પશ્ચિમ સુદાનના Marra Mountains ક્ષેત્રમાં એક વિશાળ ભૂસ્ખલનથી એક આખું ગામ વિનાસ થઈ ગયું. આ અકસ્માતમાં ઓછામાં ઓછા 1,000 લોકો માર્યા ગયા, જ્યારે ફક્ત એક જ વ્યક્તિ બચી ગયો. સોમવારે સુદાન લિબરેશન મૂવમેન્ટ/આર્મી દ્વારા એક નિવેદનમાં આ માહિતી આપવામાં આવી.
સુદાનીઝ ચળવળનું નેતૃત્વ અબ્દુલવાહિદ મોહમ્મદ નૂર કરી રહ્યા છે અને તેમણે કહ્યું કે આ ઘટના 31 ઓગસ્ટના રોજ બની હતી. આ વિસ્તારમાં ઘણા દિવસો સુધી ભારે વરસાદ પડ્યો હતો, ત્યારબાદ આ ભૂસ્ખલન થયું હતું. ચળવળ દ્વારા જારી કરાયેલા એક નિવેદનમાં કહેવામાં આવ્યું છે કે ગામ હવે સંપૂર્ણપણે જમીનદોસ્ત થઈ ગયું છે.
સંગઠને સંયુક્ત રાષ્ટ્ર (UN) અને અન્ય આંતરરાષ્ટ્રીય રાહત એજન્સીઓને મૃતકોના મૃતદેહો મેળવવા અને અસરગ્રસ્ત પરિવારોને સહાય પૂરી પાડવા માટે તાત્કાલિક પગલાં લેવા અપીલ કરી છે. સંગઠને એમ પણ કહ્યું કે મૃતકો મોટી સંખ્યામાં પુરુષો, સ્ત્રીઓ અને બાળકોનો સમાવેશ થાય છે.
સુદાનમાં બે વર્ષથી ગૃહયુદ્ધ ચાલી રહ્યું છે
આ અકસ્માત એવા સમયે થયો છે જ્યારે સુદાન પહેલાથી જ ગંભીર સંકટનો સામનો કરી રહ્યું છે. સુદાનની સેના અને પેરામિલિટ્રી રેપિડ સપોર્ટ ફોર્સ (RSF) વચ્ચે છેલ્લા બે વર્ષથી ચાલી રહેલા ગૃહયુદ્ધે દેશમાં પરિસ્થિતિ વધુ ખરાબ કરી દીધી છે.
ગૃહયુદ્ધથી બચવા માટે ઉત્તર દારફુર રાજ્યના મોટી સંખ્યામાં લોકોએ Marra Mountainsમાં આશરો લીધો હતો. જોકે, અહીં ખોરાક અને દવાઓની ભારે અછત છે.
સુદાનમાં અડધાથી વધુ લોકો ભૂખમરાના જોખમમાં છે
ગૃહયુદ્ધની સુદાનની વસ્તી પર ઊંડી અસર પડી છે. અડધાથી વધુ વસ્તી ભૂખમરાનો સામનો કરી રહી છે અને લાખો લોકો પોતાના ઘર છોડીને ભાગી ગયા છે. ઉત્તર દારફુરની રાજધાની અલ-ફાશીર પણ સતત હુમલા હેઠળ છે.
SLM/A એ જણાવ્યું હતું કે આ ભૂસ્ખલન દુર્ઘટના દેશમાં હાલની માનવતાવાદી પરિસ્થિતિને વધુ ખરાબ કરી રહી છે અને આંતરરાષ્ટ્રીય સમુદાયે તાત્કાલિક હસ્તક્ષેપ કરવો જોઈએ.
