો અને અસામાજિક તત્વોના અડ્ડાઓ પર પોલીસની નજર હોવાનું સૂત્રો જણાવી રહ્યા છે.
