જ્યારે કોઈ બેટ્સમેન ઉત્તમ ફોર્મમાં હોય છે, ત્યારે મોટા રેકોર્ડ પણ નાના લાગે છે. શુભમન ગિલ સાથે પણ કંઈક આવું જ થઈ રહ્યું છે. તેણે વેસ્ટ ઈન્ડિઝ સામે અણનમ 129 રન બનાવીને ઘણા રેકોર્ડ તોડી નાખ્યા. નોંધનીય છે કે શુભમન ગિલની કેપ્ટન તરીકેની છેલ્લી 12 ટેસ્ટ ઇનિંગ્સમાં આ પાંચમી સેંચુરી ફટકારી છે. ગિલ-જયસ્વાલની સેંચુરીના કારણે, ટીમ ઈન્ડિયા પ્રથમ ઇનિંગ્સમાં 518 રનના સ્કોર સુધી પહોંચવામાં સફળ રહી. ભારતે 518 રન પર પોતાની ઇનિંગ્સ ડિકલેર કરી. જાણો શુભમન ગિલે તેની 129 રનની ઇનિંગ્સ દરમિયાન તોડેલા 5 મુખ્ય રેકોર્ડ વિશે.
શુભમન ગિલે 5 મુખ્ય રેકોર્ડ તોડ્યા
ભારતીય ટેસ્ટ કેપ્ટન દ્વારા એક વર્ષમાં સૌથી વધુ સદી - શુભમન ગિલે આ વર્ષે કેપ્ટન બન્યા પછી પાંચ સેંચુરી ફટકારી ચૂક્યો છે. તેણે ભારતીય ટેસ્ટ કેપ્ટન દ્વારા એક વર્ષમાં સૌથી વધુ સેંચુરી ફટકારવાના મામલે વિરાટ કોહલીની બરાબરી કરી છે. વિરાટ કોહલીએ 2017 અને 2018 માં કેપ્ટન તરીકે પાંચ-પાંચ સેંચુરી ફટકારી હતી. સચિન તેંડુલકરે કેપ્ટન તરીકે ચાર સદી ફટકારી હતી.
ઘરઆંગણે ટેસ્ટ મેચમાં સૌથી વધુ વ્યક્તિગત સ્કોર - આ શુભમન ગિલનો ઘરઆંગણે ટેસ્ટ મેચમાં સૌથી વધુ વ્યક્તિગત સ્કોર પણ છે. ભારતીય ધરતી પર તેનો અગાઉનો સૌથી વધુ વ્યક્તિગત સ્કોર 128 હતો, જે તેણે 2023 માં ઓસ્ટ્રેલિયા સામે બનાવ્યો હતો. હવે તેણે 129 રન બનાવીને પોતાના સર્વોચ્ચ સ્કોરમાં સુધારો કર્યો છે.
WTC માં ભારત માટે સૌથી વધુ રન - શુભમન ગિલ વર્લ્ડ ટેસ્ટ ચેમ્પિયનશિપમાં ભારત માટે સૌથી વધુ રન બનાવનાર ખેલાડી બન્યો છે. તેના નામે હવે 2,826 રન છે. શુભમન ગિલે રિષભ પંતને પાછળ છોડી દીધો છે, તેણે અત્યાર સુધીમાં વર્લ્ડ ટેસ્ટ ચેમ્પિયનશિપમાં 2,731 રન બનાવ્યા છે. રોહિત શર્માના 2,716 રન સાથે ત્રીજા નંબરે છે, અને વિરાટ કોહલી 2,617 રન સાથે યાદીમાં ચોથા ક્રમે છે.
બાબર આઝમને પાછળ છોડી દીધો - શુભમન ગિલે બાબર આઝમ અને રોહિત શર્માને પાછળ છોડીને વર્લ્ડ ટેસ્ટ ચેમ્પિયનશિપના ઇતિહાસમાં કેપ્ટન તરીકે સૌથી વધુ સેંચુરી ફટકારી છે. ગિલના WTC માં હવે પાંચ સેંચુરી છે, જ્યારે રોહિત શર્મા અને બાબર આઝમે દરેકે કેપ્ટન તરીકે ચાર સેંચુરી ફટકારી છે. જો રૂટના નામે સૌથી વધુ સદીઓનો રેકોર્ડ છે, જેણે WTC માં કેપ્ટન તરીકે આઠ વખત સેંચુરી ફટકારી છે.
એક વર્ષમાં સૌથી વધુ ટેસ્ટ સેંચુરી - શુભમન ગિલે એક વર્ષમાં સૌથી વધુ ટેસ્ટ સેંચુરી ફટકારવાના મામલે સુનિલ ગાવસ્કર અને વિરાટ કોહલીની બરાબરી કરી છે. તેણે એક જ વર્ષમાં 5 ટેસ્ટ સેંચુરી ફટકારવાની સિદ્ધિ પણ હાંસલ કરી છે. જોકે, એક જ વર્ષમાં સૌથી વધુ ટેસ્ટ સેંચુરી ફટકારવાનો ભારતીય રેકોર્ડ સચિન તેંડુલકરના નામે છે, જેમણે 2010 માં 7 સદી ફટકારી હતી.
